1, 2. (a) ‘Pemeri Petara ti enda ulih ditelah’ nyengkaum nama? (b) Nama tanya ti deka dikerandauka kitai ba artikel tu?

 JEHOVAH meri kitai pemeri ti pemadu besai iya nya pengerindu, lebuh Iya ngirumka Anak Tunggal Iya, Jesus, ke dunya! (Jhn. 3:16; 1 Jhn. 4:9, 10) Rasul Paul ngumbai pemeri tu ‘pemeri Petara ti enda ulih ditelah.’ (2 Kor. 9:15) Nama kebuah Paul ngena rambai jaku tu?

² Paul nemu genselan Jesus ulih nyamin semua semaya manah ari Petara deka dikeamatka. (Bacha 2 Korint 1:20.) Tu reti iya, ‘pemeri Petara ti enda ulih ditelah’ nyengkaum genselan Jesus enggau semua pemanah sereta pengerindu ke diayanka Jehovah ngagai kitai. Pemeri ti berega tu enda ulih diterangka ngena chara ke amat ulih dimeretika kitai. Baka ni asai ati kitai ke pemeri ti istimewa tu? Lalu baka ni pemeri tu patut meransang kitai seraya kitai nyediaka diri Ngingatka Pemati Jesus kena Hari Tiga, 23 Mac 2016?

3, 4. (a) Baka ni asai ati nuan lebuh orang meri nuan pemeri? (b) Baka ni pemeri ti istimewa ulih ngubah pengidup nuan?

³ Kitai gaga ati lebuh orang meri kitai pemeri. Tang sekeda pemeri  nya bisi reti ti besai tauka istimewa, laban pemeri nya ulih ngubah pengidup kitai. Uji gambarka nuan udah ngereja siti penyalah, lalu ukum iya pemati. Tang enda memukai, seiku orang ke enda dikelala nuan sanggup nerima ukum nya ngarika nuan. Iya sanggup mati ke nuan! Baka ni asai ati nuan ke pemeri ti istimewa tu?

⁴ Pengerindu enggau pemeri ti istimewa nya deka ngasuh nuan ngaga ubah ba pengidup. Nuan mega tentu deka agi gerah jari, rindu agi ngagai orang bukai sereta ngampunka orang ke enda manah enggau nuan. Sepemanjai pengidup nuan, nuan deka nunjukka diri beterima kasih ke genselan ti udah disediaka.

 5. Baka ni tebus ke diberi Petara nya besai agi ari pemeri ke bukai?

⁵ Tebus ke diberi Petara nya besai agi ari pemeri ke dipadah ba chunto tadi. (1 Pet. 3:18) Pikirka tu: Semua kitai bulih dosa ari Adam, lalu ukum dosa nya pemati. (Rom. 5:12) Pengerindu meransang Jehovah ngirumka Jesus ke dunya ngambika “mati ke semua mensia.” (Heb. 2:9) Tang genselan Jesus deka mai berekat bukai! Iya deka ngerusakka pemati belama iya. (Isa. 25:7, 8; 1 Kor. 15:22, 26) Semua orang ke ngayanka pengarap ba Jesus, deka idup dalam pemaik sereta lantang ati belama iya, sekalika nyadi raja enggau Kristus di serega tauka nyadi rayat Perintah Petara ba dunya. (Rom. 6:23; Pem. 5:9, 10) Nama berekat bukai ke bisi disengkaum dalam pemeri Jehovah?

 6. (a) Nama berekat ari pemeri Jehovah ke dianti nuan? (b) Pemeri Petara deka meransang kitai ngereja tiga iti pekara. Padahka.

⁶ Ketegal nyadi begian ari pemeri Petara, dunya deka nyadi paradais, orang ke sakit deka digeraika, lalu orang ke mati deka diangkatka idup baru. (Isa. 33:24; 35:5, 6; Jhn. 5:28, 29) Kitai rinduka Jehovah enggau Anak Iya ke udah meri kitai pemeri “ti enda ulih ditelah.” Pemeri tu deka meransang kitai ngereja nama? Iya deka meransang kitai (1) neladan Jesus Kristus, (2) rinduka bala menyadi Kristian kitai, sereta (3) ngampunka orang bukai ari ati.

