1-2. Nama kebuah Jehovah muka jalai ngambika kitai ulih nyadi sebagi ari ruang bilik Iya? Baka ni Iya ngereja nya?

 ENDANG peluang ti chukup badas lebuh Jehovah mai kitai nyadi sebagi ari ruang bilik Iya. Ruang bilik kitai tu nyengkaum sida ke udah nyerahka diri ngagai Petara sereta arapka tebus Jesus Kristus. Kitai ruang bilik ti gaga ati! Kitai rindu enggau pengidup kitai ke bisi tuju. Lalu kitai gaga enggau pengadang kitai ke deka idup meruan belama iya, enda ngira nya ba serega tauka ba dunya Paradais.

² Ketegal Jehovah amat sayauka kitai, Iya muka jalai ngambika kitai ulih nyadi sebagi ari ruang bilik Iya. Kena ngereja tu, Iya patut ngereja siti utai ti besai. (Jhn. 3:16) Kitai “dibeli ngena rega ti besai.” (1 Kor. 6:20) Nengah tebus Jesus Kristus, kitai nyau ulih semak enggau Jehovah. Taja pan Iya pemadu besai ba dunya raya, tang kitai ulih ngangauka Iya, Apai. Lalu baka ke udah dipelajar kitai ba artikel sebedau tu, Iya Apai ti pemadu badas.

 3. Lebuh kitai berundingka semua utai manah ke udah digaga Jehovah, nama engka ditanya kitai? (Peda mega kutak “ Kati Jehovah Ibuhka Aku?”)

³ Kitai engka baka seiku penulis Bup Kudus ke nanya: ‘Nama utai ti tau diberi aku ngagai Jehovah kena malas semua pemanah Iya enggau aku?’ (Mas. 116:12) Ke amat nya, kitai enda ulih malas pemanah Iya. Tang penyayau Iya ke kitai meransang kitai sayauka Iya. Rasul John madahka: ‘Kitai rindu laban Petara udah dulu rinduka kitai.’ (1 Jhn. 4:19) Baka ni chara kitai ulih ngayanka penyayau ngagai Apai kitai, Jehovah?

 4. Nitihka James 4:8, nama kebuah kitai patut bebendar nguji semak ngagai Jehovah?

⁴ Jehovah deka kitai semak ngagai Iya sereta bejaku enggau Iya. (Bacha James 4:8.) Iya meransang kitai “majak besampi,” lalu Iya seruran mendingka sampi kitai. (Rom. 12:12) Iya enda kala lelak ninga sampi kitai. Kitai nunjukka diri ningaka Iya lebuh macha Bup Kudus sereta litaricha kitai ke ulih nulung kitai meretika Bup Kudus. Kitai mega ningaka Iya lebuh betatika utai ke dipadah ba gempuru Kristian. Anak deka mengkang semak ngagai apai indai enti sida selalu berandau enggau pangan diri. Pia mega, enti kitai suah berandau enggau Jehovah, tu ngasuh kitai mengkang semak ngagai Iya.

 5. Baka ni kitai ulih ngasuh sampi kitai diterima Jehovah?

⁵ Perundingka pasal sampi nuan. Jehovah deka kitai madahka semua utai ke bisi dalam ati kitai nengah sampi. (Mas. 62:8) Kitai ulih nanya diri empu: ‘Kati sampi aku datai ari ati tauka semina baka leka jaku ke udah ditulis aja?’ Endang amat, nuan sayau bendar ke Jehovah, lalu deka kaul seduai mengkang tegap. Nya alai, nuan patut suah bejaku enggau Iya. Padah ngagai Iya semua utai ke diasaika nuan, nyengkaum utai ke ngasuh nuan gaga sereta tusah ati. Pechaya meh, Iya ulih nulung nuan.

