Ịpyị-Adịrahụ nya Ohe Oluhye ri eji ọkpakpa nyamwụ e-epwoohe. Ọ kà ta igomenti ịlodehe ịlẹ wuu ayịreji gbanggbang bala ọ-ka họ irya nya Ohe Oluhye jịra e-epwoohe bala odehe. Ụkụrwọ ọlẹ ká Ohe Oluhye wẹẹ ka kpa Ịpyị-Adịrahụ nyamwụ họ ri oja ọnyịịla. Lụka kpii, Ịpyị-Adịrahụ nya Ohe Oluhye ka họ ịbaba nya angịnyị ehe wuu haa, nyọka la igomenti ọnyịịla. Ọ ka họ ọng myị́ ọng ka yẹjula awụlẹ ám̀ odehe ọlẹ.—Wa ỊDanẹlụ 2:44; ỊMatiyu 6:9, 10; 24:14.

Ịpyị-Adịrahụ ọnyị myị́ ọnyị kaa la adịrahụ pyii. Lẹ, iJihova chụ iJisọsị ịKịrayịsị, ọnyị nyamwụ nyọka ri adịrahụ nya Ịpyị-Adịrahụ nyamwụ.—Wa Ọwụrụụ-wụrụ 11:15.

Yẹ ifim What Is Godʼs Kingdom?

Ọnyị nya Ohe Oluhye à chịla nyọka ri Adịrahụ lẹ, chajị ọ la dụmwọ, ọ tị kaa yụbwọ chị abwẹla ọnyịịla gịrị-gịrị. (ỊMatiyu 11:28-30) Ọ myịmyị la ọngịrị nwa nyọka da angịnyị ụbwọ chajị ọ ka kpeji bwu epwoohe wẹ odehe ọlẹ. Nyọlẹ ká iJisọsị wuleji bwula igu kpá, ọ rụ ka epwoohe kaka hụhụ juwa kụ ọlẹyị ụ-ụpwụrịrị nya iJihova. (Ala iHiburu 10:12, 13) Ụka ohyẹẹkpẹ, Ohe Oluhye ya ọngịrị nyọka ri adịrahụ họọ.—Wa ỊDanẹlụ 7:13, 14.

Ebwo nya angịnyị ịlẹ kị wụrụ nya “angịnyị nya Ohe Oluhye” lee angị la ịgọgọ ka kpeji ta iJisọsị e-epwohe. (ỊDanẹlụ 7:27) Angị la ịgọgọ ịlẹ kị́ chụ họhẹ-họhẹ ri angịjụgbẹyị nya iJisọsị ịlẹ kị́ la ọmyịmyị. IJihova tị́ kịnyaa la ọ-chụ alẹng bala anyang ịlẹ kị́ la ọmyịmyị gbee da ụka ọlẹ wẹẹ. Angịịwa ka wuleji bwula igu la abwụma nya olegu lala iJisọsị ịnyịnyị.—Wa ỊJọn 14:1-3; 1 Ala ịKọrịntị 15:42-44.

 Angị ịmanyị à tị́ kà ka e-epwoohe? IJisọsị wụrụ angịịwa nya “ịkpịlọ ichiche” (ILuku 12:32) Ịwa wuu ka la angị ụnọ ohu da iwo ine kụrụ ine (144,000). Ị ka kpeji tọ iJisọsị u-uhye nya odehe ọlẹ wuu.—Wa Ọwụrụụ-wụrụ 14:1.

Ịpyị-Adịrahụ nya Ohe Oluhye dọmwụ nyọka kpeji la ẹka nya 1914. * Ang ọhọhẹ-họhẹ ọlẹ ká iJisọsị họ ụka ọlẹ kọ ri Adịrahụ ri, ọ chị Olegu Onyobyi bala angịnyị nyamwụ abwọ da wẹ odehe. Olegu Onyobyi ju agbama pwuu, lẹ ọ domwụ nyọka kpa akama ọtụka-tụka wẹ alodehe ọlẹ lẹlẹ. (Ọwụrụụ-wụrụ 12:7-10, 12) Bwu ụka ọwẹ, akama lụmẹ gụ ọọwa ha angịnyị ehe. Ẹwụ ọdada, imyi nya uhi, ẹdụrụ, bala ọpyị ọ-hụ́ jigi-jigi ri “ang ị-ju ẹjẹẹ” ịhyẹ ịlẹ kị́ mẹjẹ nyori, lụka kpii, Ịpyị-Adịrahụ nya Ohe Oluhye ka dọmwụ nya o-kpeji u-uhye nya odehe ọlẹ.—Wa ILuku 21:7, 10, 11, 31.

Ịpyị-Adịrahụ nya Ohe Oluhye wẹẹ tụ iru nya angịnyị guru bwu ẹpwụma nya odehe wuu bwula ẹru ọnyịịla ọ-kpa pyẹ. Uku-uku nya angị la dụmwọ tị wẹẹ kpịlaa keji e-ekpeleji nya Ịpyị-Adịrahụ nya Ohe Oluhye, bala iJisọsị Adịrahụ ịnyịnyị. Ịpyị-Adịrahụ nya Ohe Oluhye ka chewu kaa, ụka kọ́ ka ta Odehe onyobyi ọlẹ ayịreji. Ọ baba ká ọng myị́ ọng ọlẹ kọ́ tịtọ nyọka ye apyobwuna bwu Ịpyị-Adịrahụ ọwẹ ka ju ihi nya iJisọsị bala ọ-kpa ịlọmwụ ka ji ekpeleji nyamwụ.—Wa Ọwụrụụ-wụrụ 7:9, 14, 16, 17.

Ẹ-ẹpwụ nya ẹka ụnọ ookpokpo (1,000), Ịpyị-Adịrahụ ọwẹ ka họ irya ọlẹ ká Ohe Oluhye la u-uhye nya angịnyị ehe wuu jịra. Ẹga myị́ ẹga nya odehe ọlẹ wuu ka ri ịParadayịsị. Ọọwa lẹ, iJisọsị à ka tụụbwọ hi Ịpyị-Adịrahụ ọwẹ ju adamwụ ụ-ụbwọ tịrẹkpẹ lẹlẹ. (1 Ala ịKọrịntị 15:24-26) À jẹ́ ọngọhẹ ọlẹ á ka jẹ́-ẹ ya ẹla nya Ịpyị-Adịrahụ nya Ohe Oluhye ju?—Wa Eje Ọnyịịla 37:10, 11, 29.