7, 8. Baka ni asai ati kitai pasal pengerindu Kristus, lalu pengerindu tu patut meransang kitai ngereja nama?

⁷ Kesatu, kitai patut berasai diperansang ngena pengidup kitai bebasaka Jesus. Rasul Paul madahka: “Pengerindu Kristus mejalka kami.” (Bacha 2 Korint 5:14, 15.) Paul nemu enti kitai nerima pengerindu Jesus ti besai, pengerindu tu deka mejal tauka meransang kitai rinduka sereta bebasaka Jesus. Lebuh kitai amat meretika utai ti udah digaga Jehovah ke kitai, pengerindu Iya deka meransang kitai bebasaka Jesus ba pengidup kitai. Baka ni kitai ngereja tu?

⁸ Pengerindu ke Jehovah deka meransang kitai neladan Jesus, nitihka singkang iya. (1 Pet. 2:21; 1 Jhn. 2:6) Lebuh kitai ngasika Petara enggau Kristus, kitai nunjukka diri rinduka seduai iya. Jesus madahka: ‘Orang ke nerima lalu ngasika pesan aku, nya meh orang ke rinduka aku. Lalu orang ke rinduka aku deka dikerinduka Apai aku, lalu aku deka rinduka sida, lalu mandangka diri ngagai sida.’—Jhn. 14:21; 1 Jhn. 5:3.

 9. Nama pengingin ke ditapi kitai?

⁹ Endang manah enti belematika chara kitai ngena pengidup kitai maya musin Ngingatka Pemati Jesus. Nya alai, tanya diri empu: ‘Ba pekara ni aku  udah neladan Jesus? Ba pekara ni aku ulih mansang?’ Endang beguna nanya tanya tu ngagai diri empu laban dunya tu deka kitai idup nitihka chara iya. (Rom. 12:2) Enti kitai enda bejimat, kitai engka bisi pengingin deka nitihka bala pengajar, selebriti sereta orang ke tebilang ba sukan di dunya tu. (Kol. 2:8; 1 Jhn. 2:15-17) Baka ni kitai ulih nyeliahka tu?

10. Nama tanya ke ulih ditanya ngagai diri empu maya musin Ngingatka Pemati Jesus, lalu saut kitai meransang kitai ngereja nama? (Peda gambar ba pun artikel.)

¹⁰ Endang manah ngena awak maya musin Ngingatka Pemati Jesus beratika gari kitai, cherita wayang enggau musik, nyengkaum utai ke bisi ba komputer, telefon binching, tauka tablet kitai. Tanya diri empu: ‘Enti sema Jesus bisi ditu, lalu meda gari ke dikena aku, kati aku malu enggau gari ke dikena aku?’ (Bacha 1 Timoti 2:9, 10.) ‘Kati gari aku nunjukka aku nembiak Jesus? Kati Jesus rindu enggau cherita wayang ke dipeda aku? Kati iya deka ninga musik ke didinga aku? Enti Jesus nginjau telefon binching tauka tablet aku, kati aku malu enggau utai ti dipeda iya? Kati nya tusah deka nerangka ngagai Jesus, kebuah aku rindu enggau video game ke dimain aku?’ Pengerindu kitai ke Jehovah patut meransang kitai muai semua utai ti enda manah ke orang Kristian, enda ngira penyampau ungkus iya. (SKR. 19:19, 20) Lebuh kitai nyerahka pengidup kitai ngagai Jehovah, kitai besemaya deka ngena pengidup kitai bebasaka Jesus. Nya alai, kitai enda patut ngembuan sebarang utai ke ulih ngasuh kitai tusah neladan Jesus.—Mat. 5:29, 30; Plp. 4:8.

