Ulih nuan ngambarka dunya tu nadai mata panas? Mata panas nya beguna, laban nya nulung pun kayu ngasilka daun, bungai, buah, kachang sereta leka. Tu mega ngasuh pun kayu bulih ai ari tanah nengah urat kayu. Ai nya diberi ngagai daun, lalu ngasilka wap ai.

Ujan nya pemeri ti berega ari Petara, ngambika dunya tu ulih ngasilka mayuh pemakai. Ketegal bisi ujan, utai ti ditanam ulih bebuah lebat nitihka musin. Lalu semua nya ngasuh kitai berasai puas sereta gaga.

Seiku apai tentu berasai irau, kati sida sebilik chukup pemakai tauka gari. Peratika ayat ba Bup Kudus tu: “Peda kita burung. Sida nadai betanamka utai, nadai ngetau, tauka besimpanka utai dalam setor, tang taja pia, Apai kita ti di serega nupi sida! Kati kita enda berega agi ari burung?”—Matthew 6:25, 26.

‘Peda kita penumbuh bungai babas . . . aku madah ngagai kita, indah Raja Solomon enggau semua pengaya iya deh, nadai gari ngemanah siti ari bungai nya. Enti Petara ngari rumput ti di babas. . . , enda ke Iya deka ngari kita?’—Matthew 6:28-30.

Ketegal Petara ulih nyediaka pemakai enggau gari, Iya tentu ulih nulung kitai ngulihka utai ti diguna kitai ba pengidup. Enti kitai ngemeratka peneka Petara, Iya ulih ngemujurka pengawa kitai. Ngambika chunto, iya ulih ngasuh utai ke ditanam tumbuh, tauka nulung kitai tetemuka kereja ti ulih melanja kitai.—Matthew 6:32, 33.

Maya kitai beratika mata panas, ujan, burung enggau bungai, nya ngasuh kitai deka semak agi ngagai Petara. Artikel ke nangkanka tu, deka berandauka chara Petara meri pesan ngagai mensia.