Pilipi 4:1-23
4 Bala menyadi ti dikerinduka aku, aku lelengau amat ke kita. Kita meh pengaga ati aku sereta makota aku. Aku meransang kita ngambika mengkang tetap ati ngagai Tuan kitai.
2 Aku meransang Eudia enggau Sintike ke gawa ke Tuan enggau runding ti sama.
3 Kita ke tetap ati begulai gawa enggau aku, aku mega minta kita ngambika terus nulung seduai iya ke udah sama gawa enggau aku ngerembaika Berita Manah, begulai enggau Klemen sereta sida ke bukai ke sama gawa enggau aku. Nama sida bisi ditulis ba bup pengidup.
4 Awakka kita seruran gaga ati ketegal Tuan kitai. Sekali agi aku madahka, Gaga ati meh kita!
5 Awakka semua orang nemu, kita ukai orang ke enda masuk akal. Tuan kitai nyau semak.
6 Anang irauka nama-nama utai, tang seruran meh besampi ngagai Petara, bebendar meh minta iring ari Iya pasal semua utai, sereta seruran beterima kasih ngagai Iya.
7 Enggau nya, pengelantang ari Petara ke ngelui ari utai ke ulih dimeretika kitai deka nyaga ati enggau runding kita nengah Jesus Kristus.
8 Ke pengujung iya, bala menyadi, seruran meh berundingka utai ti bendar, utai ti patut diperatika, ti lurus, ti tuchi, ti dikerinduka, ti patut dipebasa, ti manah, sereta ti patut dipuji.
9 Kereja meh utai ke diterima, ke didinga, ke dipeda, sereta ke dipelajarka kita ari aku. Enggau nya, Petara pengelantang deka merekatka kita.
10 Aku balat gaga ati sereta beterima kasih ngagai Tuan kitai, laban kita sekali agi ibuhka aku. Taja pan kita seruran ibuhka aku, tang kita nadai peluang ngayanka nya.
11 Aku nyebut tu ukai ketegal aku begunaka tulung. Aku udah belajarka chara bepuas ati enggau utai ke dikemisi aku, enda ngira nama utai ke ditapi aku.
12 Aku nemu baka ni asai lebuh suntuk tauka lebuh bepemisi. Enda ngira nama utai ke ditapi aku, aku udah nemu resia baka ni aku ulih puas ati, sekalika maya aku kenyang tauka lapar, maya aku mayuh utai tauka nadai utai.
13 Aku ulih napi semua utai ketegal pengering ke diberi Petara ngagai aku.
14 Taja pia, kita amat manah ati, laban nulung aku lebuh aku merinsa.
15 Kebendar iya, kita orang Pilipi nemu, lebuh aku mupuk ari Masedonia, pengudah kita keterubah iya nemu pasal Berita Manah, semina raban gempuru kita aja meh ke nulung aku.
16 Lebuh aku ba Tesalonika, kita ngirumka utai ke diguna aku, ukai semina sekali, tang dua kali.
17 Aku ukai ngarapka diri nerima utai ke diberi kita, tang aku ngarapka kita bulih berekat ketegal kita ke rindu meri utai.
18 Diatu, aku udah bisi semua utai ke diguna aku, indah lebih ari chukup. Ati aku berasai amat puas pengudah nerima utai ke dikirumka kita ngagai aku nengah Epafroditus. Utai ke diberi kita nya baka pemeri ti bebau rengut, ti ngelantangka ati Petara.
19 Nya alai, Petara aku deka ngena pengaya Iya ti bemulia, nyediaka semua utai ke diguna kita nengah Jesus Kristus.
20 Awakka Petara enggau Apai kitai dimuliaka belama iya. Amin.
21 Kirumka salam aku ngagai semua nembiak Petara, ke beserakup enggau Jesus Kristus. Bala menyadi ke enggau aku mega ngirumka salam sida ngagai kita.
22 Semua nembiak Petara, kelebih agi sida ke diau ba istana raja Rome* ngirumka salam sida ngagai kita.
23 Awakka runding enggau ulah* ke diayanka kita diberekat enggau pemanah ati Tuan Jesus Kristus ti besai.
