“Enda lama pengudah apai aku mati, laki aku madahka diri bisi indu bukai,” ku Janet. “Enda lama udah nya, enggau enda bepadah, iya mai semua gari iya lalu ninggalka aku enggau dua iku anak kami duai.” Janet bulih kereja, tang gaji iya enda chukup kena mayar rumah sida. Lalu iya ukai semina irau pasal belanja. “Aku balat irauka semua tanggungjawap baru ke kelalu berat diputarka aku kediri,” ku iya. “Aku berasai besalah laban aku enda ulih meri mayuh utai ke diguna anak aku baka apai indai bukai. Indah diatu, aku irau pasal baka ni runding orang bukai pasal aku enggau anak aku. Kada enda sida ngumbai aku enda bebendar ngetanka ruang bilik aku?”

Sampi nulung Janet sabar sereta neguhka kaul iya enggau Petara. “Maya malam hari, maya ti pemadu tusah laban semua utai udah sunyi lalu tu ngasuh aku enda ngetu irau. Besampi enggau macha Bup Kudus nulung aku ngambika ulih tinduk. Ayat ti dikerindu aku nya ba Pilipi 4:6, 7: ‘Anang irauka utai, tang dalam semua utai, bantaika semua peminta kita ngagai Petara ngena sampi, sampi peminta, enggau sampi terima kasih. Lalu pemaik Petara, ti ngelui peragam mensia, deka nyaga ati enggau runding kita.’ Aku udah besampi mayuh malam, lalu udah ngasaika pemaik Jehovah ngelantangka ati aku.”

Jaku Ajar ba Atas Bukit pasal sampi ke diberi Jesus ulih dikena mutarka semua pengirau: “Apai kita nemu utai ti dipeguna kita sebedau kita minta ari Iya.” (Matthew 6:8) Lalu kitai patut minta ari Iya. Sampi nya chara ti manah kena kitai ‘datai semak ngagai Petara.’ Nama asil iya? “Iya deka datai semak ngagai kita.”—James 4:8.

Amat, sampi ukai semina dikena ngelantangka ati lebuh kitai bisi pengirau. Jehovah ke “nyaut sampi,” mega nulung orang ke bisi pengarap ba Iya. (Masmur 65:2) Nya kebuah Jesus ngajar bala  murid iya “seruran besampi, lalu enda lemi semengat.” (Luke 18:1) Kitai patut terus minta iring sereta tulung ari Petara, lalu pechaya Iya deka merekatka pengarap kitai. Kitai enda kakang ati ke pengeran tauka pengawa Iya ke ulih nulung. “Seruran besampi” nunjukka kitai bisi pengarap ti teguh.—1 Tesalonika 5:17.

Nama reti pengarap? Pengarap nyengkaum “ngelala” Petara enggau dalam. (John 17:3) Keterubah iya, kitai patut nemu runding Petara ari Bup Kudus. Kitai nemu Iya meda tiap iku kitai, lalu deka nulung kitai. Pengarap ti teguh ukai semina nemu sekeda utai pasal Petara, tang mega begunaka kaul ti rapat enggau Iya. Sama baka kaul kitai enggau orang bukai, kitai enda ulih ngulihka kaul ti rapat dalam sehari aja. Pengarap kitai “mansang” seraya kitai belajar mayuh agi pasal Iya, “ngereja utai ti ngerinduka ati Iya” sereta ngasaika tulung ari Iya. (2 Korint 10:15; John 8:29) Pengarap ke baka tu meh nulung Janet mutarka pengirau iya.

“Utai ke amat nulung aku neguhka pengarap iya nya meda Jehovah nulung aku ba semua pekara,” ku Janet. “Kami suah napi pengawa ke enda lurus ke dikumbai kami enda ulih diputarka. Enggau selalu besampi, Jehovah seruran meri jalai ke enda kala dipikirka aku kena kami mutarka penanggul. Lebuh aku beterima kasih ngagai Iya, tu ngingatka aku pemayuh utai ti udah digaga Iya ke aku. Iya selalu nulung kami ba maya ti ngena. Lalu Iya udah meri aku kawan ti bendar iya nya bala menyadi Kristian. Sida semampai enggau aku, lalu nyadi ke teladan ti manah ngagai anak aku.” *

“Aku nemu kebuah Jehovah madahka: ‘Aku begedika pengawa sarak,’ ba Malaki 2:16. Laki tauka bini ke ditinggalka ngasaika diri balat merinsa. Betaun laki aku udah ninggalka aku, tang kekadang aku agi berasai puang. Lebuh aku ngasaika tu, aku ngereja siti-siti pengawa kena nulung orang bukai, lalu tu mega nulung aku empu.” Janet ulih ngurangka pengirau, laban iya nitihka ajar Bup Kudus ke ngasuh kitai begulai enggau orang bukai. *—Jaku Dalam 18:1.

Ku Janet, “pengelantang aku ti pemadu besai datai ari ngelala Petara ke ‘ngibun orang ke nadai apai indai, lalu nyaga sida indu ke balu.’ Iya enda kala ninggalka kami baka laki aku.” (Masmur 68:5) Janet nemu Petara enda nguji kitai ngena “penyai.” Tang, Iya meri penemu-dalam “enggau gerah mudah” sereta meri “kuasa ti besai” kena nulung kitai mutarka pengirau.—James 1:5, 13; 2 Korint 4:7.

Tang baka ni enti kitai irau pasal pengelikun diri?