Mgbe Chineke malitere ezinụlọ, o nyere ndị nne na nna ọrụ ịzụ ụmụ ha. (Ndị Kọlọsi 3:20) N’ihi ya, ọ bụ nne na nna ka ọ dịịrị ịzụ nwa ha ka ọ hụ Jehova n’anya. Ha kwesịrị ịzụ ya ka ọ ghọọ ezigbo mmadụ mgbe o toro. (2 Timoti 1:5; 3:15) Ha kwesịkwara ịma ihe dị nwa ha n’obi. Ị manụ na ọ na-abụ nne ehi na-ata ahịhịa, nwa ya ana-ele ya anya n’ọnụ. N’ihi ya, nne na nna kwesịrị ibu ụzọ hụ Jehova n’anya tupu ha akụziwere nwa ha ka ọ hụ ya n’anya.—Abụ Ọma 40:8.

IHE BAỊBỤL KWURU: ‘Bụrụ onye na-anụ ihe ngwa ngwa, onye na-adịghị ekwu okwu ngwa ngwa.’ (Jems 1:19) I kwesịrị ịna-akpa àgwà otú ga-eme ka ọ dịrị ụmụ gị mfe ịna-agwa gị ihe dị ha n’obi. Ụmụ gị kwesịrị ịma na ị ga-ege ha ntị mgbe ọ bụla ha chọrọ ịgwa gị ihe. Na-eme ka ahụ́ ruo ha ala ka ha nwee ike ịgwa gị ihe dị ha n’obi. (Jems 3:18) Ọ bụrụ na ụmụ gị ma na ị ga-akatọ ha ma ọ bụ baara ha mba ma ha gwawa gị okwu, ha nwere ike ghara ịna-agwa gị ihe dị ha n’obi. N’ihi ya, na-enwere ha ndidi, na-emekwara ha ihe na-egosi na ị hụrụ ha n’anya.—Matiu 3:17; 1 Ndị Kọrịnt 8:1.

IHE I NWERE IKE IME:

• Ekwela ka ọ na-esiri ụmụ gị ike ịgwa gị okwu

• Gbalịa ka gị na ụmụ gị na-ekwurịta okwu mgbe niile, ọ bụghị naanị mgbe ha dabara ná nsogbu

IHE BAỊBỤL KWURU: “Onye na-egosi na ya nwere nghọta n’okwu ga-enweta ihe ọma.” (Ilu 16:20) Ọ bụrụ na nwa gị agwa gị okwu, i kwesịrị ịgba mbọ ka ị ghọta ihe mere o ji kwuo ihe o kwuru. Ụmụaka na-etinyekarị nnu na ose n’ihe ha na-ekwu. Oge ụfọdụ, ihe ha kwuru anaghị abụcha ihe ha chọrọ ikwu. Ma, cheta na Baịbụl sịrị: “Mgbe onye ọ bụla na-aza okwu tupu ya anụ ya, ọ bụụrụ ya nzuzu.” (Ilu 18:13) N’ihi ya, ewela iwe ma nwa gị kwuo ihe ị na-aghọtachaghị.—Ilu 19:11.

IHE I NWERE IKE IME:

• N’agbanyeghị ihe nwa gị na-agwa gị, abachila ya ọnụ, hapụ ya ka o kwuchaa ihe dị ya n’obi

• Cheta otú obi na-adị gị mgbe ị ha ka ya na ihe ndị i ji kpọrọ ihe mgbe ahụ

IHE BAỊBỤL KWURU: “Nwa m, ṅaa ntị n’ịdọ aka ná ntị nna gị, ahapụkwala iwu nne gị.” (Ilu 1:8) Ọ bụ nne na nna ka Jehova gwara ka ha na-azụ ụmụ ha. Unu kwesịrị ịkụziri ụmụ unu ka ha na-erubere unu isi. (Ndị Efesọs 6:1-3) Ụmụaka na-ama ma nne ha na nna ha hà nwere otu olu n’otú ha si azụ ha. (1 Ndị Kọrịnt 1:10) Ọ bụrụ na gị na di gị ma ọ bụ nwunye gị ekwekọrịtaghị n’ihe ụfọdụ gbasara otú unu si azụ ụmụ unu, unu ekwesịghị ime ka ha mara. Ọ bụrụ na ha amata, ha nwere ike ledawa unu anya.

IHE I NWERE IKE IME:

• Kwekọrịtanụ otú unu ga-esi na-azụ ụmụ unu

• Ọ bụrụ na gị na di gị ma ọ bụ nwunye gị enweghị otu olu n’ihe ụfọdụ gbasara otú unu si azụ ụmụ unu, gee ya ntị ka ị mata ihe mere na o kwetaghị ihe ị na-ekwu

IHE BAỊBỤL KWURU: “Zụlite nwata dị ka ụzọ kwesịrị ya si dị.” (Ilu 22:6) Nwa gị agaghị aba uru ma ọ bụrụ na ị zụghị ya nke ọma. N’ihi ya, unu kwesịrị ịhazi otú unu ga-esi na-azụ ụmụ unu. Cheta na unu kwesịkwara ịna-adọ ha aka ná ntị. (Abụ Ọma 127:4; Ilu 29:17) Ma, ọ bụghị mgbe niile ka e kwesịrị ịta nwatakịrị ahụhụ ma a dọwa ya aka ná ntị. Unu kwesịrị ime ka ha ghọta ihe mere unu ji nye ha iwu. (Ilu 28:7) Kụzierenụ ha ka ha nwee mmasị n’Okwu Jehova, ka ha na-emekwa ihe ha mụtara na ya. (Abụ Ọma 1:2) Ime otú a ga-enye aka zụọ akọnuche ha nke ọma.—Ndị Hibru 5:14.

IHE I NWERE IKE IME:

• Nyere ụmụ gị aka ka ha mata Chineke, matakwa na ha kwesịrị ịtụkwasị ya obi

• Nyekwara ha aka ka ha mata ihe ndị nwere ike ime ka ha tinye aka n’omume rụrụ arụ nakwa otú ha ga-esi na-ezere ha. Kụziere ha ihe ha ga-eme ma mmadụ chọọ ka ha na ya nwee mmekọahụ