Mark 15:1-47
15 Tumu pagi lebuh mata panas tumbuh, semua Raban Kunsil Orang Judah, iya nya bala tuai imam, bala tuai bansa orang Judah, enggau bala penulis Adat baum. Sida nanchang jari Jesus lalu nyerahka iya ngagai Pilate.
2 Pilate nanya iya: “Kati nuan Raja orang Judah?” Disaut Jesus: “Nuan empu udah meri saut.”
3 Tang, bala tuai imam nyebut mayuh jaku tuduh pasal iya.
4 Pilate nanya iya baru: “Nama kebuah nuan enda nyaut? Dinga nuan pemayuh jaku tuduh ke disebut sida pasal nuan.”
5 Tang Jesus agi enda nyaut. Nya alai, Pilate balat alit ati.
6 Tiap kali maya Pengerami Paska, Pilate endang selalu ngelepaska siku orang ke dijil, nitihka pinta orang mayuh.
7 Maya nya, bisi siku lelaki ke benama Barabas, ke dijil sama enggau orang ke ngelaban perintah. Sida kala munuh orang lebuh ngelaban perintah.
8 Nya alai, orang mayuh datai lalu minta Pilate ngelepaska siku orang ke dijil baka ke selalu digaga iya.
9 Pilate nanya sida: “Kati kita deka aku ngelepaska Raja orang Judah?”
10 Laban Pilate nemu bala tuai imam kepapaska Jesus. Nya alai, sida nyerahka Jesus ngagai iya.
11 Tang bala tuai imam ngasut* orang mayuh minta Pilate ngelepaska Barabas.
12 Sekali agi, Pilate bejaku ngagai sida: “Enti pia, nama patut digaga aku ngagai orang ke dikumbai kita Raja orang Judah?”
13 Sida sekali agi manjung enggau inggar: “Pantang* iya ba tiang!”
14 Tang Pilate nanya baru: “Nama kebuah? Nama penyalah iya?” Tang sida manjung inggar agi: “Pantang iya ba tiang!”
15 Ketegal Pilate deka ngenyamaika ati orang mayuh, iya ngelepaska Barabas ke sida. Pengudah ngasuh Jesus disipat, iya nyerahka Jesus ngambika diukum bunuh ba tiang.
16 Udah nya, bala soldadu mai Jesus ngagai laman rumah gabenor, lalu semua soldadu diasuh begelumu.
17 Sida ngerasukka gari ungu ba iya, lalu ngengkahka makota ke digaga ari duri ba pala iya.
18 Udah nya, sida bejaku ngagai iya: “Tabi ke nuan, Raja orang Judah!”
19 Sida mega malu pala iya ngena batang kayu lalu ngeludah iya. Udah nya, sida besugang ba mua iya.
20 Pengudah ngeleseka iya, sida muka gari ungu ari iya, lalu ngerasukka baru baju jubah iya. Udah nya, sida mai iya pansut ngambika iya dipantang ba tiang.
21 Maya nya, Simon ari Sairin benung mansa. Iya apai Aleksander enggau Rufus, lalu iya baru datai ari menua pesisir. Bala soldadu mejal iya ngesan tiang perinsa* Jesus.
22 Udah nya, sida mai iya ngagai endur ke dikumbai Golgota, reti nya, “Endur Kerubung Pala.”*
23 Ba dia, sida nguji meri iya wain ke dichampur enggau mur,* tang iya enggai ngirup nya.
24 Pengudah mantang iya ba tiang, sida bechabut undi bebagika gari luar iya kena nentuka bagi ke diambi siku-siku.
25 Sida mantang iya ba tiang kena pukul semilan pagi.*
26 Ba atas pala iya, bisi siti papan ti madahka jaku tuduh pasal iya. Utai ke ditulis ba papan nya: “Raja orang Judah.”
27 Sida mega ngukum bunuh dua iku perumpak ba tiang sama enggau Jesus, siku ba sepiak kanan iya, lalu siku ba sepiak kiba iya.
28 * ——
29 Orang ke mansa ngeleseka iya lalu ngilikka pala sida. Ku sida bejaku: “Nye! Gamal nuan nya ke deka ngerubuh Rumah Sembiang, lalu nirika iya baru dalam tiga hari.