11. (a) Baka ni pengerindu kitai ke Jehovah enggau Jesus meransang kitai ba pengawa nginjil? (b) Baka ni pengerindu ulih meransang kitai nulung orang bukai ba gempuru?

¹¹ Pengerindu kitai ngagai Jesus meransang kitai nginjil sereta ngajar enggau ransing ati. (Mat. 28:19, 20; Luk. 4:43) Maya musin Ngingatka Pemati Jesus, ulih nuan ngatur jadual ngambika ulih nyadi pengerintis sukung sereta ngena 30 tauka 50 jam ba pengawa nginjil? Seiku lelaki balu ke beumur 84 taun ngumbai diri enda ulih nyadi pengerintis laban iya udah tuai sereta enda bepengerai. Tang bala pengerintis ba gempuru deka nulung iya. Sida nyediaka perengka pengangkut sereta milih endur nginjil ke ulih digaga iya. Asil iya, menyadi Kristian nya bulih 30 jam baka ke dikedekaka iya. Ulih nuan nulung bala menyadi ba gempuru nyadi pengerintis sukung ba bulan Mac tauka April? Endang amat, ukai semua orang ulih nyadi pengerintis, tang kitai ulih ngena jam enggau pengering nambahka pengawa kitai ngagai Jehovah. Enti kitai ngereja tu, kitai deka nunjukka diri, baka Paul, diperansang ulih pengerindu Jesus. Pengerindu Petara mega deka meransang kitai ngereja nama?

12. Pengerindu Petara meransang kitai ngereja nama?

¹² Kedua, pengerindu Petara patut meransang kitai rinduka bala menyadi Kristian. Rasul John nulis: ‘Menyadi, laban Petara udah balat rinduka kitai, kitai mega patut rinduka pangan diri.’ (1 Jhn. 4:7-11) Nya alai, enti kitai nerima pengerindu Petara, kitai patut rinduka bala menyadi Kristian. (1 Jhn. 3:16) Baka ni kitai ulih ngayanka pengerindu ngagai sida?

13. Baka ni Jesus netapka teladan rinduka orang bukai?

 ¹³ Teladan Jesus nunjukka chara kitai ulih rinduka orang bukai. Lebuh iya ba dunya, iya nulung orang, kelebih agi orang ke baruh ati. Iya ngeraika orang ke sakit, kait-kupit, buta, bengal sereta bisu. (Mat. 11:4, 5) Enda baka sida tuai pengarap, Jesus rindu ngajar orang ke deka belajar pasal Petara. (Jhn. 7:49) Iya rinduka orang ke baruh ati nya, lalu bebendar nulung sida.—Mat. 20:28.

14. Nama ulih digaga nuan kena ngayanka pengerindu ngagai bala menyadi Kristian?

¹⁴ Musin Ngingatka Pemati Jesus mega maya ti manah endur berundingka chara nuan ulih nulung bala menyadi ba gempuru, kelebih agi sida ke tuai. Ulih nuan ngabas sida? Ulih nuan mai pemakai ke sida, nulung sida ngereja pengawa ba rumah, mai sida datai begempuru, tauka mai sida gawa enggau kitai ba pengawa nginjil? (Bacha Luke 14:12-14.) Awakka pengerindu Petara meransang nuan ngayanka pengerindu ngagai bala menyadi Kristian!

15. Nama pekara ke patut ditemu kitai?

¹⁵ Ketiga, pengerindu Jehovah meransang kitai ngampunka bala menyadi Kristian. Semua kitai bulih dosa enggau pemati ari Adam. Nya alai, nadai seiku orang ulih madahka, “Aku enda begunaka tebus.” Indah nembiak Petara ke pemadu tetap ati pan begunaka tebus, pemeri ari Petara. Tiap iku kitai udah dilepaska ari utang ke mayuh! Nama kebuah beguna nemu pasal pekara tu? Kitai ulih tetemuka saut iya ba siti ari sempama Jesus.

