Pemungkal 18:1-33
18 Udah nya, Jehovah ngayanka Diri ngagai Abraham semak pun kayu ti besai ba Mamre. Abraham benung duduk ba penama ngagai langkau kain iya. Maya nya, hari benung angat amat.
2 Iya malik lalu tepedaka tiga iku lelaki benung bediri enda jauh ari iya. Lebuh iya meda sida, iya belanda mansang ngagai sida lalu besugang ngendukka pala.
3 Udah nya iya bejaku: “Jehovah, enti Nuan lantang ati enggau aku, anang semina mansa aja. Tang ngetu meh ba langkau kain aku.
4 Awakka aku ngambi mimit ai kena masu kaki kita tiga. Udah nya, berehat meh ba baruh pun kayu.
5 Laban kita udah kitu, awakka aku meri kita roti ngambika kita kering lalu ulih neruska pejalai kita.” Ku sida nyaut: “Au, kereja aja meh utai ku nuan nya.”
6 Abraham lalu beguai-guai tama ngagai langkau kain iya, lalu bejaku enggau Sarah: “Jampat! Ambi tiga seah* tepung alus. Nyakka adunan tepung nya, lalu gaga roti.”
7 Udah nya, Abraham belanda mansang ngagai raban jelu tupi iya, lalu ngambi siku anak sapi lelaki ke manah sereta ke bisi dagin ti lembut. Iya meri anak sapi nya ngagai orang gaji iya. Orang gaji iya jejampat mela anak sapi nya lalu manduk iya.
8 Udah nya Abraham ngambi mentega, ai tusu, sereta dagin anak sapi ke udah dipanduk. Iya ngenahka semua nya ngagai sida. Lebuh sida benung makai ba baruh pun kayu, Abraham bediri semak sida.
9 Sida nanya Abraham: “Dini bini nuan Sarah?” Ku Abraham nyaut: “Dalam langkau kain.”
10 Siku ari sida lalu bejaku: “Taun depan, ba maya tu, aku deka datai baru. Lalu bini nuan Sarah deka bisi siku anak lelaki.” Sarah benung mendingka lelaki nya bejaku ari belakang, ba penama langkau kain.
11 Abraham enggau Sarah udah tuai amat umur, lalu Sarah udah kelalu tuai deka ngadaka anak.*
12 Nya alai Sarah ketawa lalu bejaku dalam ati: “Tuan aku udah tuai, lalu aku empu pan udah tuai. Kati aku agi bisi peluang ngasaika pengaga ati bisi anak?”
13 Udah nya Jehovah bejaku ngagai Abraham: “Nama kebuah Sarah ketawa lalu madahka, ‘Enda patut aku ke udah tuai tu agi ulih beranak?’
14 Kati bisi nama-nama utai ke enda ulih dikereja Jehovah? Taun depan, ba maya tu, Aku deka datai baru. Lalu Sarah deka bisi siku anak lelaki.”
15 Tang ketegal Sarah takut, iya enggai ngaku diri udah ketawa. Ku iya: “Nadai aku ketawa!” Tang ku Petara nyaut: “Bisi nuan ketawa.”
16 Lebuh tiga iku lelaki nya mupuk, Abraham bejalai enggau sida nyentuk ngagai sida datai ba endur alai sida ulih meda Sodom.
17 Ku Jehovah bejaku: “Aku deka madah ngagai Abraham utai ke deka digaga Aku.
18 Peturun Abraham tentu deka nyadi bansa ti besai sereta kering, lalu semua bansa ba dunya deka bulih berekat* nengah Abraham.
19 Aku udah ngelala iya lalu pechaya iya deka ngasuh bala anak iya enggau semua peturun iya ngasika pesan Aku, Jehovah, lalu ngereja utai ti ngena sereta adil. Enggau nya, Aku, Jehovah, ulih ngamatka utai ke udah disemaya Aku ngagai Abraham.”
20 Udah nya Jehovah bejaku: “Aku udah ninga mayuh jaku putap pasal Sodom enggau Gomorah, lalu dosa dua iti kuta nya amat besai!
21 Nya alai, Aku deka kin kena nentuka sekalika utai nya amat tauka enda.”
22 Udah nya, dua iku ari lelaki nya mupuk ngagai Sodom, tang Jehovah agi enggau Abraham.
23 Abraham mansang ngagai Petara lalu nanya: “Amat Nuan deka munuh orang ke nadai penyalah sama enggau orang ke jai?
24 Enti sema 50 iku orang ke nadai penyalah bisi dalam kuta nya, kati Nuan agi ka munuh semua orang dalam kuta nya? Kati Nuan amat enggai ngampunka kuta nya, taja pan bisi 50 iku orang ke nadai penyalah ba dia?
25 Enda patut Nuan deka munuh orang ke nadai penyalah sama enggau orang ke jai. Enti pia, nadai bida entara orang ke nadai penyalah enggau orang ke jai. Nuan tentu enggai ngereja utai ke baka nya. Nuan Hakim ba serata dunya. Tentu Nuan deka ngakim enggau adil.”
26 Ku Jehovah nyaut: “Enti sema Aku bisi tetemuka 50 iku orang ke nadai penyalah ba Sodom, Aku deka ngampunka semua orang ba kuta nya ketegal sida.”
27 Abraham bejaku baru: “Jehovah, taja pan aku tu debu enggau amau, awakka aku terus bejaku enggau Nuan.
28 Baka ni enti bisi 45 iku orang aja ke nadai penyalah ba kuta nya? Kati Nuan agi deka nganchurka semua kuta nya, laban sida nyau kurang lima iku?” Ku Petara nyaut: “Enda Aku ngereja nya enti Aku bisi tetemuka 45 iku orang ke nadai penyalah ba dia.”
29 Abraham bejaku baru: “Baka ni enti 40 iku aja?” Ku Petara nyaut: “Enda Aku ngereja nya ketegal 40 iku orang nya.”
30 Ku Abraham agi: “Jehovah, anang ringat, tang awakka aku terus bejaku. Baka ni enti sema 30 iku aja?” Disaut Petara: “Enda Aku ngereja nya enti Aku tetemuka 30 iku orang nya.”
31 Ku Abraham baru: “Jehovah, awakka aku terus bejaku. Baka ni enti sema 20 iku aja?” Disaut Petara: “Enda Aku ngereja nya ketegal 20 iku orang nya.”
32 Pengujung iya, ku Abraham: “Jehovah, anang meh ringat. Awakka aku bejaku sekali da agi. Baka ni enti sema 10 iku aja?” Disaut Petara: “Enda Aku ngereja nya ketegal 10 iku orang nya.”
33 Pengudah bejaku enggau Abraham, Jehovah pan mupuk. Abraham mega mupuk pulai.
Nota Kaki
^ Peda Rujukan B14.
^ Iya nya, badu agi datai kain.
^ Tauka “deka ngulihka berekat ke diri empu.”
