Saksi-Saksi Jehovah meri bantu ba pengarap sereta utai ke diguna ngagai lebih ari 200 iti menua. Tang, semina dalam urung 35 iti menua ke ulih nampung belanja utai ke diguna sida empu. Nyadi, baka ni enggau sekeda menua ke napi penanggul ba ekonomi?

 Raban ti Ngiring beratika utai ti diguna ba pengarap, sereta semua pengawa Saksi-Saksi Jehovah di serata dunya. Duit pemeri tentu dikena enggau chara ti betul. Enti duit pemeri ke diterima sesiti pampang nya lebih ari ke diguna, sida deka nyadung duit lebih nya ngagai pampang bukai ke napi penanggul ba ekonomi. Tu sebaka enggau utai ke nyadi ba orang Kristian kelia suba. Sida sama bela betulung pangan diri ngambika “semua bela bisi utai magang.” (2 Korint 8:14) Nyadi, pengering tauka pemisi ke dikembuan sida, ulih ngelamun pengurang menyadi bukai.

 Nama asai ati bala menyadi kitai ke nerima bantu ari pampang bukai? Chunto iya, ba Tanzania, lebih ari setengah rayat dia nerima kurang ari 2 dolar (tauka RM8.31) dalam sehari. Tang, ba menua nya, Saksi-Saksi Jehovah agi ulih ngaduka baru Palan Gempuru ke dikena Eklisia Mafinga. Bala menyadi dia madahka: “Pengudah Palan Gempuru kami diaduka baru, penyampau orang ke datai begempuru majak mayuh. Kami amat beterima kasih ngagai gerempung Jehovah sereta bala menyadi ba serata dunya, laban sida amat gerah jari. Diatu, kami bisi Palan Gempuru ti amat manah.”

 Bisi beberapa iku menyadi kitai ba Sri Lanka, kurang ba pemakai ketegal penyakit COVID-19 ke benung nyadi. Tu nyengkaum Menyadi Imara Fernando sereta anak lelaki iya ke agi mit, iya nya Enosh. Tang, ketegal bisi bantu ari menua bukai, seduai iya ulih ditulung. Seduai iya nulis siti kad ke madah: “Besai terima kasih ngagai semua menyadi ke sayau sereta nulung kami ba maya ti tusah tu. Kami amat gaga ulih nyadi sebagi ari ruang bilik ti besai tu. Kami mega terus besampi, ngambi Petara Jehovah ulih nulung semua menyadi sepemanjai hari ti penudi tu.”

 Enda ngira dini alai bala menyadi kitai, semua sida gaga ati bekunsika semua utai enggau pangan diri. Ngambika chunto, Enosh ngaga siti kutak mit alai iya ulih nyimpan duit, ngambika iya ulih sama enggau meri duit pemeri. Menyadi Guadalupe Álvarez mega ngayanka pengerah jari ti sama. Iya diau ba siti begian di menua Mexico. Gaji orang ba menua nya amat mit, tauka kekadang dalam sehari engka nadai bulih nama-nama utai. Tang menyadi tu, seruran ngiga peluang meri duit pemeri. Iya nulis: “Aku amat beterima kasih ngagai Jehovah ketegal pemanah sereta pengerindu Iya. Aku nemu, duit pemeri aku ke mimit nya deka disegulaika enggau duit pemeri menyadi bukai, lalu nya tentu beguna ngagai bala menyadi ke begunaka bantu.”

 Pampang opis enggau ati ti gaga, nyadung duit pemeri nya ngagai menua ke begunaka bantu. Menyadi Anthony Carvalho, iya nya seiku ari Komiti Pampang Opis Brazil madahka: “Betaun-taun pengawa ba menua kami disukung duit pemeri ari menua bukai. Ketegal sukung tu, semua pengawa ke dikereja ditu ulih dipejalaika enggau manah. Diatu, ekonomi ba menua kami bisi baik agi, nyadi kami ulih nulung orang bukai. Bala menyadi ba ditu nemu, pengawa meritaka Berita Manah begunaka kerejasama ari semua nembiak Jehovah di serata dunya. Nyadi, sida ngiga chara ngambi ulih nyukung ba begian nya.”

 Baka ni Saksi-Saksi Jehovah ulih nulung bala menyadi sida ke begunaka bantu? Ukai terus ngirimka duit ngagai pampang ke bukai, tang meri duit pemeri nengah pengawa nginjil serata dunya. Chara iya, tepuka meh duit pemeri ba kutak ke bisi tanda, “Pengawa Nginjil Serata Dunya” ba Palan Gempuru tauka nengah donate.mr1310.com. Kami amat beterima kasihka semua pemeri ari bala menyadi.