Matthew 12:1-50
-
Jesus, ‘Tuan Hari Sabat’ (1-8)
-
Lelaki ke mati jari digeraika (9-14)
-
Nembiak ti dikesayauka Petara (15-21)
-
Melikat ti jai diburu ngena kuasa kudus (22-30)
-
Dosa ti enda ulih diampun (31, 32)
-
Pun kayu dikelala ari buah iya (33-37)
-
Tanda Jonah (38-42)
-
Melikat ti jai pulai baru (43-45)
-
Indai sereta bala menyadi lelaki Jesus (46-50)
12 Maya nya, kena Hari Sabat, Jesus bejalai nengah ladang gandum. Sida murid iya lapar lalu belabuh matahka tangkai gandum, lalu makai igi gandum.
2 Tang lebuh orang Parisi meda nya, sida lalu bejaku ngagai Jesus: “Peda nuan! Sida murid nuan ngereja utai ti enda diasuh Adat lebuh Hari Sabat.”
3 Ku Jesus nyaut: “Kati kita nadai kala macha pasal utai ti dikereja David, lebuh iya enggau bala iya lapar?
4 Iya enggau bala iya tama ngagai Rumah Sembiang lalu makai roti ti udah diberi ngagai Petara. Nitihka Adat, sida enda tau makai roti nya, tang semina bala imam aja ke tau.
5 Kati kita nadai kala macha dalam Adat, sida imam enda dikumbai salah, taja pan sida bekereja ba Rumah Sembiang maya Hari Sabat?
6 Aku madah ngagai kita: Ba ditu, bisi siku orang ke mulia agi ari Rumah Sembiang.
7 Tang enti kita nemu reti jaku tu: ‘Aku deka kita kasihka orang ari ke meri pemeri ngagai Aku,’ kita tentu enda nyalahka orang ke nadai penyalah.
8 Laban Anak Mensia, Tuan ke bisi kuasa atas Hari Sabat.”
9 Pengudah mupuk ari endur nya, Jesus tama ngagai balai gempuru sida.
10 Ba dia, bisi siku lelaki ke mati jari sepiak.* Lalu sida nanya Jesus: “Kati nya ngelanggar Adat enti kitai ngeraika orang maya Hari Sabat?” Sida nanya munyi nya, ngambika sida ulih bedawaka iya.
11 Ku Jesus nyaut: “Enti kita bisi siku jelu bedus ke labuh ngagai lubang maya Hari Sabat, endaka kita deka ngulihka jelu nya ari lubang nya?
12 Mensia jauh berega agi ari bedus! Nya alai, kitai enda ngelanggar Adat enti kitai ngereja pengawa ti manah maya Hari Sabat.”
13 Udah nya, iya lalu bejaku ngagai lelaki ke mati jari sepiak nya: “Unjurka jari nuan.” Lelaki nya lalu ngunjurka jari iya, lalu jari iya gerai, baka jari iya ti sepiak.
14 Tang orang Parisi pansut lalu baum ngiga chara kena munuh Jesus.
15 Pengudah Jesus nemu pasal pekara nya, iya lalu mupuk ari endur nya. Mayuh amat orang nitihka iya, lalu iya ngeraika semua sida.
16 Tang iya bebendar enda ngasuh sida madahka pasal iya ngagai orang bukai.
17 Tu ngamatka jaku ti udah disebut nengah Nabi Isaiah:
18 “Tu nembiak Aku ti udah dipilih Aku. Aku sayau sereta gaga ati ke iya! Aku deka meri iya kuasa kudus Aku, lalu iya deka madahka reti atur ti lurus ngagai orang ari semua bansa.
19 Iya enda bekelikuh tauka merakka nyawa, lalu nyawa iya nadai didinga ba sebelah jalai besai.
20 Iya enda ngindik rumput ti layu, tauka madamka api kelita ti kelap-kelap, datai ke iya mujur mai atur ti lurus.
21 Endang amat, orang ari semua bansa deka andalka nama iya.”
22 Udah nya, sida mai ngagai Jesus siku lelaki ke buta sereta bisu ketegal dirasuk melikat ti jai. Jesus ngeraika lelaki nya lalu iya ulih meda sereta bejaku.
23 Lalu semua orang mayuh balat alit ati. Ku sida: “Kati iya kini, Anak David?”
24 Lebuh orang Parisi ninga nya, sida lalu bejaku: “Iya muru melikat ti jai ngena kuasa Belsebup,* ketuai melikat ti jai.”
25 Jesus nemu utai ti dirunding sida, lalu ku iya: “Genap bengkah perintah ti bepechah-belah lalu ngelaban diri empu, deka rusak. Genap bengkah nengeri tauka ruang bilik ti bepechah-belah lalu ngelaban diri empu, enda ulih tan lama.
26 Pia mega, enti Sitan muru Sitan, iya ngelaban diri empu. Enti pia, baka ni ku perintah iya ulih tan?
27 Lalu enti aku muru melikat ti jai ngena kuasa Belsebup, kuasa sapa ke dikena bala nembiak kita muru melikat ti jai? Nya alai, nembiak kita empu deka nunjukka kita nya salah.
