Lebuh macha cherita pasal utai ti ditempa ba bup Pemungkal dalam Bup Kudus, kitai nemu Petara udah nangkan mensia ti keterubah, Adam: “Nuan tau makai buah ari semua kayu dalam kebun tu, tang nuan enda tau makai buah ari kayu penemu ti tau ngasuh nuan nemu semua utai, laban lebuh nuan makai buah nya, nuan deka mati.” (Pemungkal 2:​16, 17) Jaku nya enggau terang madahka, enti Adam ngasika pesan Petara, iya enda mati tang deka terus idup ba kebun Eden.

Tang sayau amat, ari ke milih deka ngasi sereta idup belama iya, Adam milih enggai ngasika jaku tangkan ari Petara, lalu iya makai buah ti ditagang lebuh bini iya, Hawa, meri iya buah nya. (Pemungkal 3:​1-6) Penusah ke datai ari ulah ke enda ngasi nya agi mengkang ninggang kitai kemaya hari tu. Rasul Paul nerangka: “Baka dosa ti datai ngagai dunya nengah orang siku, lalu pemati datai laban dosa, nya alai pemati ngelekai ngagai semua mensia, laban semua bela udah bedosa.” (Rome 5:​12) “Orang siku” nya, Adam. Tang nama reti dosa, lalu nama kebuah dosa ngujungka pemati?

Utai ti dikereja Adam iya nya enggau sengaja enggai ngasi tauka ngelanggar adat Petara, nya dosa. (1 John 3:⁠4) Lalu ukum dosa nya pemati, baka ke dipadah Petara ngagai Adam. Seagi-agi Adam enggau bala peturun iya ke jemah ila mengkang ngasika pesan Petara, sida deka nadai dosa  sereta enda ibuh napi pemati. Petara enda nempa mensia ngambika mati tang deka sida idup, indah belama iya.

Baka ke dipadah Bup Kudus, pemati udah “ngelekai ngagai semua mensia.” Tang kati bisi utai bukai ba kitai ke agi mengkang idup pengudah kitai mati? Mayuh orang madahka bisi. Utai nya dikumbai semengat, lalu iya enda nemu mati. Taja pia, nya deka nunjukka Petara bula ngagai Adam. Nama kebuah? Laban enti semengat kitai mengkang idup ba endur bukai pengudah kitai mati, reti nya pemati ukai ukum dosa, baka ke dipadah Petara. Bup Kudus madahka: ‘Petara nunjukka Diri enda bula.’ (Hebrew 6:​18) Kebendar, Sitan ke bula lebuh iya madah ngagai Hawa: “Enda seduai mati.”​​​—⁠Pemungkal 3:⁠4.

Tu ngasuh bisi tanya baka, Enti ajar pasal semengat ke enda nemu mati nya bepelasarka pemula, nya alai nama utai ke amat nyadi pengudah orang mati?

Cherita pasal utai ti ditempa ba bup Pemungkal madahka: ‘Jehovah Petara nempa mensia ari amau tanah lalu ngesuhka seput pengidup ke dalam lubang idung iya, lalu mensia nya idup.’ Leka jaku “mensia nya idup” disalin ari leka jaku Hebrew ne’phesh, reti iya “utai ti enseput.”​​​—⁠Pemungkal 2:​7.

Bup Kudus enggau terang madahka, Petara meri Adam “seput pengidup,” lalu Adam nyadi utai ti idup. Bup Kudus nadai madahka Petara meri Adam utai ke dikumbai sekeda orang semengat ke enda nemu mati. Nuan mega enda ulih tetemuka rambai jaku “semengat ke enda nemu mati” dalam Bup Kudus. Ketegal Bup Kudus nadai madahka mensia ngembuan semengat ke enda nemu mati, nama kebuah mayuh amat pengarap ngajar utai ti enda sejalai enggau ajar Bup Kudus? Saut iya deka mai kitai ngagai menua Ejip kelia.

Herodotus, seiku pakar sejarah bansa Gerika ke kala idup 2,500 taun menya madahka, orang Ejip nya “orang keterubah ti ngetanka penemu pasal semengat ke enda nemu mati.” Orang Babilon kelia mega nyukung penemu pasal semengat ke enda nemu mati. Lebuh Alexander ti Tebilang ngalahka Timur Tengah ba taun 332 S.M., bala falsafah bansa Gerika udah ngasuh ajar nya tebilang, lalu ajar nya jampat ngerembai ke serata Perintah Gerika.

Ba abad kesatu M., dua iti raban bansa Judah ti tebilang, iya nya orang Essenes sereta orang Parisi madahka, semengat mengkang idup pengudah tubuh mati. The Jewish Encyclopedia madahka: “Ajar pasal semengat ke enda nemu mati datai ngagai orang Judah lebuh sida bisi kaul enggau penemu Gerika lalu kelebih agi nengah penemu Plato.” Pia mega, Josephus, seiku pakar sejarah bansa Judah ba abad kesatu ngumbai ajar nya ukai datai ari Bup Kudus, tang ari “utai ti dipechaya orang bansa Gerika,” ke dikumbai iya nyadi siti ari cherita ke ditulis orang ke landik ngaga cherita ensera.

Seraya chara idup orang Gerika terus ngerembai, orang ke ngaku diri Kristian mega nerima ajar ti bula tu. Nitihka pakar sejarah Jona Lendering, “Plato ngumbai semengat kitai kala ba endur ke manah agi, tang diatu ba dunya ti jai. Tu ngasuh penemu plato senang disegulaika enggau penemu Kristian.” Nya alai, doktrin ke datai ari orang ke enda arapka Petara pasal semengat  ke enda nemu mati udah diterima ngagai gerija “Kristian” lalu nyadi siti ari utai ti dipechaya.

Ba abad keterubah, rasul Paul meri jaku tangkan tu: ‘Roh kudus terang amat madahka, jemah ila sekeda orang deka ngelengkaka pengarap laban sida mendingka roh ti nipu, enggau ajar antu.’ (1 Timoti 4:⁠1) Jaku nya endang amat! Doktrin pasal semengat ke enda nemu mati nya siti chunto “ajar antu.” Bup Kudus enda ngemendarka ajar nya, lalu ajar nya datai ari pengarap sereta penemu mensia kelia ke enda arapka Petara.

Kitai berasai gaga laban Jesus madahka: “Kita deka nemu pemendar, lalu pemendar deka ngelepaska kita.” (John 8:​32) Enggau ngulihka penemu ti betul pasal pemendar Bup Kudus, kitai dilepaska ari ajar enggau adat ti enda ngemuliaka Petara ke disukung mayuh pengarap ba dunya. Nambahka nya, pemendar dalam Jaku Petara ngelepaska kitai ari adat sereta utai ti enda amat bekaul enggau pemati.—Peda kutak “ Kini Penunga Orang ke Udah Mati?”

Penempa kitai enggai mensia idup semina 70 tauka 80 taun aja ba dunya tu lalu udah nya idup belama iya di serega tauka di sebayan. Tuju asal Iya nya deka mensia ke ditempa Iya idup belama iya ba dunya tu nyadi bala anak Iya ti ngasi. Tuju tu mandangka pengerindu Petara ke mensia, lalu tuju tu deka mujur. (Malaki 3:⁠6) Kena neguhka agi utai tu, pemasmur ke diiring roh kudus madahka: “Orang ke lurus deka bempu menua tu lalu diau ditu belama iya.”​​​—⁠ Masmur 37:29.