Lebuh Jesus ngintu Pengerami Paska ba Jerusalem kena taun 30 M., iya ngaga mayuh kereja ajih. Asil iya, mayuh orang arapka iya. Nikodimus siku orang Parisi, lalu iya mega siku ari Raban Kunsil Orang Judah. Iya berasai kagum enggau Jesus. Iya deka belajar mayuh agi, nya alai iya betemu enggau Jesus maya malam hari. Iya takut enggaika tuai bansa orang Judah ke bukai enggai meda iya enti sida nemu iya betemu enggau Jesus.

Nikodimus madahka: “Rabbi, kami nemu nuan pengajar ke dianjung Petara, laban nadai orang ke ulih ngereja pengawa ajih baka ke digaga nuan, enti Petara nadai enggau orang nya.” Jesus madah ngagai Nikodimus, barang sapa ke deka tama ngagai Perintah Petara patut “diadaka baru.”—John 3:2, 3.

Baka ni sesiku orang deka diadaka baru? Ku Nikodimus nanya Jesus: “Ulih iya tama ngagai kandung indai iya lalu diadaka baru?”—John 3:4.

Ukai nya reti ku Jesus. Nya alai Jesus nyaut: “Nadai orang ulih tama ngagai Perintah Petara enti iya enda diadaka ari ai enggau kuasa kudus Petara.” (John 3:5) Lebuh Jesus dibaptisa, kuasa kudus Petara nurun ngagai iya, lalu iya “diadaka ari ai enggau kuasa kudus.” Maya nya, bisi nyawa ari serega madahka: “Tu Anak ke dikesayauka Aku. Aku gaga ati ke iya.” (Matthew 3:16, 17) Enggau chara tu, Petara madahka Jesus anak rohani Iya ke ulih tama ngagai Perintah Petara ba serega. Pengudah nya, kena Pentikos 33 M., kuasa kudus Petara diberi ngagai orang bukai ke udah dibaptisa. Nya alai, sida nyadi anak Petara ke dipilih kuasa kudus.—Surat Kereja Rasul 2:1-4.

Nikodimus enda meretika utai ke diajar Jesus pasal Perintah Petara. Nyadi Jesus nerangka mayuh agi pasal peranan iya ke nyadi Anak Petara ti dianjung nyadi mensia ba dunya. Ku Jesus madah: “Baka Moses ke nuatka ular ba menua puang, baka nya meh Anak Mensia patut dituatka, ngambika semua orang ke arapka iya tau bulih pengidup ti meruan belama iya.”—John 3:14, 15.

Suba, orang Israel ke dipantuk ular ti bisa patut merening ngagai ular temaga ke digaga Moses ngambika ulih gerai. (Penyampau 21:9) Sama mega, semua orang patut arapka Anak Petara. Enggau chara nya, sida ulih dilepaska ari dosa enggau pemati lalu ulih idup meruan belama iya. Jesus nunjukka pengerindu Jehovah dalam pekara tu. Ku iya madah ngagai Nikodimus: “Laban Petara balat rinduka dunya tu, nya alai Iya meri Anak tunggal Iya, ngambika genap iku orang ke arapka Anak Iya enda dipunaska tang bulih pengidup ti meruan belama iya.” (John 3:16) Enggau chara tu, Jesus nunjukka iya Penyelamat semua mensia. Utai tu nyadi kira-kira enam bulan pengudah iya berengkah ngereja pengawa nginjil.

Jesus madah ngagai Nikodimus: “Petara enda ngirumka Anak Iya ke dunya ngambika ngakim dunya.” Reti iya Jesus ukai dianjung kena ngukum, sereta ngemunaska semua mensia. Tang, nitihka dipadahka Jesus, iya dianjung “kena nyelamatka dunya nengah iya.”—John 3:17.

 Nikodimus betemu enggau Jesus maya malam hari laban iya berasai takut. Peratika, Jesus ngujungka randau iya enggau nyebut pasal penampak: “Taja pan penampak [iya nya Jesus nengah chara idup sereta ajar iya] udah tama ke dunya, tang orang rinduka pemetang, ukai penampak, laban sida ngereja utai ti jai. Ketegal nya meh sida diakim. Barang sapa ke selalu ngereja utai ti jai begedika penampak, lalu iya enda datai ngagai penampak, ngambika pengawa iya enda ditemu orang. Tang barang sapa ke ngereja utai ti lurus datai ngagai penampak, ngambika pengawa iya nunjukka iya ngereja utai sejalai enggau peneka Petara.”—John 3:19-21.

Nikodimus udah nemu peranan Jesus dalam ngereja peneka Petara. Tang, Nikodimus empu patut milih nama deka digaga iya.