Mgbe Nsogbu Mere Ka Ọ Dị Gị Ka Gị Nwụọ

KPỌWA

E nwere otu nwaanyị bi na Brazil aha ya bụ Adriana. Nchegbu mere ka ọ malite ịrịa ọrịa na-eme ka isi ghara ịkpakọcha mmadụ ọnụ. O kwuru, sị: “Obi na-ajọkarị m njọ, ike ụwa ana-agwụ m, mụ ekpebie na ọ kaara m mma igbu onwe m.”

Ò NWETỤLA mgbe obi nọ na-ajọ gị ezigbo njọ nke na ọ dị gị ka ọnwụ bịa gbuo gị? Ọ bụrụ na o nweela, ị ga-aghọta otú obi dị Adriana.

E nwekwara otu nwoke onye Japan aha ya bụ Kaoru. Ọ na-elekọta nne na nna ya merela agadi ma na-arịa ọrịa. Ọ sịrị: “N’oge ahụ m na-elekọta ha, nsogbu zuru m ahụ́ n’ụlọ ọrụ anyị. Ka oge na-aga, agụụ anaghịzi agụ m, ihi ụra ana-esikwara m ike. M maliteziri iche na nsogbu a niile ga-ebikwanụ ma ọ bụrụ nnọọ na mụ anwụọ.”

Otu nwoke onye Naịjirịa aha ya bụ Ojebode kwuru, sị: “Obi na-ajọkarị m njọ nke na m na-anọkata bewe ákwá. N’ihi ya, m chọwara otú m m ga-esi gbuo onwe m.” Obi dị anyị ụtọ na Ojebode, Kaoru, na Adriana emechaghị gbuo onwe ha. Ma, n’afọ ọ bụla, ọtụtụ narị puku mmadụ na-egbu onwe ha.

EBE ANYỊ GA-ENWETA ENYEMAKA

Ọtụtụ n’ime ndị na-eji aka ha egbu onwe ha na-abụkarị ụmụ nwoke. Ihe mere ọtụtụ n’ime ha ji gbuo onwe ha bụ na ihere ekweghị ha rịọ ka e nyere ha aka. Ma, Jizọs sịrị na mkpa ọgwọ ọrịa dị ndị ahụ́ na-enye nsogbu. (Luk 5:31) Ọ bụrụ na obi na-ajọkarị gị njọ nke na ị na-eche banyere igbu onwe gị, biko ihere emela gị ikwu ka e nyere gị aka. Ọtụtụ ndị ụdị ihe a na-eme achọpụtala na ịga ụlọ ọgwụ enyerela ha aka inwetatụ onwe ha ma na-edi ya. Ma Ojebode ma Kaoru ma Adriana gachara ụlọ ọgwụ, e nyere ha aka. Ugbu a, ha enwetatụla onwe ha.

Ndị dọkịta nwere ike inye onye ahụ ọgwụ ma ọ bụ ha na ya ana-ekwurịta okwu ma ọ bụkwanụ ha emee ha abụọ iji nyere ya aka. Ọ na-adịkwa mma ka ndị ezinụlọ na ndị enyi onye ụdị ihe a na-eme na-aghọta ha, na-enwere ha ndidi, na-elekọta ha ma na-enyere ha aka. Enyi kacha enyi onye ọ bụla nwere ike inwe bụ Jehova Chineke. Ọ na-eji Okwu ya bụ́ Baịbụl enyere ndị mmadụ ezigbo aka.

È NWERE IHE GA-EME KA NSOGBU A KWỤSỊ KPAMKPAM?

O nwere ike ịdị mkpa ka a na-agwọ ndị obi na-ajọkarị njọ ma ọ bụ ndị isi na-akpakọchaghị ọnụ ruo ogologo oge. O nwekwara ike ịdị mkpa ka ha gbanwee otú ha si eme ihe ụfọdụ. Ma, ọ bụrụ na i nwere ụdị nsogbu a, nwee olileanya na ihe ga-adị mma n’ọdịnihu, otú ahụ Ojebode nwere. O kwuru, sị: “M na-atụ anya mgbe ihe e kwuru n’Aịzaya 33:24 ga-emezu. Ebe ahụ kwuru na oge na-abịa mgbe a na-enweghị onye bi n’ụwa ga-asị: ‘Ana m arịa ọrịa.’ ” Chineke kwekwara nkwa na a ga-enwe “ụwa ọhụrụ” nke “ihe mgbu” na-agaghịzi adị na ya. Ka nkwa a mee ka obi sie gị ike ka Ojebode. (Mkpughe 21:1, 4) Ihe ọ pụtara bụ na ihe niile na-enye mmadụ nsogbu n’obi ga-ala ka naị. O nweghịzi mgbe obi ga na-ajọ gị njọ. Ị gaghịzi “echeta [ihe niile na-echegbu gị], ha agaghị abatakwa [gị] n’obi.”—Aịzaya 65:17.

Amaokwu Baịbụl Nwere Ike Inye Aka

Chineke na-aghọta otú obi dị gị.

“Mụ onwe m, bụ́ Jehova Chineke gị, sekpụ gị n’aka nri gị, . . . na-asị gị, ‘Atụla egwu. Mụ onwe m ga-enyere gị aka.’”—Aịzaya 41:13.

Jehova na-aghọta otú obi dị anyị karịa onye ọ bụla ọzọ, ọ chọkwara inyere anyị aka.

Na-atụgharị uche n’Okwu Chineke.

“[Ịlaịja kpọkuru] Jehova rịọọ ya ka o wepu ndụ ya. ‘. . .Jehova m, biko wepụ ndụ m.’”—1 Ndị Eze 19:4. Baịbụlụ Nsọ nke International Bible Society.

Ojebode kwuru, sị: “Ịtụgharị uche n’Okwu Chineke nyeere m aka. M chọpụtara na o nwere mgbe ọ dị Ịlaịja onye amụma otú ọ dị m.”

Mụta ihe n’aka ndị a kọrọ gbasara ha na Baịbụl.

Jizọs kwuru, sị: “Arịọsiwo m arịrịọ ike maka gị [ya bụ, Pita] ka okwukwe gị wee ghara ịda mbà.”—Luk 22:32.

Mgbe Pita onyeozi gọnahụchara Jizọs, o wutere ya nke ukwuu, ya ebee ezigbo ákwá. Kaoru kwuru, sị: “Ịtụgharị uche n’ihe Pita mere na otú Jizọs si meso ya mere ka m ghọta na mwute Pita nwere metụrụ Jehova na Jizọs n’obi. Ihe a mere ka obi sie m ike.”

Ị gaghịzi “echeta [ihe niile na-echegbu gị], ha agaghị abatakwa [gị] n’obi.” —Aịzaya 65:17