1. Āhị iyina ahị tị́ ye bwu ẹga nya iJisọsị?

 ỌNGỌNGỌHẸ-Ẹ́ ji kọ jẹ́ da angịkịla ụbwọ lala iJisọsị ẹnẹnẹhẹ lẹka. Ụka kọ jam odehe, ọ kaa kpa ọngịrị nya ụkụrwọ ẹbyẹbyị nyamwụ da angịnyị ụbwọ la angịịwa ọ-nwọọ uri ka. (Luk. 9:12-17) Ọ hu āhị ọgụgụ wuu hahị bwula o-hu ọhịhị nyamwụ kiliya chajị nyahị. (Jọn. 15:13) Nyọlẹ ká iJisọsị tị wuleji bwula igu kpá, ọ wẹẹ kịnyaa la ọ-dahị ụbwọ. Jaabwọ kọ myọnụ, ọ bịlẹ ká iJihova ka ya olegu nyamwụ hahị, ọlẹ kọ ka mẹ ang jẹ́ẹhị bala ọkpụ́ụhị ẹjẹ. (Jọn. 14:16, 17; 16:13) Bwula ọjịra-jịra nyahị, iJisọsị kịnyaa la ọ-ya ang ịlẹ kahị baba hahị nyọka jẹ́-ẹ mẹ ịBayịbụụ jẹ angịnyị odehe wuu bala ọ-ka họ kị ka ri angịjugbẹyị.—Mat. 28:18-20.

2. Owo anyị à tị́ ji ẹpwụ nya angị ịlala “ang āhị” ịlẹ kị ya ẹla rụ ụ-ụpwụ nya Ala Efesọsị 4:7, 8?

² IJisọsị ya āhị ọkịla hahị myị́myị́. Ọlẹrụ ịPọlụ da ụpwụ nyori nyọlẹ ká iJisọsị rụ ka epwoohe kpá, “ọ hu angịnyị ehe ha lala ang āhị.” (Wa Ala Efesọsị 4:7, 8.) ỊPọlụ wụlẹ nyori iJisọsị hu āhị ịwẹ ha nyọka da ọjịra-jịra ụbwọ a-agbẹyị ịdatị-datị. (Efe. 1:22, 23; 4:11-13) Alẹ, ‘angịnyị ị-lala ang āhị’ ịwẹ ri angị myị ẹrụ, angịgbahị nya ọjịra-jịra, bala angị kpẹhị rịrị isekut. a Ẹlịlẹhị tị ri, angịwẹ á la kpẹẹkpẹẹ ka lẹ, ị kaa chị ụchụụ. (Jem. 3:2) Ma Ọngọlahị iJisọsị ịKịrayịsị tị kaa kpaa dahị ụbwọ; ị ri āhị hahị.

3. Ya ọ-chụ pwokwita nya abwọlẹ kaahị wuu ka jẹ́-ẹ da ụkụrwọ nya ‘angịnyị ịlala ang āhị’ ụbwọ wẹẹ.

³ IJisọsị ya ụkụrwọ ha ‘angịnyị ịlala ang āhị’ ịwẹ nyọka kpa ọjịra-jịra nwa. (Efe. 4:12) Ma, ahị angị ihihi ka jẹ́-ẹ daa ụbwọ nyọka jụ ụkụrwọ ọkpọnchị ọwẹ họ. Nyọka chụ pwokwita:  Angịhyẹ nyahị kaa nwụ Ube nya Ịpyị-Adịrahụ kpangga. Angịkịla kaa da ụbwọ ẹ-ẹpwụ nya ụkụrwọ ọwẹ bwula ọ-kpa ang oriri bala ang ịkịla ịlẹ kị baba warị. Ịnyịnyị-ịnyịnyị, bwula ẹla oyaya bala ọhọhọ nyahị, ahị wuu ka jẹ́-ẹ da angị myị ẹrụ, angịgbahị nya ọjịra-jịra, bala angị kpẹhị rịrị isekut ụbwọ chajị ka ọjịra-jịra ka nwà kịlahị. Ahị kụ ẹhị yẹ abwọlẹ kahị kaa yé apyobwuna bwu ụkụrwọ ọtụka ọlẹ kị kaa họ bala abwọlẹ kahị ka mẹjaa ịwa bala iJisọsị, ọngọlẹ kọ ya ‘angịnyị ịlala ang āhị ịwẹ’ hahị, nyori ẹla nyaa myịhị lẹhị wẹẹ.

