Ketegal kami Saksi-Saksi Jehovah, kami rindu berandau pasal pengarap enggau orang ke datai ari mayuh macham pengarap. Tang, ukai reti iya kami setuju enggau semua ajar ba jalai pengarap. Reti iya, kami enda begulai nyembah enggau orang ke enda sama pengarap. Nitihka Bup Kudus, orang Kristian patut “sama besetuju enggau pangan diri”, reti iya sida patut beserakup ba pengarap. (1 Korint 1:10: Epesus 4:16; Pilipi 2:2) Nya kebuah, enda chukup kitai besetuju patut ngayanka kualiti pengerindu, sinu, enggau deka ngampun aja. Tang, pengarap kitai pan patut bepelasarka penemu ti betul nitihka Bup Kudus. Laban, enti nadai penemu ti betul, pengarap kitai pan nadai reti.—Rome 10:2, 3.

 Dalam Bup Kudus bisi madahka, begulai nyembah enggau pengarap bukai nya sempama deka nyengulaika penampak enggau pemetang. Pengawa ke baka nya ulih ngachau pengarap seseiku orang Kristian. (2 Korint 6:14-17) Nya kebuah Jesus enda ngemendarka nembiak iya besetuju enggau semua ajar ba jalai pengarap. (Matthew 12:30; John 14:6) Nitihka ukum Moses, Petara mega nagang orang Israel kelia begulai nyembah enggau orang ke semak diau. (Pemansut 34:11-14) Ketegal nya, orang Israel ke tetap ati nulak bantu ari bansa bukai. Tu nyaga sida ari besetuju enggau semua ajar ba jalai pengarap ke enda sama.—Esra 4:1-3.

 Ka. Baka rasul Paul, kami deka nemu mayuh agi pasal runding sereta pengarap “mayuh agi orang.” (1 Korint 9:19-22) Kami enggau naka ulih nitihka ajar Bup Kudus, lalu ngayanka “basa” maya bejaku enggau orang bukai.—1 Peter 3:15.