 6. Nama patut digaga kitai ngambika mengkang semak ngagai Jehovah?

⁶ Enti kitai deka mengkang semak ngagai Jehovah, kitai patut seruran ngayanka ulah ti beterima kasih. Kitai tentu setuju enggau utai ku pemasmur ke nyebut: ‘Nuan udah ngereja mayuh macham utai ke kami, O Jehovah Petara kami. Nadai orang sebaka enggau Nuan! Nuan udah ngaga mayuh bengkah pelan ti manah ke kami. Aku enda ulih ngenang semua pelan nya, laban pelan nya kelalu mayuh!’ (Mas. 40:5) Kitai ukai semina berasai beterima kasih. Kitai mega deka ngayanka diri beterima kasih ngagai Jehovah nengah jaku sereta ulah kitai. Tu ngasuh kitai bebida ari orang ba dunya tu. Kitai diau ba dunya ke alai orang enda beterima kasih ke utai ti digaga Petara ke sida. Indah tu kelai ke nunjukka kitai benung diau ba “hari ti penudi” ke alai orang enda nemu beterima kasih. (2 Tim. 3:1, 2) Kitai enggai baka sida!

 7. Nama diasuh Jehovah gaga kitai, lalu nama kebuah?

⁷ Apai indai enggai anak sida belaya enggau pangan diri. Sida deka anak sida begulai manah. Pia mega, Jehovah deka semua anak Iya begulai manah enggau pangan diri. Indah penyayau ke diayanka kitai ngagai bala menyadi Kristian kitai nunjukka kitai orang Kristian ti bendar. (Jhn. 13:35) Kitai setuju enggau utai ke diasaika pemasmur ke nulis: ‘Naka meh pemanah, naka meh penyamai lebuh nembiak Petara diau seati enggau pangan diri!’ (Mas. 133:1) Lebuh kitai sayauka bala menyadi, kitai nunjukka diri sayauka Jehovah. (1 Jhn. 4:20) Naka meh pengaga ati kitai laban ulih nyadi sebagi ari ruang bilik Jehovah ke “nelap enggau pangan diri, siru enggau pangan diri”!—Eps. 4:32.

 8. Nitihka 1 John 5:3, nama batang kebuah kitai deka ngasika Jehovah?

⁸ Jehovah deka bala anak ngasika apai indai sida. Lalu Iya deka kitai ngasika Iya. (Eps. 6:1) Kitai endang patut ngasi laban Iya Apai ti pemadu badas, Petara ti nempa semua utai lalu meri utai ti diguna kitai. Taja pia, batang kebuah kitai deka ngasika Jehovah laban kitai sayauka Iya. (Bacha 1 John 5:3.) Taja pan kitai bisi mayuh kebuah patut ngasika Iya, tang  Iya enda mejal kitai ngereja nya. Iya meri kitai peluang bibas milih. Nya alai, lebuh kitai milih deka ngasika Iya ketegal kitai sayauka Iya, Iya gaga ati.

9-10. Nama kebuah nya beguna nemu pasal standard Jehovah lalu ngasika standard nya?

⁹ Apai indai deka anak sida berasai likun. Nya alai, sida netapka atur bekaul enggau ulah ngambika anak tau bulih penguntung. Lebuh anak ngasika atur nya, sida nunjukka diri arap sereta bebasaka apai indai. Pia mega, endang beguna bendar kitai nemu sereta ngasika atur tauka standard ke diberi Jehovah. Lebuh kitai ngereja nya, kitai nunjukka diri sayau sereta bebasaka Iya. Lalu kitai mega tau bulih penguntung. (Isa. 48:17, 18) Tang, sida ke enda ngasika Jehovah lalu nulak standard Iya, ngemediska diri empu.—Gal. 6:7, 8.

¹⁰ Enti pengidup kitai sejalai enggau standard Jehovah, kitai ulih nyeliahka utai ke tau ngemediska tubuh sereta emosi kitai. Kitai mega ulih nyeliahka utai ke tau ngerusak kaul kitai enggau Jehovah. Iya nemu utai ti pemadu badas ke kitai. Aurora, ke diau ba Amerika Serikat madahka: “Aku nemu enti kitai ngasika Jehovah, pengidup kitai tentu deka seruran badas.” Tu endang amat. Nama  penguntung ke diulih nuan ari ngasika standard tauka iring Jehovah?

