Surat Kereja Rasul 10:1-48
10 Ba Kaisaria, bisi siku lelaki ke benama Kornelius. Iya siku pemesai soldadu* dalam raban soldadu Italia.*
2 Iya nangika Petara, lalu nyembah Petara sama enggau semua sida sebilik. Iya selalu nulung orang ke seranta sereta seruran bebendar besampi ngagai Petara.
3 Nyadi sekali, kira-kira pukul tiga ngalih hari,* Kornelius bulih siti genera. Iya enggau terang meda melikat Petara datai ngagai iya lalu bejaku: “Kornelius!”
4 Enggau ati ti balat takut, Kornelius merening ngagai melikat nya lalu nanya: “Nama utai, Tuan?” Melikat nya nyaut: “Petara udah ningaka sampi nuan, lalu Iya rinduka nuan. Iya udah meda baka ni nuan nulung orang ke seranta.
5 Diatu, asuh orang ngagai Jopa, lalu mai Simon ke mega dikumbai Peter datai ngagai nuan.
6 Peter diau ba rumah siku tukang samak* ke benama Simon. Rumah Simon ba tebing tasik.”
7 Pengudah bejaku munyi nya, melikat nya pan mupuk. Kornelius lalu ngangauka dua iku ulun iya enggau siku soldadu ke nangika Petara ari bala orang ke bekereja ke iya.
8 Kornelius madahka semua utai ti udah nyadi nya ngagai sida, lalu ngasuh sida ngagai Jopa.
9 Hari siti, lebuh sida agi ba rantau jalai lalu nyauka datai ba Jopa, Peter niki ke atas perabung* rumah deka besampi. Maya nya, kira-kira pukul 12 tengah hari.*
10 Iya lapar amat lalu deka makai. Lebuh nganti pemakai disediaka, iya bulih siti genera.
11 Iya meda langit tebuka, lalu utai ke baka kain linin ti besai nurun ke dunya. Keempat-empat ujung kain nya baka ke dipegai.
12 Ba dalam kain nya, bisi semua bansa jelu ke bekaki empat, jelu ke ngerayap ba dunya, sereta burung ba langit.
13 Lalu bisi nyawa bejaku ngagai iya: “Peter, angkat nuan. Sayat lalu empa jelu nya.”
14 Tang ku Peter nyaut: “Enggai aku, Tuan. Aku enda kala makai utai ti kamah tauka enda tuchi.”
15 Tang nyawa nya bejaku kedua kali ngagai iya: “Badu agi ngumbai utai ti udah dituchi Petara nya, enda tuchi.”
16 Nyawa nya bejaku ketiga kali, lalu kain nya dibai niki ke langit tekala nya.
17 Peter enda nemu reti genera nya, lalu iya charut runding. Maya nya mega, pengudah nanya dini alai rumah Simon, orang ke dianjung Kornelius udah bediri ba mua pintu.
18 Sida ngangauka orang ke bempu rumah, lalu nanya iya sekalika orang ke benama Simon Peter agi diau ba rumah iya tauka enda.
19 Lebuh Peter agi berundingka genera nya, kuasa kudus Petara lalu bejaku: “Peda nuan! Bisi tiga iku orang benung ngiga nuan.
20 Angkat lalu nurun ke baruh. Titihka sida. Anang kakang ati. Aku meh ke nganjung sida.”
21 Peter pan nurun ke baruh, lalu bejaku ngagai sida: “Aku meh orang ke benung digiga kita. Nama pejalai kita kitu?”
22 Ku sida iya nyaut: “Nengah melikat ti kudus, Petara udah ngasuh Kornelius mai nuan ngagai rumah iya, ngambika iya ulih ninga utai ke deka dipadahka nuan. Kornelius nya siku pemesai soldadu ke ngereja utai ti lurus, nangika Petara, lalu iya dipuji semua orang Judah.”
23 Peter pan mai sida tama, lalu ngasuh sida bemalam ba dia.
Hari siti, Peter angkat lalu mupuk enggau sida. Beberapa iku menyadi ari Jopa mega mupuk enggau iya.
24 Sehari udah nya, iya datai ba Kaisaria. Kornelius benung nganti penatai sida, lalu iya udah mai kaban belayan enggau kaban rapat iya datai.
25 Lebuh Peter datai, Kornelius nyambut penatai iya. Iya besugang ba kaki Peter.
26 Tang Peter nulung iya bediri lalu bejaku: “Angkat nuan. Aku tu pan mensia.”
27 Lebuh bejaku enggau Kornelius, Peter tama lalu meda mayuh orang udah begelumu ba dia.
28 Peter bejaku ngagai sida: “Kita endang udah nemu, orang Judah ngelanggar adat, enti sida nemuai tauka begulai enggau orang bansa bukai. Tang Petara udah nunjukka, aku enda tau ngumbai sapa-sapa pan kamah tauka enda tuchi.