ANGỊ MYỊ ẸRỤ KAA “DA ANGỊNYỊ ANGỊKỊLA ỤBWỌ”

4. Agbẹyị iyina angị myị ẹrụ à tị́ bwu da angịkịla ụbwọ lụka nya oyi ọhọhẹ?

⁴ Lụka nya oyi ọhọhẹ, ị kaa chụ alẹng ịhyẹ nya angị myị ẹrụ. (1 Tim. 3:8) Ọ lala o-ri ịwa à ri angịlẹ kị la “ọhaha ọ-kpa da angịnyị angịkịla ụbwọ” ká ịPọlụ ya ẹla rụ lẹ. (1 Kọr. 12:28) Angị myị ẹrụ kaa kpahị ju akụrwọ ịlẹ kị baba yẹẹyẹẹ, chajị ká angịgbahị nya ọjịra-jịra ka jẹ́-ẹ yẹhị rịrị ụkụrwọ nya ang ọmẹjẹ bala ọ-kpahị ju aanahị. Ọ-chụ pwokwita, ọ chịkpẹẹ myị́ ká angị myị ẹrụ dụbwọ ẹ-ẹpwụ nya ịBayịbụụ ọ-kịlaju lee ọ-dụbwọ rang ịlẹ kị baba nyọka kpa họ ụkụrwọ ọwẹ.

5. Akụrwọ ịnyịịla iyina angị myị ẹrụ à tị́ kaa họ alẹ?

⁵ Kụ irya u-uhye nya akụrwọ ịnyịịla ịlẹ ká angị myị ẹrụ kaa họ ọọjịra-jịra nyang wẹẹ. (1 Pit. 4:10) Ị ka dụbwọ họ akụrwọ ụma ịlẹ ọọjịra-jịra myị́: ọ-wa okpoko ọlẹ kị ya juka ẹpwụ nya akpa, nwụla ẹga ọlẹ kị ka ya ẹla nya Ohe nọ, du ẹrụ nyọka ya apwụ du wẹ ala ọjịra-jịra, nwụla ang-abwọ ị-kpa du eje bala ị-kpa mẹ ifim jẹ nọ, họ ụkụrwọ nya angị da ụbwọ, lee ọ-kpahị ju Ube nya Ịpyị-Adịrahụ. Ang ịwẹ wuu baba yẹẹyẹẹ chajị ká ọjịra-jịra ka jẹ́-ẹ la kẹm-kẹm. (1 Kọr. 14:40) Myị́myị́, angị myị ẹrụ ịhyẹ kaa la ụpa ẹ-ẹpwụ nya ọjịra-jịra nya Ọhịhị Bala Ụkụrwọ Nyahị Ahị Angịnyị nya ỊKịrayịsị bala ẹla o-ya dodehe bwu ịBayịbụụ ha alụma ịnyịnyị. Ị ka jẹ́-ẹ chụ ọngọ myị ẹrụ nyọka da ọngọ kpẹhị rịrị ebwo nya angị kpa ẹrụ ọnyịịla pyẹ ụbwọ ịnyịnyị myị. Ụka ọhẹ, ọngọgbahị nya ọjịra-jịra kaa kpa ọngọ myị ẹrụ ba ịlọmwụ ụka kọ ja ka ju ọngọhẹ bwu ọjịra-jịra ọhụ.

6. Ịyẹ à tị́ du ká ẹla nya angị myị ẹrụ kaa myịhị lẹhị?