11. Baka ni sampi ulih nulung kitai?

¹¹ Ketegal semua kitai enda sempurna, kadang-kadang kitai tusah deka ngasika Jehovah. Tang kitai patut enggau naka ulih ngasika Iya sereta nyeliahka pengingin deka ngereja utai ti salah. Sampi ulih nulung kitai ngasika Iya. Ku pemasmur minta bantu ari Petara: “Asuh aku rajin ngasika Nuan.” (Mas. 51:12) Seiku pengerintis ke benama Denise, madahka: “Enti aku ngasaika diri tusah deka ngasika pesan Jehovah, aku besampi minta pengering ngambika ulih ngereja utai ti ngena.” Kitai pechaya Jehovah deka seruran nyaut sampi ke baka tu.—Luk. 11:9-13.

12. Bepelasarka Epesus 5:1, nama patut digaga kitai?

¹² Bacha Epesus 5:1. Ketegal kitai tu “anak ke dikesayauka” Jehovah, kitai enggau naka ulih deka neladan Iya. Kitai neladan Iya enti kitai rindu, siru sereta deka ngampunka orang bukai. Lebuh orang ke enda nyembah Jehovah meda ulah kitai ti manah, tu engka ngasuh sida deka belajar mayuh agi pasal Iya. (1 Pet. 2:12) Apai indai ke Saksi patut nguji ngintu anak sida baka chara Jehovah  ngintu kitai. Tu engka ulih meransang anak sida nyadi pangan Jehovah.

13. Nama patut digaga kitai ngambika ulih nyadi berani?

¹³ Anak mit ke temegahka apai sida, kesuah agi rindu bejaku pasal apai sida ngagai orang. Pia mega enggau kitai. Kitai temegahka Apai kitai, Jehovah, lalu deka orang nemu pasal Iya. Kitai tentu ngasaika utai ti sama baka Raja David ke nulis: “Aku deka [‘temegahka,’ NWT] Iya.” (Mas. 34:2) Tang, baka ni enti kitai nya orang ti pemalu? Baka ni kitai ulih nyadi orang ti berani? Kitai ulih nyadi berani enti kitai mikirka pengaga ati Jehovah lebuh kitai bejaku pasal Iya ngagai orang sereta berundingka penguntung ke diulih orang lebuh sida belajar pasal Jehovah. Jehovah deka meri kitai pemerani. Iya udah nulung nembiak Iya ba jeman Bup Kudus nyadi berani, lalu Iya mega tentu deka nulung kitai.—1 Tes. 2:2.

14. Nama kebuah nya beguna kitai nginjil?

¹⁴ Jehovah enda bepilih mata. Iya gaga ati lebuh meda kitai ngayanka penyayau ngagai orang, enda ngira ari ni penatai sida. (SKR. 10:34, 35) Siti chara ti pemadu manah kitai ulih ngayanka penyayau ngagai orang iya nya, nginjil ngagai sida. (Mat. 28:19, 20) Nama asil ke diulih ari pengawa nya? Sida ke ningaka kitai ulih ngemanahka agi pengidup sida, lalu bulih pengadang idup belama iya ba dunya Paradais.—1 Tim. 4:16.

15-16. Nama utai ke ngasuh kitai gaga ati?

¹⁵ Jehovah nya Apai ti ngembuan penyayau. Nya alai, Iya deka ruang bilik Iya gaga ati. (Isa. 65:14) Kitai bisi mayuh kebuah gaga ati taja pan kitai napi penusah kemayaharitu. Ambika chunto, kitai pechaya Apai kitai, Jehovah, amat sayauka kitai. Kitai bulih penemu ti bendar ari Bup Kudus. (Jer. 15:16) Lalu, kitai sebagi ari ruang bilik ke sayauka Jehovah, sayauka pangan diri sereta rinduka iring tauka standard Iya ti tinggi.—Mas. 106:4, 5.

¹⁶ Kitai ulih seruran gaga ati laban kitai nemu pengidup kitai deka nyadi manah agi jemah ila. Enda lama agi, Jehovah deka ngemunaska orang ke jai lalu dunya deka nyadi Paradais di baruh Perintah Iya. Kitai mega bisi pengadang ti badas laban sida ke udah mati deka diangkatka idup baru lalu kitai ulih begulai baru enggau sida. (Jhn. 5:28, 29) Tu endang ngagaka ati kitai! Lalu keberat agi, kitai nemu enda lama agi semua sida ke ba serega enggau ba dunya deka meri basa, puji sereta sembah ngagai Apai kitai, Jehovah.