Surat Kereja Rasul 17:1-34
17 Sida neruska pejalai nengah Ampipolis enggau Apolonia lalu datai ba Tesalonika. Ba dia, bisi balai gempuru orang Judah.
2 Baka selama, Paul tama ngagai balai gempuru. Pengelama tiga Hari Sabat bejurut, iya besilih penemu enggau orang ba dia ngena ayat Bup Kudus.
3 Iya nerangka ngagai sida sereta meri bukti ari ayat Bup Kudus kena nunjukka Kristus patut merinsa lalu diidupka baru ari mati. Paul madah ngagai sida: “Jesus ke ditusui aku ngagai kita nya, Kristus.”
4 Ketegal nya, sekeda ari bala sida, mayuh orang Gerika ke nyembah Petara, enggau mayuh bala indu ke tinggi pangkat, arap lalu begulai enggau Paul seduai Silas.
5 Tang orang Judah chemburu. Nya alai, sida ngempuruka bala orang jai ke segau-segau ba sebelah pasar. Pengudah sida ngasuh chukup mayuh orang begelumu, sida ngaga penyarut ba nengeri nya. Sida nyerang rumah Jason, laban deka mai Paul enggau Silas ngagai orang ke begelumu nya.
6 Lebuh sida enda tetemuka Paul enggau Silas, sida ngirit Jason enggau beberapa iku menyadi ngagai bala pemerintah nengeri nya lalu manjung: “Dua iku lelaki ke ngaga pengachau ba serata endur udah datai kitu,
7 lalu Jason udah nerima seduai iya nyadi temuai. Semua sida tu ngelaban perintah raja Rome.* Sida madahka bisi siku da agi raja, iya nya Jesus.”
8 Orang mayuh enggau bala pemerintah nengeri nya lalu begau lebuh sida ninga jaku nya.
9 Tang Jason enggau bala menyadi ke bukai dilepaska pengudah sida mayar duit jamin.
10 Malam nya mega, bala menyadi nganjung Paul enggau Silas ngagai Beria. Sepengudah datai ba din, seduai iya tama ngagai balai gempuru orang Judah.
11 Runding orang ba dia tebuka agi ari runding orang ba Tesalonika, laban sida keran agi deka nerima jaku Petara. Tiap hari, sida bejimat mansik ayat Bup Kudus kena nentuka utai ke didinga sida nya amat tauka enda.
12 Ketegal nya, mayuh ari sida lalu arap. Pia mega enggau bala sida ke lelaki enggau ke indu ke tinggi pangkat ari bansa Gerika.
13 Tang lebuh orang Judah ari Tesalonika nemu Paul ngerembaika jaku Petara ba Beria, sida mansang kin ngasut* orang lalu ngaga pengachau.
14 Nya alai, bala menyadi ba dia beguai nganjung Paul ngagai tebing tasik. Tang Silas enggau Timoti mengkang ba Beria.
15 Bala menyadi ke enggau Paul mai iya nyentuk ngagai Atens. Lebuh sida udah nerima pesan ari Paul ngasuh Silas seduai Timoti datai ngagai iya ba Atens enggau naka pengelengkas, sida iya pan lalu mupuk.
16 Lebuh Paul benung nganti seduai iya ba Atens, ati iya balat tusah meda nengeri nya penuh laban engkeramba.
17 Nya alai, iya mansang ngagai balai gempuru lalu besilih penemu enggau orang Judah sereta orang bukai ke nyembah Petara. Ninting hari, iya mega ngereja nya ngagai sapa-sapa ke ditemu iya ba pasar.
18 Tang beberapa iku orang ke nitihka penemu Epikuria enggau Stoik belabuh beserekang* penemu enggau iya. Bisi nya madahka: “Nama utai ke deka dipadahka orang ke ka amat bejaku tu?” Sekeda ke bukai madahka: “Iya baka ke bejaku pasal bala petara bukai.” Sida munyi nya laban Paul ngerembaika Berita Manah pasal Jesus sereta pasal pengangkat ari mati.
19 Nya alai, sida mai iya ngagai Areopagus* lalu madahka: “Ulih kami nemu pasal ajar baru ke dipadahka nuan?
20 Sekeda utai ke disebut nuan nya nyelai didinga kami, lalu kami deka nemu nama reti iya.”
21 Kebendar iya, lebuh nadai pengawa, orang Atens enggau orang asing ke diau ba dia* rindu becherita tauka ninga utai ke baru.
22 Paul bediri ba tengah-tengah Areopagus lalu madahka:
“Orang Atens, aku beratika kita alim amat ba semua pekara. Enti dibandingka enggau orang bukai, kita nangi agi ke mayuh petara.
23 Ambika chunto, lebuh aku bejalai ba nengeri kita, aku beratika utai ke disembah kita, lalu aku mega bisi meda siti alta.* Ba alta nya bisi ditulis: ‘Ke Petara ti Enda Dikelala.’ Nya alai diatu, aku deka madah ngagai kita pasal Petara nya, iya nya Petara ke disembah kita tang enda dikelala kita.
24 Petara ke ngaga dunya enggau semua utai ba dalam dunya, Iya meh Tuan ke merintah langit enggau dunya. Iya enda diau ba rumah sembiang ke digaga mensia.
25 Iya ukai nya baka ke begunaka utai. Iya enda ibuh begunaka mensia ngintu Iya, laban Iya Empu ke meri pengidup enggau seput sereta semua utai ngagai mensia.
26 Ari siku mensia, Iya ngaga semua bansa ngambika sida diau ba serata dunya. Iya mega netapka maya sereta nentuka sekat endur alai sida diau,
27 ngambika sida bebendar ngiga Petara. Enti sida begama ngiga Iya, sida tentu ulih tetemuka Iya, laban kebendar nya, Iya enda jauh ari kitai siku-siku.
28 Kitai idup, engkebut, sereta bisi ba ditu, ketegal Iya. Baka ke dipadah bala penulis pantun kita, ‘Semua kitai anak Iya.’
29 “Ketegal kitai tu anak Petara, kitai enda tau ngumbai Petara nya baka utai ke digaga ari emas, pirak, tauka batu.
30 Sebedau tu, orang enda ngelala Petara, tang Iya enda nyalahka sida. Diatu, Iya madahka ngagai semua orang ba serata endur pasal sida ke patut nesal ati.
31 Laban Iya udah netapka hari kena ngakim serata dunya enggau lurus nengah siku lelaki ke udah dipilih Iya. Hari nya tentu deka datai, laban Iya udah ngidupka lelaki nya ari mati nyadika jamin ke semua mensia.”
32 Lebuh orang ba dia ninga pasal orang ke mati deka diidupka baru, sekeda ari sida ngeleseka Paul. Tang sekeda ke bukai madahka: “Kami deka ninga nuan bejaku pasal utai tu baru ba maya bukai.”
33 Nya alai, Paul mupuk ninggalka sida.
34 Tang sekeda orang arap lalu nitihka iya. Sida tu nyengkaum siku hakim ari kot Areopagus ke benama Dionisius, siku indu ke benama Damaris, enggau sekeda ke bukai.
Nota Kaki
^ Jaku Gerika, “Kaisar.”
^ Tauka “nyungkak.”
^ Tauka “belaban.”
^ Peda Penerang Leka Jaku.
^ Tauka “ke nemuai kia.”
^ Peda Penerang Leka Jaku.
