“Sophia a enggau aku udah kawin lebih ari 39 taun. Iya mati ketegal penyakit. Bala kaban aku, meri mayuh sukung lalu aku kisuk ngereja mayuh macham pengawa. Tang pengelama setaun, ati aku asaika disayat. Emosi aku nyau nurun niki baka ombak tasik. Diatu, pengudah tiga taun iya nadai, asai ati ke tusah enda memukai datai ngenyit, lalu ngachuk ati aku.”—Kostas.

Kala nuan ditinggalka orang ke dikesayauka nuan? Enti ya, nuan engka ulih meretika asai ati Kostas. Bala pemansik pan setuju, pemati kaling pengidup, kaban belayan, tauka kaban rapat, entara utai ke pemadu ngenusahka ati. Nitihka siti artikel The American Journal of Psychiatry madahka, “reti pemati nya, lenyau belama iya sereta mai pemedis ti amat dalam.” Nya alai, sida ke lenyau orang ke dikesayau engka berunding, “Ni pengelama aku patut ngasaika utai tu? Kati ulih aku gaga ati baru? Baka ni aku ulih tetemuka pengelantang ati?”

Tanya nya deka disaut dalam majalah tu. Artikel pengudah nya deka berandauka, utai ke engka nyadi enti nuan baru ditinggalka orang ti dikesayau. Artikel ke nangkanka nya deka madahka sekeda chara, kena ngurangka penusah ati nuan.

Kami ngarapka penerang ke deka dipadahka tu ulih meri pengelantang ati, sereta bantu ti ngena ngagai sida ke benung ditinggang penusah.