Ba Bup Kudus, kekadang leka jaku asal Gerika “pengawa ke lurus” disalin nyadi “utai ti manah ari asal tauka utai ti manah ari segi ulah sida.”

Orang Kristian beratika jaku ke dipadah rasul Paul: “Kami . . . ingin deka ngereja utai ti badas [lurus] berari.” Tu nyengkaum nama?

Ninting pagi, mayuh orang meda diri empu ba cheremin sebedau sida pansut ari rumah. Nama kebuah? Laban sida deka manah dipeda. Tang bisi utai bukai ke berat agi ari stail buk tauka pisin baju. Endang amat, utai ke bisi ba runding kitai bekaul enggau ulah kitai.

Jaku Petara enggau terang madahka, kitai ingin deka ngereja utai ke jai. Pemungkal 8:21 madahka: “Kenyau ari sida agi biak, runding sida endang jai.” Nya alai, enti deka lurus, kitai patut ngelaban pengingin bedosa ke dibai kitai kenyau ari ada. Rasul Paul madahka enggau terang pasal diri empu ke belaban enggau dosa. Ku iya madahka: ‘Laban dalam ati aku, aku endang rinduka adat Petara, tang aku meda dalam tubuh aku, adat bukai beperang ngelaban Adat ti dalam ati aku lalu nanchang aku ngena adat dosa, ti diau dalam tubuh aku.’—Rome 7:22, 23.

Chunto, lebuh ati kitai ngasuh kitai ngereja pengawa ke enda manah, lalu kitai bisi pengingin ti balat deka ngereja pengawa ke enda lurus, kitai tau enda ibuh nitihka pengingin nya. Kitai agi ulih milih ba pekara tu. Lebuh kitai milih deka nulak runding ke jai, kitai ulih mengkang lurus taja pan dikelingi pengawa ke enda lurus.

Enti deka lurus, kitai begunaka standard moral ti tetap. Tang sayau amat, mayuh orang ngena mayuh awak berundingka standard begari ke dikena sida ari berundingka standard moral ke dikena sida. Ketegal tu, sida netapka naka ni pengawa ke enda lurus nya tau dikereja sida. Bup The (Honest) Truth About Dishonesty madahka: “Iya ke amat, kitai nipu diri empu nyentukka kitai pechaya kitai orang ke lurus.” Kati bisi standard ke ulih nulung kitai ngaga pemutus pasal naka ni pengawa ke enda lurus nya tau dikereja kitai? Au, bisi.

Bejuta iku orang di serata dunya ngasaika standard ke baka nya bisi ba Bup Kudus. Bup Kudus ngembuan standard moral ti pemadu tinggi. (Masmur 19:7) Bup Kudus meri iring ke ulih dikena ba pengidup diri sebilik, kereja, ulah, enggau rohani. Bup Kudus mengkang ulih dikena nyentuk ke diatu. Adat enggau prinsip iya ulih dikena semua orang, enda ngira bansa. Enggau beratika Bup Kudus, belematika utai ti dipadah iya sereta nitihka jaku lalau iya, kitai ulih ngelatih ati kitai ngambika lurus sereta badas.

 Amat, semina ngulihka penemu ti bendar ari Bup Kudus aja enda chukup. Bisi utai bukai ke patut digaga ngambika ulih menang ngelaban pengawa ke enda lurus. Kitai diau ba dunya ke ngembuan moral ti enda menyana, ke ngasuh kitai deka nerima standard ke enda lurus. Nya alai, kitai patut besampi minta tulung sereta sukung ari Petara. (Pilipi 4:6, 7, 13) Enggau tu, kitai tau bulih pemerani kena ngetanka utai ke ngena sereta lurus ba semua pekara.

Hitoshi, ke disebut ba pun artikel tu, bulih penguntung ketegal nyadi pekereja ke lurus. Diatu iya bekereja enggau tauke ke rinduka pengawa iya ke lurus. Ku Hitoshi, “Aku gaga ati laban ulih tetemuka kereja ke ulih nulung aku ngetanka ati ti beresi.”

Orang bukai mega ngasaika utai ti sama. Peratika sekeda chunto orang ke udah bulih penguntung ketegal nitihka prinsip Bup Kudus “ngereja utai ti badas [lurus] berari.”

• Ati ti Beresi

  “Aku badu sekula lebuh beumur 13 taun ngambika ulih bekereja enggau penchuri. 95 peratus ari duit ke diulih aku datai ari ngereja pengawa ke enda lurus. Udah nya aku belaki. Lalu aku enggau laki aku berengkah belajarka Bup Kudus enggau Saksi-Saksi Jehovah. Udah nya kami duai nemu Petara Jehovah a begedika pengawa ke enda lurus, nya alai kami duai ngaga pemutus deka ngubah chara pengidup. Ba taun 1990, kami duai nyerahka pengidup kami ngagai Jehovah sereta dibaptisa nyadi Saksi-Saksi Jehovah.”—Jaku-Dalam 6:16-19.

  “Suba, rumah aku penuh enggau barang churi. Tang diatu nadai agi, lalu tu ngasuh aku bisi ati ti beresi. Lebuh ngingatka pengawa ke enda lurus ti udah dikereja aku betaun-taun, aku beterima kasih ngagai Jehovah ke udah ngayanka penyinu ti besai ngagai aku. Aku lantang ati lebuh tinduk tiap malam laban nemu Jehovah diatu gaga ati ke aku.”—Cheryl, Ireland.

  “Lebuh bos aku nemu aku enggai nerima suap ari seiku pelangan, ku iya madah ngagai aku: ‘Petara nuan udah ngasuh nuan nyadi orang ke tau dikearapka! Endang manah enti bisi orang ke baka nuan gawa ba kompeni kitai.’ Lurus ba semua pekara, nulung aku bisi ati ti beresi ba mua Petara Jehovah. Tu mega ngasuh aku meransang diri sebilik sereta orang bukai ngereja pekara ti sama.”—Sonny, Hong Kong.

• Pengelantang ba Runding

  “Aku bekereja nyadi penulung manager ba siti bank entarabansa. Ba pengawa dagang tu, pengawa ke lurus suah diseliahka ketegal deka bulih pengaya. Ba penemu orang mayuh, ‘Enda ngawa ngereja pengawa enda lurus ke mit aja, enti iya ulih ngasuh kaya sereta nambahka penatai pemisi.’ Tang ketegal ngereja pengawa ke lurus, aku bisi pengelantang ba runding. Aku keran deka mengkang lurus sereta enggau naka ulih ngetanka iya, enda ngira nama utai ke nyadi. Bos aku nemu aku enda bula ke sida tauka enda bula ngarika sida”—Tom, Amerika Serikat.

• Bebasaka Diri Empu

  “Supervisor endur aku bekereja ngasuh aku bula pasal sekeda barang ke lenyau ba endur kereja, tang aku enggai. Pengudah penchuri nya ditemu, tauke beterima kasih ngagai aku ketegal pengawa aku ke lurus. Diau ba dunya ke ngembuan pengawa ke enda lurus begunaka pemerani. Tang pengujung iya, orang deka arapka sereta bebasaka kitai.”—Kaori, Jipun.

Ngembuan ati ti beresi, pengelantang ba runding sereta bebasaka diri empu nunjukka pengawa ke lurus endang amat mai penguntung. Kati nuan setuju?