ANG ỌJẸ́JẸ 02
ỊBayịbụụ Ya Ẹhị Ọrịrịị-rịrị Hahị
Angịnyị lụmẹ-lụmẹ la akama ịlẹ kị kaa ju ọmwụ nya ọkịlẹtụ okpenyi, imahị omeme, bala ajụjụ. Ọhịhị nyang lịnyị ụka ọhẹ lẹ? Ọhẹka à jụ ẹdụrụ lee ọngịnyị nyang ọhẹ gbu hing. À ka juwa me irya ju ịlọng myị́ yẹkẹẹ, ‘Ọhịhị ka jẹ́-ẹ há gụ ọlẹ myị́ ẹnẹnẹhẹ wẹẹ?’ ỊBayịbụụ wẹ ịtọ ẹla ọwẹ ụ-ụgbẹyị ọlẹ kọ ka kpụ́ụhị ẹjẹ.
1. Ẹhị ọrịrịị-rịrị oyina ịBayịbụụ à tị́ ya hahị?
ỊBayịbụụ ya ang odudu ká akama myị̀ odehe ị-ịlẹ. Ọ myịmyị jahị oja ọnyịịla nyori akama ịwẹ wuu nyị ja cheju lụka o-kpii. Ehe ọchịchị ọlẹpwụ nya ịBayịbụụ ka jẹ́-ẹ ya ‘ijuju o-hiigu’ bala ẹhị ọrịrịị-rịrị hang. (Wa iJeremaya 29:11, 12.) Ehe ọchịchị ịịwa ka jẹ́-ẹ dahị ụbwọ nyọka bọhụ ẹ-ẹpwụ nya akama nyahị bala ọ-dọmwụ chị ọkẹkẹnị lẹẹlẹẹ. Ị myịmyị họ ahị jẹ́ myị̀myị̀ nyori ahị ka chị ọkẹkẹnị gboyi myị́ oyi.
2. Ányị ịBayịbụụ à tị́ ya ká ijuju ka la?
ỊBayịbụụ ya nyori ị-ịlahị, ‘igu ogbugbu ọhẹ-lọhẹ á ka ji kaka. Lee, ida ọbaba bala ida ojeje ọhẹ-lọhẹ ọ-ka jiji kaka. Lee, ang ojuju ọhẹ-lọhẹ, ọ-ka ji kaka ịnyịnyị.’ (Wa Ọwụrụụ-wụrụ 21:4.) Akama ịlẹ kị du ká ọhịhị lujwo alẹ á ka jam ụka ọọwa kaka, ang lala ẹbyahị, ẹla ọkịrọrọ, ẹdụrụ, bala igu. ỊBayịbụụ chehe nyori angịnyị ehe nyị ka jẹ́-ẹ hịhị gboyi myị́ oyi ị-ịParadayịsị ám̀ odehe ọlẹ.
3. Ányị a tị́ ka bwu jẹ́ myị̀myị̀ nyori ehe ọchịchị ịlẹpwụ nya ịBayịbụụ ka họ jịra?
Angịnyị lụmẹ-lụmẹ yẹhị rịrị ká ang ịnyịịla ka họ, ma ị́ jẹ́ kori ká ẹhị ọrịrịị-rịrị nyaa ka họ jịra ka. Ehe ọchịchị ịlẹpwụ nya ịBayịbụụ tị datị. Ahị ka jẹ́-ẹ họ ahị ọdahile nyahị u-uhye nya ẹla ọlẹ ká ịBayịbụụ ya ka la ọngịrị gụ ọọwa kori kahị “kụ ẹhị yẹ Ụpwụ Ịgọgọ . . . chẹrị-chẹrị.” (Ụkụrwọ nya Alẹrụ 17:11) Jaabwọ ká wẹẹ jẹ́ ịBayịbụụ, à ka jẹ́-ẹ cheje ha ịlọng kori ká ka dahịhile ẹla ọlẹ ko ya u-uhye nya ijuju lee kori ká ka dahịhiloo ka.
JẸ́ GỤ ỌỌWA
Kụ ẹhị yẹ ehe ọchịchị ịlẹpwụ nya ịBayịbụụ ịhyẹ u-uhye nya ijuju. Yẹ jaabwọ ká ẹhị ọrịrịị-rịrị ọlẹ ká ịBayịbụụ ya ha angịnyị wẹẹ daa ụbwọ alẹ.
4. ỊBayịbụụ ya ẹhị ọrịrịị-rịrị hahị nyori ahị nyị ka jẹ́-ẹ la ọhịhị ọmyịmyị-ka ẹ-ẹpwụ nya iwe-ahụrụ ọkpẹẹkpẹẹ
Yẹ ehe ọchịchị ịhyẹ ịlẹpwụ nya ịBayịbụụ wẹ e-eji. Iyina bwu ẹpwụ nyaa à tị́ kpụng ịpyọ gụ? Ịyẹ tị́ du?
Wa ụpwụ ịgọgọ ịlẹ kị da ẹ-ẹga nya ehe ọchịchị ịwẹ, kanụ kụ ẹhị yẹ ịtọ ẹla ịlẹ:
-
À me irya ká ụpwụ ịgọgọ ịwẹ ju apyobwuna hang? Ị ka ju apyobwuna ha ọngọhẹ ugbiyegu nyang lee aligu nyang?