30 Idupka diri empu dulu. Nurun nuan ari tiang perinsa* nya!”
31 Bala tuai imam enggau bala penulis Adat mega ngeleseka iya. Ku sida bejaku enggau pangan diri: “Orang bukai ulih diselamatka iya, tang diri empu enda ulih!
32 Awakka Kristus, Raja orang Israel, nurun kediri empu ari tiang perinsa* nya diatu, ngambika kitai ulih meda lalu arapka iya.” Indah perumpak ke diukum bunuh ba tiang sama enggau iya mega ngeleseka iya.
33 Kena pukul 12 tengah hari,* semua dunya petang magang nyentuk ngagai pukul 3 ngalih hari.*
34 Kena pukul tiga ngalih hari, Jesus ngangau enggau nyawa ti inggar: “Eli, Eli, lama sabakhtani?” reti nya, “Petara aku, Petara aku, nama kebuah Nuan ninggalka aku?”
35 Lebuh orang ke bediri semak dia ninga iya, sida lalu bejaku: “Dinga kita, iya ngangauka Elijah!”
36 Udah nya, bisi orang belanda, ngambi kapuk* lalu nyepuhka kapuk nya ngagai ai wain ti masam. Iya ngengkahka kapuk nya ba kayu, lalu nuatka iya ngagai Jesus ngambika diirup Jesus. Lalu ku orang nya bejaku: “Awakka iya! Aram kitai meda sekalika Elijah deka datai nyelamatka iya tauka enda.”
37 Tang Jesus ngangau enggau nyawa ti inggar lalu ngapuska seput iya.
38 Maya nya, kain tirai ke digantung dalam Rumah Sembiang charik belah dua ari atas ke baruh.
39 Lebuh pemesai soldadu ke ngemataka Jesus meda semua utai ke nyadi lebuh Jesus mati, iya lalu bejaku: “Orang tu amat Anak Petara!”
40 Ba dia mega, bisi sida ke indu meda utai ke nyadi ari jauh. Bala sida nya nyengkaum Maria Magdalin, Maria indai James* seduai Joses, sereta Salomi.
41 Sida nya meh ke suah nitihka Jesus sereta nulung iya lebuh iya ba Galili. Bisi mega mayuh agi sida indu ke bukai ke udah nitihka Jesus ngagai Jerusalem.
42 Lebuh hari nyau lemai, ba hari ke dikena nyediaka Hari Sabat, iya nya sehari sebedau Hari Sabat,
43 Josep ari Arimatea datai. Iya siku ari Raban Kunsil Orang Judah ke dipebasa, lalu iya mega nganti penatai Perintah Petara. Iya meranika diri betemu enggau Pilate, lalu minta bangkai Jesus.
44 Tang Pilate deka nemu sekalika Jesus udah mati. Nya alai, iya ngangauka pemesai soldadu iya, lalu nanya enti Jesus udah mati tauka bedau.
45 Pengudah nemu Jesus amat udah mati, baka ke dipadah pemesai soldadu iya, Pilate ngemendarka Josep ngambi bangkai Jesus.
46 Josep meli kain linin ti alus, lalu nurunka bangkai Jesus. Iya malut bangkai Jesus ngena kain linin nya, lalu ngengkahka bangkai nya dalam kubur ke udah ditebuk ba bukit batu. Udah nya, iya maringka sigi batu kena nutup lubang kubur nya.
47 Tang Maria Magdalin enggau Maria indai Joses, agi beratika endur bangkai Jesus digalika.
Nota Kaki
^ Tauka “nyungkak.”
^ Tauka “Bunuh.”
^ Peda Penerang Leka Jaku.
^ Tauka “Endur Tengkorak.”
^ Utai ti tau ngasuh mabuk.
^ Jaku Asal, “jam ketiga.”
^ Ayat tu nadai ditemu ba sekeda manuskrip ke lama, lalu engka ukai sebagi ari ayat ba Bup Kudus.
^ Peda Penerang Leka Jaku.
^ Peda Penerang Leka Jaku.
^ Jaku Asal, “jam keenam.”
^ Jaku Asal, “jam kesemilan.”
^ Tauka “span.” Iya nya, sebengkah batu karang ti lembut ke ulih nginsap ai.
^ Tauka “James ke Biak; James ke Mit.” Engka ketegal James biak agi tauka baruh agi ari siku da agi rasul ke benama James, iya nya anak Sebedi.
