‘Enti kita minta sebarang utai ari Apai dalam nama aku, Iya deka meri utai nya ngagai kita.’—John 16:23.

Ari jaku Jesus, terang amat nunjukka Jehovah deka kitai besampi ngagai Iya, ukai ngagai gambar, orang kudus, melikat, tauka ngagai orang ke udah mati, tang nengah nama Jesus Kristus. Lebuh kitai besampi ngagai Petara nengah nama Jesus, kitai nunjukka diri beterima kasih enggau utai ke digaga Jesus ke kitai. Ku Jesus, ‘Nadai orang ulih datai ngagai Apai enti enda nengah aku.’ —John 14:6.

“Padahka ngagai Iya semua penusah kita.”—Masmur 62:8.

Lebuh kitai besampi ngagai Jehovah, kitai patut bejaku enggau Iya baka ngagai apai ke sayauka kitai. Ari ke macha bup tauka ngingatka leka sampi, kitai patut bejaku ngagai Iya enggau basa sereta ari ati.

“Enti kitai minta sebarang utai nitihka peneka Iya, Iya ninga kitai.”—1 John 5:14.

Petara Jehovah madahka utai ke deka dikereja Iya ngagai kitai, sereta utai ti patut dikereja kitai ngagai Iya dalam Bup Kudus. Ngambika sampi didinga, kitai patut “nitihka peneka” Petara. Nya kebuah kitai patut belajarka Bup Kudus, ngambi ulih ngelala Iya enggau dalam agi. Enggau chara nya, sampi kitai ngelantangka Iya.

Utai ti Diguna Ninting Hari. Kitai ulih minta utai ti diguna ninting hari, baka pemakai, gari enggau endur diau. Ngambika ulih ngaga pemutus ti betul sereta tan napi penguji, kitai mega ulih minta penemu-dalam. Pia mega, kitai ulih besampi minta pengampun, ngeringka pengarap, sereta tulung ari Petara.—Luke 11:3, 4, 13; James 1:5, 17.

Besampika Orang Bukai. Apai indai gaga ati meda anak sida sayauka pangan diri. Pia mega, kitai tu anak Jehovah, lalu Iya deka meda kitai ibuhka pangan diri. Endang sigi manah enti kitai besampika kaling pengidup, diri sebilik, bala anak, sereta kaban kitai. Baka ke ditulis rasul James, kitai patut “besampika pangan diri.”—James 5:16.

Beterima Kasih. Baka ke dipadah dalam Bup Kudus, Penempa ‘meri kitai ujan, ngasuh utai ti ditanam kitai bebuah lebat nitihka musin, lalu ngemuaska kitai ngena pemakai lalu ngemenuhka ati kitai enggau pengaga.’ (Kereja Rasul 14:17) Lebuh kitai berundingka semua utai tu, kitai deka beterima kasih ngagai Iya nengah sampi. Kitai mega patut ngayanka diri beterima kasih ngagai Petara, enggau chara ngasika Iya.—Kolosi 3:15.

Kekadang kitai berasai asa ati enti sampi kitai enda disaut tekala nya. Kati reti nya Petara enda ibuhka kitai? Ukai! Peratika sekeda peneleba ti meransang kitai terus besampi enggau sabar.

Ba pun artikel kitai udah nemu utai ke nyadi ba Steve. Iya ngaku: “Enti aku enda terus besampi enggau sabar, aku engka enda ulih gaga ati baru.” Nama utai ke ngubah iya? Iya berengkah belajarka Bup Kudus lalu nemu kebuah iya patut besampi enggau enda ngetu. Iya nampung baru: “Aku beterima kasih ngagai Petara nengah sampi, ketegal mayuh tulung ari bala kaban. Diatu, aku gaga agi ati ari ke suba.”

Baka ni enggau Jenny, ke kala ngasaika sampi iya enda layak didinga Petara? Iya madah: “Lebuh aku ngasaika diri amat enda beguna, aku minta Petara nulung aku nemu kebuah aku ngasaika nya.” Baka ni Petara nulung iya? Ku Jenny: “Lebuh aku besampi, aku nguji meda diri empu baka chara Petara meda aku. Taja pan ati aku ngukum diri, tang Iya enda baka nya. Tu nulung aku enda putus pengarap enggau diri empu.” Nama asil iya? “Sampi nulung aku ngasaika Jehovah nya amat bisi, bepengerindu sereta ibuh. Iya meh Petara, Apai, enggau Pangan aku, ti seruran nulung aku seagi aku nguji ngereja utai kedeka Iya.”

Peratika utai ke nyadi ba Isabel. Lebuh iya ngandung, lutur madahka anak ke deka diadaka iya nya bisi penimpang. Berita tu ngenusahka ati Isabel. Indah bisi orang ngasuh iya muai kandung nya. Iya madah: “Ati aku balat amat anchur, lalu ngasaika manah agi aku mati.” Nama gaga Isabel? Ku iya: “Aku majak besampi ngagai Petara minta pengering.” Nyau kelama, iya ngadaka seiku anak lelaki lalu diberi nama Gerard, lalu iya amat bisi penimpang. Kati Isabel ngasaika Petara ningaka sampi iya? Au! Baka ni? Isabel nerang: “Lebuh aku meda anak aku ke beumur 14 taun, lalu agi ulih gaga ati taja pan bisi penimpang, aku nemu Petara ningaka sampi, lalu nya meh berekat ti pemadu besai ke diberi Petara Jehovah ngagai aku.”

Peneleba tu ngasuh kitai ingatka jaku pemasmur ti madah: ‘O Jehovah, Nuan endang deka mendingka sampi orang ke baruh ati. Nuan meri sida pemerani.’ (Masmur 10:17) Tu meh kebuah kitai deka terus besampi enggau sabar!

Dalam Bup Kudus, kitai ulih tetemuka mayuh sampi Jesus. Sampi ke diajar iya ngagai bala murid, nyadi sampi ke pemadu tebilang. Nama ke dipelajarka kitai ari sampi nya?