⁶ Apyobwuna oyina ala ọjịra-jịra à tị́ kaa yé bwu ụkụrwọ nya angị myị ẹrụ? Ọọnahị ọnyang ọhẹ bwu Bolivia ká ẹnyị nyamwụ ri Beberly b yẹkẹẹ: “M̀ ji angị myị ẹrụ obe ọhọhọ nyọlẹ kam jẹ́ yé apyobwuna yẹẹyẹẹ bwu ọjịra-jịra. Ụkụrwọ ọlẹ kị kaa họ du kam jẹ́ mwu eje, wẹ ẹla, ke ụrụ wo ẹla bwu ịlahị, bala ọ-jẹ́ ang bwu ẹpwụ nya ifim bala arụrụ ịle kịị mẹjẹ. Ị kaa họ ụkụrwọ nya eji ogbegbe chajị ká aanahị ịla ọjịra-jịra ka la ewu ọ-chịke bala ọ-da angịlẹ kị kpa ẹta pwụ ọjịra-jịra myị́ ka ụbwọ nyọka jẹ́-ẹ yẹ jula angịkịla bwu ọhụ. Ụka ká ọjịra-jịra á myị́ kpá, ị kaa kụ ịlahị ẹ-ẹpwụ nya ẹga ọ-kpa cheri-cheri, ị kaa da ọngọ kpẹhị rịrị okpoko ụbwọ, bala ọ-jẹ́ myị̀myị̀ nyori ahị la apwụ ịlẹ kahị baba. Ẹla nyaa myịm lẹhị yẹẹyẹẹ!” Leslie, bwu Colombia ká ọrụmwụ ri ọngọgbahị nya ọjịra-jịra, yẹkẹẹ: “Ọrụm baba nya ụbwọ ọdada nya angị myị ẹrụ nyọka kpahị ju akụrwọ ịdatị-datị. Ó-ri ịwa ka ịnọ, ọrụm á ka la ụka gbuu ka, ẹla nyaa myịm lẹhị chajị nya olegu nya ụkụrwọ ọhọhọ ọlẹ kị la bala ọ-myọnụ nyọka da ụbwọ.” Ị-ịwẹ ọ lahị wuu ịnyịnyị lẹ.—1 Tim. 3:13.

7. Ányị ahị tị́ ka jẹ́-ẹ mẹjẹ nyori ẹla nya angị myị ẹrụ myịhị lẹhị? (Yẹ ifoto ịnyịnyị.)

⁷ Nanana nyori ẹla nya angị myị ẹrụ ka myịhị lẹhị ọ-ọkịlẹtụ myị́, ịBayịbụụ juhi ọhụ nyọka mẹjáa ịnyịnyị nyori ẹla nyaa myịhị lẹhị. (Kol. 3:15) Krzysztof, ọngọgbahị nya ọjịra-jịra ọhẹ bwu Finland, ya jaabwọ kọ kaa mẹjẹ nyori ẹla myọọ lẹhị ị-ịlẹ: “M̀ kaa da ụpwụ ịgọgọ ọhẹ  bala o-gu ẹnyị nya ịngịhyẹ kpangga ọlẹ ká ọngọ myị ẹrụ họ kọ ya ọhụ ojuju ham ju ụpwụ du kịlọọ lee ọ-dọọ bwu ifon du kịlọọ.” Pascal bala Jael, kị kụ New Caledonia, kaa raabwọ chajị nya angị myị ẹrụ kpangga. Pascal yẹkẹẹ: “Kpanjẹ wẹ, ahị kaa raabwọ yẹẹyẹẹ chajị nya angị myị ẹrụ, ji iJihova obe chajị nyaa bala ọ-bịlẹ kọ ka daa ụbwọ.” IJihova kaa wẹ abwọ ọrịrị ọlịịwẹ, ọjịra-jịra wuu tịị yé apyobwuna ịnyịnyị.—2 Kọr. 1:11.

