•   “Riput ari China madah, taun tu cuaca ba China pemadu angat dalam sejarah, lalu tu musin kemarau ti ketiga pemadu balat ke kala nyadi.”—The Guardian, 7 September 2022.

•   “Musin kemarau udah ninggang sekeda endur ba Afrika pengelama lima taun.”—UN News, 16 Ogos 2022.

•   “Lebih ari setengah benua Eropah udah ditangkan pasal musin kemarau. Tu engka musin kemarau ti pemadu balat ke kala nyadi dalam 500 taun ti udah.”—BBC News, 23 Ogos 2022.

 Mayuh bala pakar nyangka musin kemarau ke baka tu deka majak nyadi, sereta majak balat-sebalat. Kati bisi harapan ke jemah ila pasal tu? Nama utai ti dipadah Bup Kudus?

 Bup Kudus madah pasal jeman kitai:

•   “Lapar pungkang . . . deka nyadi ba mayuh bengkah endur.”—Luke 21:11.

 Musin kemarau suah ngasuh lapar pungkang nyadi. Ketegal nya, mayuh orang merinsa lalu mati. Semua tu ngamatka jaku benabi ba Bup Kudus.—Pemandang 6:6, 8.

 Bup Kudus madahka kebuah musin kemarau balat nyadi. Iya madah:

•   “Nadai siku [mensia] bisi kuasa ngatur pengidup diri.”—Jeremiah 10:23.

 Reti iya, mensia enda ulih mujur “ngatur pengidup diri,” tauka merintah diri empu. Mensia suah ngaga pemutus ti salah, lalu tu ngujungka musin kemarau nyadi lalu enda chukup bekalan ai.

•   Mayuh bala saintis setuju pengawa mensia udah ngasuh suhu bumi berubah. Asil iya, musin kemarau majak nyadi ba serata dunya.

•   Ketegal pengamu mensia sereta pemutus bala perintah ke enda berunding pasal jemah ila, mayuh utan dirusak, bisi mayuh pencemaran, sereta mensia salah guna utai semulajadi. Tu ulih ngachau pun ai beresi baka sungai enggau danau.

 Taja pia, Bup Kudus meri kitai harapan.

 Bup Kudus besemaya, Petara deka mutarka penanggul ai. Baka ni?

1.  1. Petara “deka ngemunaska orang ke nganchurka dunya.” (Pemandang 11:18) Iya deka ngemunaska orang ke jai sereta amu ngambika sida badu agi ngerusak alam sekitar.—2 Timoti 3:1, 2.

2.  2. “Pasir ti angat deka nyadi danau, lalu tanah ti rangkai deka penuh laban mata ai.” (Isaiah 35:1, 6, 7) Petara deka ngaduka baru pengerusak ke nyadi ketegal musin kemarau lalu nyadika dunya tu Paradais ti chukup ai.

3.  3. “Nuan ngayanka diri sinu ati ke menua lebuh Nuan ngasuh hari ujan. Nuan ngasuh menua ami.” (Masmur 65:9) Enggau berekat ari Petara, dunya tu deka penuh enggau pemakai sereta ai ti beresi.