Kenyau ari jeman kelia, Jehovah dekaka genap iti ruang bilik nyediaka awak endur begulai, ngeringka pengarap sida, sereta ngeringka kaul enggau diri sebilik. (Ulang Adat 6:6, 7) Nya kebuah Saksi-Saksi Jehovah nyediaka siti awak dalam seminggu kena belajarka Bup Kudus ba diri sebilik—berandau pasal utai ti diguna ba pengarap nitihka ungkup diri sebilik, sereta dipejalaika enggau chara ti ngelantangka ati. Taja pan nuan diau kediri, nuan ulih ngena awak tu ngaga projek belajarka Bup Kudus ke dipilih nuan empu.

Tu meh maya semak agi ngagai Jehovah. ‘Datai semak ngagai Petara, lalu Iya deka datai semak ngagai kita.’ (James 4:8) Kitai ulih ngelala Jehovah enggau manah agi enti kitai belajarka Bup Kudus pasal personaliti Iya enggau utai ti dikereja Iya. Chara ti senang kena nuan ngepunka pengawa belajarka Bup Kudus ba diri sebilik iya nya sama macha ayat Bup Kudus nitihka jadual ke bisi ba Gempuru Pengidup enggau Pengawa Kristian. Ayat Bup Kudus ke dibacha tu ulih dibagi ngagai tiap iku diri sebilik, lalu udah nya semua ulih madahka utai ti dipelajarka ari ayat nya.

Tu meh maya semak agi enggau diri sebilik. Laki bini, pia mega apai indai enggau anak, ngeringka kaul sida enggau pangan diri maya sida belajarka Bup Kudus ba diri sebilik. Pengawa tu patut dipejalaika enggau ati ti gaga, bisi pemaik, sereta hari ti dianti-anti diri sebilik. Bepanggai ba umur anak sida, apai indai ulih milih topik ti beguna, baka ngena utai ke bisi ba Menara Jaga, litaricha bukai tauka utai ke bisi ba laman web kitai, jw.org. Nuan ulih berandau pasal penanggul ke ditapi anak nuan ba sekula, lalu baka ni penanggul tu ulih diputarka. Peda meh program Berita JW (tv.mr1310.com/#iba), lalu berandauka nya enggau diri sebilik. Pia mega, nuan ulih belatihka lagu ti deka dikena ba gempuru. Udah abis belajarka Bup Kudus ba diri sebilik, nuan ulih nyediaka pemakai ke mimit.

Awak ke diungkupka ninting minggu endur nyembah Jehovah ulih nulung diri sebilik rindu belajarka Jaku Petara, lalu Iya deka meri berekat ti besai ke pengawa nuan.—Masmur 1:1-3.

• Nama kebuah kami nyediaka awak endur belajarka Bup Kudus ba diri sebilik?

• Baka ni apai indai ulih ngaga pengawa tu ngambika ngerinduka ati diri sebilik?