ANGỊGBAHỊ NYA ỌJỊRA-JỊRA KAA “NWỤ ỊLAA LA ỤKỤRWỌ . . . Ẹ-ẸPWARỊRỊ NYANỤ”

8. Ịyẹ tị́ du ká Ọlẹrụ ịPọlụ ya nyori angịgbahị nya ọjịra-jịra ịla oyi ọhọhẹ nyị kaa “nwụ ịlaa la ụkụrwọ”? (1 Ala ịTẹsalonika 5:12, 13)

⁸ Angịgbahị ịla oyi ọhọhẹ họ ụkụrwọ yẹẹyẹẹ ọọjịra-jịra. (Wa 1 Ala ịTẹsalonika 5:12, 13; 1 Tim. 5:17) Ị kaa “kpẹhị rịrị” ala ọjịra-jịra bwula ọ-kpa ịlahị nya ang ọmẹjẹ bala ọ-cheje nya ẹla ọọjịra-jịra. Ị kaa ‘gbile aanaa ụbwọ ụ-ụrụ’ chajị kị ka jẹ́-ẹ́ ya ụbwọ chị ọmyịmyị nyaa gogo. (1 Tẹs. 2:11, 12; 2 Tim. 4:2) Ịnyịnyị, ị kaa maga nyọka họ ịbaba nya ugbiyegu nyaa bala ọ-ka họ kị ka godayị giri-giri ẹ-ẹpwụ nya ang nya olegu.—1 Tim. 3:2, 4; Tay. 1:6-9.

9. Akụrwọ iyina angịgbahị nya ọjịra-jịra à tị́ la kaa họ alẹ?

⁹ Angịgbahị nya ọjịra-jịra ịla ụka nyahị ịnyịnyị kaa họ ụkụrwọ yẹẹyẹẹ. Ị ri angị kpa ẹrụ ọnyịịla pyẹ. (2 Tim. 4:5) Ị kaa kpa ịlahị ẹ-ẹpwụ nya ẹrụ ọnyịịla ọ-kpa pyẹ la ila ọchịchị, ị kaa nwụla ẹga ká ala ọjịra-jịra ka kpa ẹrụ ọnyịịla pyẹ nọ, bala ọ-mẹ ang jẹẹhị chajị kahị ka jẹ́-ẹ ya ẹla nya Ohe bala ọ-mọọ jẹ yẹẹyẹẹ. Ị rị angịleje ịlẹ kịị yẹ ahyẹẹrwẹrwa bala ọ-yẹ oye-oye ka ịnyịnyị. Ụka ká ọngọhẹ á họ ọhọbịrị ọọjịra-jịra, angịgbahị ịwẹ kaa maga nyọka da ọngọlịnyị ụbwọ ká igu nyamwụ bala iJihova ka nwa. Ịnyịnyị, ị tị kaa maga ká ọjịra-jịra ka la cheri-cheri. (1 Kọr. 5:12, 13; Gal. 6:1) Ọlẹ kọ tị gụ́ wuu, angịgbahị nya ọjịra-jịra ri angịgbikpịlọ. (1 Pit. 5:1-3) Ị kaa nwụlanọ yẹẹyẹẹ chajị ká ang ọlẹ kị kaa mẹjẹ alụma bwụ ịlahị ka kpụnịrọ ịBayịbụụ, maga nyọka jẹ́ ọng myị́ ọng ọọjịra-jịra, bala ọ-ju aanahị ụga. Angịgbahị nya ọjịra-jịra ịhyẹ kaa da ụbwọ ẹ-ẹga nya Ube nya Ịpyị Adịrahụ ọnwụnwụ bala ẹhị ọ-kpa jwaa, nwụla ọjịra-jịra ọtụka nọ, bala o-juwa ẹ-ẹpwụ nya ịKọmitii nya Angị Me Obyi Bala Angị Họ Utoji bala Patient Visitation Groups, ba akụrwọ ịkịla ịlẹ kị kaa họ u-uhye. Angịgbahị nya ọjịra-jịra kaa họ ụkụrwọ hahị yẹẹyẹẹ ịlẹhị!