16, 17. (a) Nama ulih dipelajarka kitai ari sempama Jesus pasal seiku raja enggau dua iku ulun? (b) Pengudah belematika sempama Jesus, nama deka digaga nuan?

¹⁶ Jesus meri siti sempama pasal seiku raja ke muai utang seiku ulun ke bejuta-juta ringgit ba nya. Tang udah nya, ulun nya enggai muai utang seiku ulun bukai ke semina mimit aja ba iya. Pengasih raja nya patut meransang ulun nya muai utang ulun ke berutang ba iya. Raja nya pedis ati lebuh iya ninga ulun iya enggai muai utang ke mimit. Ku raja nya: “Nuan tu ulun ti jai! Aku udah muai semua utang nuan, laban nuan minta aku muai utang nya. Kati nuan enda nemu kasihka orang ke sama ulun baka nuan empu, baka aku ke udah kasihka nuan?” (Mat. 18:23-35) Baka raja nya, Jehovah udah ngelepaska kitai ari utang ke mayuh. Pengerindu enggau pengasih Jehovah patut meransang kitai ngereja nama?

¹⁷ Seraya kitai nyediaka diri Ngingatka Pemati Jesus, kitai engka nanya diri empu: ‘Kati menyadi Kristian bisi ngemediska ati aku? Kati aku tusah deka ngampunka iya?’ Enti pia, tu maya ti  manah neladan Jehovah ke “sedia deka ngampun.” (Neh. 9:17; Mas. 86:5) Enti kitai beterima kasih ke pengasih Jehovah ti besai, kitai deka ngayanka pengasih ngagai orang bukai sereta ngampunka sida ari ati. Enti kitai enda rinduka sereta ngampunka bala menyadi Kristian, kitai enda ulih ngarapka Jehovah rinduka sereta ngampunka kitai. (Mat. 6:14, 15) Lebuh kitai ngampunka orang bukai, tu enda ngubah pengawa sida ke udah ngemediska ati kitai, tang tu deka nulung kitai bulih pengelantang dalam ati.

18. Baka ni pengerindu Petara nulung seiku menyadi Kristian indu besabar enggau pengurang seiku da agi menyadi Kristian indu?

¹⁸ Kekadang tusah deka besabar enggau penyalah bala menyadi Kristian kitai. (Bacha Epesus 4:32; Kolosi 3:13, 14.) Tu meh utai ke diasaika seiku menyadi Kristian indu ke benama Lily. ^[1] (Peda nota penutup.) Iya nulung seiku indu balu ke benama Carol. Ngambika chunto, iya nganjung Carol ngagai sebarang endur ke deka digagai Carol, nulung iya bebelika barang, sereta ngereja mayuh agi utai bukai ke Carol. Enda ngira nama utai ke udah digaga Lily, Carol selalu ngiga penyalah Lily, lalu kekadang enda senang deka nulung Carol. Tang Lily beratika kualiti manah ke dikemisi Carol, lalu agi nulung Carol beberapa taun, sebedau Carol balat sakit lalu mati. Taja pan nulung Carol nya ukai utai ti senang ba Lily, tang ku iya: “Aku nganti maya Carol deka diangkatka idup baru. Aku deka nemu sapa iya maya iya sempurna.” Endang amat, pengerindu Petara ulih meransang kitai besabar enggau bala menyadi Kristian kitai, lalu nganti maya semua kitai nyadi sempurna.

19. Baka ni ‘pemeri Petara ti enda ulih ditelah’ meransang nuan?

¹⁹ Jehovah amat udah meri kitai “pemeri Iya ti enda ulih ditelah.” Arapka kitai seruran beterima kasih ke pemeri tu! Musin Ngingatka Pemati Jesus nya maya ti pemadu manah kena belematika semua utai ti udah digaga Jehovah enggau Jesus ke kitai. Arapka pengerindu seduai iya meransang kitai neladan Jesus, ngayanka pengerindu ngagai bala menyadi Kristian, sereta ngampunka bala menyadi Kristian ari ati.