Surat Kereja Rasul 25:1-27
25 Tiga hari pengudah Festus datai lalu berengkah merintah ba Judea, iya mupuk ngagai Jerusalem ari Kaisaria.
2 Bala tuai imam enggau bala tuai bansa orang Judah ba dia datai ngagai iya lalu mantaika jaku tuduh sida pasal Paul. Sida bebendar minta Festus
3 berundingka peminta sida ngambika nganjung Paul ngagai Jerusalem. Sida udah ngaga pelan deka ngenyit nyerang Paul lalu munuh iya lebuh iya mansang kin.
4 Tang Festus madahka Paul patut ditan ba Kaisaria, lalu Festus empu deka pulai kin enda lama da agi.
5 Iya madahka: “Manah agi enti bala tuai kita mupuk enggau aku lalu mantaika jaku tuduh kita pasal iya enti iya amat udah ngereja penyalah.”
6 Festus diau ba Jerusalem kira-kira 8 tauka 10 hari da agi, lalu udah nya, iya pulai ngagai Kaisaria. Hari siti, iya duduk ba kerusi hakim lalu ngasuh orang mai Paul tama.
7 Lebuh Paul tama, orang Judah ke datai ari Jerusalem bediri ngelingi iya lalu nuduh iya ngereja mayuh penyalah ti besai, tang sida enda tegigaka bukti kena nunjukka jaku sida nya amat.
8 Paul lalu bejaku ngetanka diri: “Aku nadai ngelanggar Adat orang Judah, lalu aku mega nadai ngereja nama-nama penyalah ke ngelaban raja Rome* tauka Rumah Sembiang.”
9 Ketegal Festus deka ngambi ati orang Judah, nya alai iya nanya Paul: “Kati nuan deka kes nuan dipechara ba Jerusalem?”
10 Ku Paul nyaut: “Aku benung bediri ba mua kerusi hakim raja Rome, lalu ba ditu meh aku patut dipechara. Tuan, nuan empu nemu, aku enda besalah ngagai orang Judah.
11 Enti aku amat udah ngereja penyalah sereta ngereja utai ke tau ngasuh aku diukum bunuh, aku enda minta diri dilepaska ari ukum nya. Tang, enti jaku tuduh sida pasal aku nya nadai bukti, nadai siku pan bisi hak nyerahka aku ngagai sida. Aku deka minta raja Rome ngakim aku!”
12 Pengudah Festus berandau enggau bala penasihat iya,* Festus madahka: “Nuan minta raja Rome ngakim nuan, nya alai raja Rome meh ke deka ngakim nuan.”
13 Beberapa hari udah nya, Raja Agripa enggau Bernis datai ba Kaisaria deka meri basa ngagai Festus.
14 Laban Raja Agripa enggau Bernis diau ba dia beberapa hari, nya alai, Festus madah pasal kes Paul ngagai Raja Agripa. Ku Festus madahka:
“Feliks bisi ninggalka siku lelaki ba jil.
15 Maya aku ba Jerusalem, bala tuai imam enggau bala tuai bansa orang Judah mantaika jaku tuduh pasal iya, lalu minta aku ngukum iya.
16 Tang aku madah ngagai sida, nitihka atur orang Rome, sesiku orang enda tau diukum ngapa sebedau iya diberi peluang bejaku ngetanka diri ba mua orang ke nuduh iya.
17 Nya alai, lebuh sida datai kitu, aku lalu terus duduk ba kerusi hakim hari siti. Aku pan ngasuh orang mai lelaki nya tama.
18 Lebuh sida ke nuduh iya bediri lalu mantaika jaku tuduh sida, aku beratika iya nadai ngereja nama-nama penyai baka ke dijangka aku.
19 Sida semina bekelikuh pasal pengarap sida empu enggau pasal siku lelaki ke benama Jesus. Taja pan lelaki nya udah mati, tang Paul suah madahka lelaki nya agi idup.
20 Laban aku enda nemu baka ni deka mutarka kelikuh sida, nya alai, aku nanya Paul enti iya deka dipechara ba Jerusalem bekaul enggau pekara nya.
21 Tang Paul minta diri ditan nyentuk ke iya bisi pemutus ari raja Rome. Nya alai, aku ngasuh iya ditan nyentuk ngagai maya aku nganjung iya ngagai raja Rome.”
22 Agripa madah ngagai Festus: “Aku deka ninga lelaki nya empu bejaku.” Ku Festus nyaut: “Pagila nuan deka ninga iya bejaku.”
23 Nya alai, hari siti, Agripa enggau Bernis datai lalu mantaika mulia ti besai. Seduai iya tama ngagai endur pechara sama enggau bala ketuai soldadu sereta orang ti tebilang ba nengeri nya. Udah nya, Festus ngasuh orang mai Paul tama.
24 Festus lalu madahka: “Raja Agripa enggau semua kita ke datai, peda kita orang tu. Semua orang Judah ba Jerusalem enggau ba ditu udah rerauh minta ngagai aku ngambika iya dibunuh.
25 Tang aku beratika iya nadai ngereja nama-nama utai ke tau ngasuh iya diukum bunuh. Nya alai, lebuh iya minta diri diakim raja Rome, aku pan mutuska deka nganjung iya ngagai raja Rome.
26 Tang, aku nadai penerang ti betul pasal iya ke ulih ditulis aku ngagai raja Rome.* Nya alai, aku mai iya ngagai semua kita ke datai ba ditu, kelebih agi ngagai nuan, Raja Agripa. Enggau nya, pengudah pechara tu, aku bisi utai ke ulih ditulis aku pasal iya.
27 Laban ba runding aku, aku enda patut nganjung orang ke dijil ngagai Rome enti aku mega enda madahka nama jaku tuduh orang pasal iya.”