Yẹ ịlọng odehe ọlẹ ká
|
ỌNGỌNGỌHẸ Á KA . . . |
ỌNG MYỊ́ ỌNG WUU KA . . . |
|---|---|
|
|
|
|
|
|
|
|
|
|
5. Ẹhị ọrịrịị-rịrị ọlẹpwụ nya ịBayịbụụ ka jẹ́-ẹ dahị ụbwọ
Akama ịlẹ ká angịnyị lụmẹ-lụmẹ yẹ dagaga jwaa du ká ọkịlẹtụ kaa kpaa enyi lee ọ-dọmwụ du agbama jwaa. Angịhyẹ kaa ma uya nyọka yẹ ang da ka ọ-há gụ. Yẹ jaabwọ ká ehe ọlẹ ká ịBayịbụụ chị nyori ang nyị ka há gụ ọlẹ, wẹẹ da angịnyị ụbwọ lẹẹlẹẹ. Yẹ IFIM ọwẹ, kanụ ya ẹla u-uhye nya ịtọ ẹla ịlẹ.
-
Jaabwọ ká yẹ ẹ-ẹpwụ nya ifim ọwẹ, ẹla ọkịrọrọ oyina à tị́ ri akama nya Rafika?
-
Nanana nyori ẹla ọkịrọrọ ọọwa á myị́ yịra-yịra ka, ányị ịBayịbụụ à tị́ dọọ ụbwọ?
Ẹhị ọrịrịị-rịrị ọlẹ ká ịBayịbụụ ya hahị ka jẹ́-ẹ dahị ụbwọ nyọka kụrụ ọkịlẹtụ okpenyi bala ọ-ka bọhụ ẹ-ẹpwụ nya akama nyahị. Wa Etu 17:22 bala Ala iRom 12:12, kanụ ya ẹla u-uhye nya ịtọ ẹla ịlẹ:
-
À me irya nyori ẹla ọlẹ ká ịBayịbụụ ya u-uhye nya ijuju ka jẹ́-ẹ da ọhịhị nyang ụbwọ? Ịyẹ tị́ du?
ANGỊHYẸ KAA YẸKẸẸ: “Ehe ọchịchị nya ịBayịbụụ u-uhye nya ijuju há kpoye nyọka ri ẹlịlẹhị.”
-
Ịyẹ tị́ du ká baba nyọka kụ ẹhị yẹ ẹlẹwẹ lịlọng?
ẸLỊYẸ A TỊ́ JẸ́?
ỊBayịbụụ chehe lụmẹ-lụmẹ u-uhye nya ijuju nyahị ọ-ka ju ọkẹkẹnị. Ọọwa tị kaa ya ẹhị ọrịrịị-rịrị hahị bala ọ-da ọhịhị nyahị ụbwọ lẹẹlẹẹ.
Ẹlịyẹ A Tị́ Yụbwọ Chị?
-
Ịyẹ tị́ du ká angịnyị baba nyọka jẹ́ ang u-uhye nya ehe ọchịchị nya Ohe Oluhye?
-
Ẹlịyẹ ịBayịbụụ à tị́ ya u-uhye nya ijuju?
-
Ányị ọ-la ẹhị ọrịrịị-rịrị u-uhye nya ijuju à tị́ ka jẹ́-ẹ dang ụbwọ lẹẹlẹẹ?
JẸ́ ANG ỊLẸ DỌỌ U-UHYE
Jẹ́ jaabwọ ká ẹhị ọrịrịị-rịrị ka jẹ́-ẹ dang ụbwọ ụka á la akama.
“Ẹhị Ọrịrịị-rịrị—Ale A Tị́ ka Yoo?” (Awake! nya ahyẹẹnụ 22 nya Ọya Ohene, 2004)
Yẹ jaabwọ ká ẹhị ọrịrịị-rịrị u-uhye nya ijuju ka jẹ́-ẹ da angịlẹ kị la ẹdụrụ ọnyọọngịrị ụbwọ.
“ỊBayịbụụ ka Jẹ́-ẹ Dụbwọ Kori ká Ọngịnyị á La Ẹdụrụ Ọnyọọngịrị?” (Ụpwụ ọla intanẹtị)
Jaabwọ ká wẹẹ yẹ ifim nya eje ọwẹ, yẹ ịlọng bala ugbiyegu nyang ụ-ụwa ị-ịParadayịsị ọlẹ ká ịBayịbụụ chehe.
Wa ụpwụ u-uhye nya abwọ ká ọhịhị nya ọngọlẹ kọ kaa ma uya nyọka yẹ ang da ha alụma, yẹda nyọlẹ kọ jẹ́ ang u-uhye nya ẹhị ọrịrịị-rịrị ọlẹpwụ nya ịBayịbụụ chajị nya ijuju.
“Ḿ Ya Nyori M̀ ka Ye Odehe Da Pyii Kaka” (Ẹpwang ọ-Kụ Gbeji nya ahyẹẹnụ 1 nya Ọya Ọharwiye, 2013)
