Kena 24 Mei 2022, penusah ti amat jai tu nyadi ba endur ti mit ke dikumbai Uvalde, Texas, Amerika Serikat. Nitihka riput ari The New York Times, “siku lelaki ti besenyata munuh 19 iku anak mit enggau dua iku cikgu . . . ba Sekula Primari Robb.”

 Sinu amat, utai ke jai tu suah nyadi. Berita USA Today madahka ba Amerika Serikat aja, “taun nyin kemari bisi 249 kes timbak ba sekula. Penyampau tu lebih ari taun ke bukai kenyau ari 1970.”

 Nama kebuah utai ke jai tu nyadi? Baka ni kitai ulih tan lebuh napi utai ke jai tu? Ulih kitai pechaya penganas deka nadai agi? Bup Kudus bisi saut.

•   Bup Kudus ngumbai jeman kitai “hari ti penudi” lebuh mayuh orang “jai ati” sereta “mangah,” nya alai sida ngereja mayuh utai ti jai. Orang ke ngereja utai ti jai nya “deka majak jai-sejai.” (2 Timoti 3:1-5, 13) Kena nemu mayuh agi, bacha meh artikel “Kati Ulah enggau Runding Orang Kemayaharitu Mina Ramalan ari Bup Kudus?”

 Mayuh orang nanya, ‘Nama kebuah Petara ngelakka utai ke jai nyadi baka kes timbak ba sekula?’ Peda meh saut Bup Kudus dalam artikel “Mengapakah Perkara Buruk Berlaku kepada Orang Baik?” dalam jaku Melayu.

•   “Semua utai ke udah ditulis dulu kelia ba Bup Kudus endang ditulis kena . . . nulung kitai betan sereta meri kitai peransang.”—Rome 15:4.

 Prinsip Bup Kudus ulih nulung nuan tan napi utai ke jai ba dunya tu. Kena nemu mayuh agi, peda majalah Peratika! ke betajuk “Apakah Kekerasan Akan Berakhir?” dalam jaku Indonesia.

 Nama utai ke ulih digaga apai indai kena nulung bala anak sida lebuh meda berita ti ngenakutka? Peda meh artikel “Tayangan Berita yang Meresahkan dan Anak Anda” dalam jaku Indonesia.

•   “[Petara] ngelepaska sida ari orang ke nekanka pengidup sida, enggau ari orang ke mangah.”—Masmur 72:14.

•   “Sida deka nempa pedang sida nyadika pengeradu tanah lalu sangkuh sida digaga nyadika duku kena nyarau dan kayu. Semua bansa enda agi beperang, lalu nadai agi nyendiaka diri beperang.”—Mikah 4:3.

 Petara ulih ngereja utai ti enda ulih digaga mensia. Perintah Iya ba serega deka ngerusak semua senyata, lalu ngujungka semua penganas. Kena nemu mayuh agi pasal utai ke deka digaga Perintah Petara, bacha meh artikel “Perintah Petara deka Ngenataika ‘Mayuh Pemaik.’”