10. Ịyẹ tị́ du ká ẹla nya angịgbahị nya ọjịra-jịra nyahị ị-họ ụkụrwọ yẹẹyẹẹ myịhị lẹhị?

¹⁰ IJihova ya neeji ene nyori angịgbikpịlọ nyị ka kpahị juhi yẹẹyẹẹ bala o-ri ahị nyị́ “tụtụm ka ju uhi myịmyị kaka.” (Jer. 23:4) Ị-ịwe ọ la ọọnahị ọnyang ọhẹ bwu Finland ká ẹnyị nyamwụ ri Johanna ụka ká ịnamwụ jụ ẹdụrụ ọtụka-tụka lẹ. Ọ yẹkẹẹ: “Nanana nyori ọ kaa lam ujwo nyọka ya irya nyam je angịkịla, ọngọgbahị nya ọjịra-jịra ọlẹ kam jẹ́ gbuu ka tị ke ụrụ lam ụka ọlẹ kam nwụlanọ nyọka ya akama nyam, ọ raabwọ balam, bala ọ-họ m̀ la ọ-jẹ myị̀myị̀ nyori iJihova la ọháha ẹ-ẹga nyam. Ḿ kpịtịya nya ẹla ọlẹ kọ ya kpangga kaka, ma m̀ tị kpịtịya nyori ḿ kaa ju uhihi kaka. M̀ jẹ nyori iJihova à doo ẹrụ nyọka wẹ ka dam ụbwọ ụka ọlẹ kam baba nyamwụ kpangga lẹ.” Ányị angịgbahị nya ọjịra-jịra nyang à tị́ dang ahụ ụbwọ lẹẹ?

11. Ányị ahị tị́ ka bwu mẹjẹ angịgbahị nya ọjịra-jịra nyori ẹla nyaa myịhị lẹhị? (Yẹ ifoto ịnyịnyị.)

¹¹ IJihova tịtọ kahị ka mẹjẹ nyori ẹla nya angịgbahị nya ọjịra-jịra myịhị lẹhị yẹẹyẹẹ “chajị nya ụkụrwọ nyaa.” (1 Tẹs. 5:12, 13) Henrietta, kọ kụ Finland, yẹkẹẹ: “Angịgbahị nya ọjịrajịra kaa myọnụ nyọka da angịkịla ụbwọ, ma ọọwa á ri ị la ụka lee ogogo lụmẹ gụ́ angịkịla ka, lee ịwa-á la akama ẹ-ẹpwụ nya  ọhịhị nyaa ka lẹ ka. Ụka ọhẹ m̀ kaa byaa nyori, ‘À ri ọngọgbahị nya ọjịra-jịra ọnyịịla. M̀ tịtọ kanụ ka jẹ́ ịnyị.’” Ọọnahị ọnyang ọhẹ bwu Türkiye c ká ẹnyị nyamwụ ri Sera yẹkẹẹ: “Angịgbahị nya ọjịra-jịra baba nya ọhụ ojuju nyọka kịnyaa la ụkụrwọ nyaa. Lẹ ahị ka jẹ́-ẹ da ụpwụ du kịlaa, wụraa ẹpwa nya ang oriri, lee ọ-yẹ julaa ẹ-ẹpwụ nya ụkụrwọ nya ẹrụ ọnyịịla ọ-kpa pyẹ.” Ọngọgbahị nya ọjịra-jịra ọhẹ juwa ká ẹla nyamwụ kaa myịng lẹhị yẹẹyẹẹ? Mwahị nya agbẹyị ịlẹ ká ka mẹjọọ nyori ẹla nyamwụ myịng lẹhị.—1 Kọr. 16:18.