29 Nya alai, aku enda kakang lebuh kita ngasuh aku datai. Nyadi, aku deka nemu, nama kebuah aku diasuh datai?”
30 Kornelius nyaut: “Empat hari ti udah, aku benung besampi ba rumah, kira-kira pukul tiga ngalih hari.* Maya nya, siku lelaki ayan ba mua aku. Gari iya beperenching.
31 Iya madahka: ‘Kornelius, Petara udah ningaka sampi nuan, lalu Iya rinduka nuan. Iya udah meda baka ni nuan nulung orang ke seranta.
32 Asuh beberapa iku orang ngagai Jopa, lalu mai Simon ke mega dikumbai Peter datai ngagai nuan. Peter diau ba rumah siku tukang samak ke benama Simon. Rumah Simon ba tebing tasik.’
33 Nya kebuah aku beguai ngasuh orang mai nuan datai kitu, lalu nuan amat manah laban deka datai. Diatu, semua kami begelumu ba mua Petara, ngambika ninga semua utai ke diasuh Jehovah sebut nuan ngagai kami.”
34 Peter lalu bejaku: “Diatu, baru aku amat nemu, Petara enda bepilih mata.
35 Semua orang ke nangika Petara sereta ngereja utai ti ngena, enda ngira nama bansa sida, endang diterima Petara.
36 Petara udah madahka Berita Manah pasal bebaik enggau Iya ngagai orang Israel nengah Jesus Kristus, Tuan semua orang.
37 Kita semua endang udah nemu, pengudah baptisa ke ditusui John, bisi siti pekara ke suah disebut orang mayuh berengkah ari Galili nyentuk ngagai serata Judea,
38 iya nya pasal Jesus ke datai ari Nasaret. Petara udah milih* Jesus ngena kuasa kudus, lalu meri iya pengering. Ketegal Petara bisi enggau iya, iya ulih ngagai serata endur ngereja utai ti manah, lalu ngeraika semua orang ke diperinsa Sitan.*
39 Kami tu saksi ke semua utai ti udah digaga iya ba menua orang Judah enggau ba Jerusalem. Tang orang Judah munuh iya, lebuh sida mantang iya ba tiang.*
40 Tang ba hari ti ketiga, Petara ngidupka iya baru ngambika orang ulih meda iya.
41 Taja pia, ukai semua orang ulih meda iya. Semina kami ke udah meda iya, iya nya bala saksi ke udah dipilih Petara dulu. Kami meh ke udah begulai makai sereta ngirup enggau iya, pengudah iya diidupka baru ari mati.
42 Jesus mega ngasuh kami meri saksi enggau silik, lalu madah ngagai bansa kami pasal iya ke udah dipilih Petara nyadi hakim ke orang ti idup enggau ke orang ti mati.
43 Semua nabi meri saksi pasal iya, ngambika dosa semua orang ke arapka iya ulih diampunka nengah nama iya.”
44 Lebuh Peter agi benung bejaku pasal pekara nya, semua orang ke ninga jaku Petara ba dia nerima kuasa kudus Petara.
45 Bala murid Jesus* ke udah besunat,* ke datai enggau Peter, iran ati laban pemeri Petara ti pechuma, iya nya kuasa kudus Iya mega diberi ngagai orang ke ari bansa bukai.
46 Sida ninga semua orang nya bejaku ngena bansa jaku bukai sereta ngemesaika Petara. Peter lalu bejaku:
47 “Semua orang tu udah nerima kuasa kudus Petara baka kitai. Ulih orang nagang sida ari dibaptisa ngena ai?”
48 Nya alai, Peter ngasuh sida dibaptisa dalam nama Jesus Kristus. Udah nya, sida minta Peter diau enggau sida beberapa hari.
Nota Kaki
^ Tauka “pemesai soldadu ke megai 100 iku soldadu.”
^ Raban soldadu Rome ke bisi 600 iku soldadu.
^ Jaku Asal, “jam kesemilan.”
^ Orang ke ngaduka kulit jelu ngambika kulit nya tau dikena ngaga utai bukai.
^ Maya nya, mayuh rumah orang bisi perabung ti rata. Ba dia, sida ulih ngereja mayuh macham pengawa.
^ Jaku Asal, “jam keenam.”
^ Jaku Asal, “jam kesemilan.”
^ Jaku Asal, “nata.” Peda Penerang Leka Jaku, “Tata.”
^ Jaku Gerika, “di·a′bo·los.” Leka jaku tu dikena ba orang ke ngenyaika nama manah orang bukai.
^ Tauka “pun kayu.”
^ Tauka “Sida ke tetap ati.”
^ Tauka “ditutus.”