28 Tang enti aku muru melikat ti jai ngena kuasa kudus Petara, reti nya, Perintah Petara udah bisi ba ditu, tang kita enda nemu* pasal nya.
29 Baka ni ku orang ulih tama ngagai rumah orang ke kering lalu ngerampas reta orang ke kering nya? Endaka iya patut nanchang orang ke kering nya dulu? Udah nya, baru iya ulih ngerampas reta ari rumah orang ke kering nya.
30 Barang sapa ke enda setanah enggau aku, ngelaban aku. Lalu barang sapa ke enda enggau aku ngempuruka orang ngagai aku, iya muru orang ari aku.
31 “Nya alai, aku madah ngagai kita: Semua macham dosa deka diampun. Orang ke bejaku ngelaban utai ti kudus mega deka diampun. Tang barang sapa ke bejaku ngelaban kuasa kudus Petara, enda ulih diampun.
32 Ambika chunto, barang sapa bejaku ngelaban Anak Mensia, deka diampun. Tang barang sapa bejaku ngelaban kuasa kudus, enda ulih diampun, sekalika nya ba maya* ke diatu tauka ba maya ti deka datai.
33 “Enti pun kayu kita galak, iya deka mansutka buah ti manah. Tang enti pun kayu kita buruk, iya deka mansutka buah ti jai. Ari buah, kita ulih ngelala baka ni pun kayu nya.
34 Kita anak ular ti bisa. Baka ni ku kita ulih nyebut utai ti manah enti kita empu endang jai? Laban utai ti disebut orang datai ari ati.
35 Orang ke manah mansutka utai ti manah ari ati iya ti manah, lalu orang ke jai mansutka utai ti jai ari ati iya ti jai.
36 Aku madah ngagai kita: Lebuh Hari Pechara ila, mensia deka diakim ke tiap iti leka jaku ti enda beguna ke disebut sida.
37 Ketegal utai ti disebut kita, kita deka dikumbai lurus. Lalu ketegal utai ti disebut kita, kita deka diakim.”
38 Udah nya, sekeda penulis Adat enggau orang Parisi bejaku enggau iya: “Pengajar, beri meh kami tanda kena nunjukka nuan amat dianjung Petara.”
39 Tang ku iya nyaut: “Kita tu rebak ti jai sereta enda taluk ngagai Petara.* Kita suah amat minta tanda, tang nadai tanda deka diberi ngagai kita kelimpah ari tanda Nabi Jonah.
40 Baka Jonah ke dalam perut ikan ti besai pengelama tiga hari tiga malam, baka nya meh Anak Mensia deka mengkang dalam pendam pengelama tiga hari tiga malam.
41 Maya Hari Pechara, orang Nineweh deka angkat sama enggau orang ke ari rebak tu. Orang Nineweh deka nunjukka penyalah orang ke ari rebak tu, laban orang Nineweh udah nesal ati ke dosa sida, pengudah ninga pesan Jonah. Tang kebendar iya, ba ditu bisi orang ke besai agi ari Jonah.
42 Maya Hari Pechara, kuin ari selatan deka sama angkat enggau orang ke ari rebak tu. Kuin nya deka nunjukka penyalah orang ke ari rebak tu, laban iya datai ari menua ti jauh deka mendingka penalam penemu Solomon. Tang kebendar iya, ba ditu bisi orang ke besai agi ari Solomon.
43 “Lebuh melikat ti jai pansut ari orang, iya bejalai nengah menua ti rangkai ngiga endur alai belelak. Tang iya nadai tetemuka endur nya.
44 Udah nya iya bejaku: ‘Aku deka pulai baru ngagai rumah ti udah ditinggalka aku.’ Lebuh iya datai ba rumah nya, iya nemu rumah nya puang, udah disapu sereta diias enggau manah.
45 Iya pan mupuk, lalu mai tujuh iku melikat ti jai agi ari iya empu. Sida tama lalu diau dalam orang nya. Nya alai, pendiau orang nya nyadi jai agi ari ti keterubah. Baka nya meh utai ti deka nyadi ba rebak ti jai tu.”
46 Lebuh Jesus benung bejaku ngagai orang mayuh, indai enggau sida menyadi lelaki iya bediri ba luar. Sida deka bejaku enggau iya.
47 Nya alai, bisi orang madah ngagai iya: “Indai enggau sida menyadi lelaki nuan bisi ba luar. Sida deka bejaku enggau nuan.”
48 Tang ku Jesus nyaut: “Sapa indai aku, lalu sapa bala menyadi aku?”
49 Jesus ngunjurka jari iya ngagai bala murid iya lalu bejaku: “Peda! Sida tu meh indai aku enggau bala menyadi aku!
50 Barang sapa ngereja peneka Apai aku ti ba serega, nya meh menyadi lelaki, menyadi indu, enggau indai aku.”
Nota Kaki
^ Tauka “ke sakit bajung.”
^ Gelar ti diberi ngagai Sitan.
^ Tauka “sedar.”
^ Tauka “jeman; sistem dunya.” Peda Penerang Leka Jaku, “Sistem dunya.”
^ Jaku Asal, “sereta butang.”
