Kena taun 2013, bala arkeologi tetemuka siti setor besai alai bansa Kanaan nyimpan wain, ke udah digaga kira-kira 3,700 taun ti udah. Setor nya bisi 40 igi benda besai ke ulih dikena nyimpan wain ke sama penyampau enggau kira-kira 3,000 igi butul wain kemaya hari tu. Arkeologi ke mansik bekau utai ke lekat ba benda nya nemu, bansa Kanaan enda sengapa ngaga wain. Ku iya madah: “Utai ke dikena ngaga wain enda tau enda sama dalam tiap igi benda.”

NEMU NUAN? Bup Kudus nyebut pasal “wain ti pemadu manah” ke digaga maya jeman Israel kelia sereta wain ke disimpan dalam benda besai.—Pelandai Solomon 7:9; Jeremiah 13:12.

Kena taun 2012, penyampau anak mit ke ada ba menua Ejip udah ngelui 560,000 iku enti dibandingka enggau taun 2010, nitihka riput ba surat kabar Guardian. “Tu penyampau ti pemadu mayuh dalam sejarah menua Ejip,” ku Magued Osman ari siti kompeni pemansik ba menua Ejip ke dikumbai Baseera. Enti ninting taun anak mit ada nyampau tu, sekeda pakar madahka, menua nya deka balat suntuk ai, tenaga, enggau pemakai.

NEMU NUAN? Nitihka Bup Kudus, tuju Petara iya nya “ngemenuhka dunya” enggau mensia naka tatak ti patut, sereta deka semua orang ngelantangka diri enggau chukup utai.—Pemungkal 1:28; Masmur 72:16.

Lebih ari 100 singkap duit seling engkeraju ke bisi tulis “Taun Empat” udah ditemu semak siti jalai besai ba menua Israel. Taun nya nunjukka taun keempat orang Judah ngelaban orang Rome (69-70 M.), ke ngujungka Jerusalem dirusak. “Tu nunjukka bisi orang takut pengujung nyau semak—iya engka meda soldadu Rome majak semak,” ku Pablo Betzer, seiku ketuai pengawa numbak. “Iya ngelalaika reta nya, lalu ngarapka diri pulai baru ngambi reta nya.”

NEMU NUAN? Kena 33 M., Jesus madahka Jerusalem deka dikelulung bala soldadu Rome. Iya ngansak orang Kristian rari nyelamatka diri ngagai bukit.—Luke 21:20-24.