ANGỊ KPẸHỊ RỊRỊ ISEKUT KAA KPA ỌJỊRA-JỊRA WULE

12. Angịkịla iyina iJisọsị à tị́ kpa da ala ọjịra-jịra ụbwọ la oyi ọhọhẹ? (1 Ala ịTẹsalonika 2:7, 8)

¹² IJisọsị myị́myị́ chụ alẹng ịhyẹ nyọka da ọjịra-jịra ụbwọ ụ-ụgbẹyị ọkịla. Ọ kpa angịgbahị nya ọjịra-jịra ịla ịJerusalẹm ụgbẹyị du kị du ịPọlụ, ịBanabasị, bala angịkịla ẹrụ nyọka wụla ọjịra-jịra yẹ bwụ ẹga ọhẹ ka ẹga ọkịla. (Ụkụr. 11:22) Ịyẹ tị́ du? Ang odudu ọlẹ kị kpa chụ angị myị ẹrụ bala angịgbahị nya ọjịra-jịra ịnyị: ọ-ka kpa ọjịra-jịra wule. (Ụkụr. 15:40, 41) Alẹng ịwẹ tụụbwọ hi ang lụmẹ-lụmẹ beji nyọka jụ́ ụkụrwọ ọwẹ họ. Ụka ọhẹ ị dọmwụ kaa hu ọhịhị nya ịlaa ju odo nyọka mẹ ang jẹ angịkịla bala ọ-jwaa ọhu.—Wa 1 Ala ịTẹsalonika 2:7, 8.

13. Ịyẹ à tị́ ri ụkụrwọ nya angị kpẹhị rịrị isekut?

¹³ Angị kpẹhị rịrị isekut kaa bwu ẹga ọhẹ ka ẹga ọkịla ụka wuu. Ị kaa jẹ ịmayịlị lụmẹ-lụmẹ nyọka ju ọjịra-jịra ụga. Epwihi ọnyị myị́ ọnyị, ọngọ kpẹhị rịrị isekut kaa họ ụpa nya ẹla o-ya dodehe bwu ịBayịbụụ ha alụma ugbabwọ ịmanyị tị́, ọ kaa wụla aanahị ịdatị-ịdatị yẹ, ọ kaa họ ọjịra-jịra bala angị ye ịlahị nya ụgbẹyị, angịgbahị nya ọjịrajịra, bala ịnya ẹrụ ọnyịịla  ọ-kpa pyẹ. Ọ kaa kpẹhị rịrị ọjịra-jịra nya isekut bala ọjịra-jịra ọtụka, tụ ọ-họ ká ẹla ọyaya nya aanahị ka la kẹm-kẹm. Ọ kaa mẹ ang jẹ u-ube ụpwụ nya angị ye ịlahị nya ụgbẹyị, nwụla ọjịra-jịra ọdatị ọlẹ kị kaa la bala angị ye ịlahị nya ụgbẹyị ịla isekut nọ. Datị hi ịwẹ, ọ kaa họ akụrwọ ịkpọnchị ịkịla ịlẹ ká egbeju ẹpwa á ya họọ, ị tị kaa ju agaga ẹ-ẹpwụ ụka ọhẹ.

14. Ịyẹ tị́ du ká ẹla nya angị kpẹhị rịrị isekut kaa myịhị lẹhị?

¹⁴ Ányị ọjịra-jịra à tị́ kaa yé apyobwuna bwu ụkụrwọ ọlẹ ká ọngọ kpẹhị rịrị isekut kaa họ? Ọọnahị ọlẹng ọhẹ bwu Türkiye ya ẹla u-uhye nya angị kpẹhị rịrị isekut nyori: “Ụga ojuju nyaa ọnyị myị́ ọnyị kaa gum gbịlaa nyọka kpa ụka nyam da aanahị alẹng bala anyang ụbwọ. M̀ gbachị angị kpẹhị rịrị isekut lụmẹ-lụmẹ lẹ; ma, ọngọngọhẹ ẹ-ẹpwụ nyaa á tị họ lala o-ri ọwa nyị́ hi ụbwọ ka lee ọ-tịtọ nyọka ya ẹla balam ka lẹ ka.” Johanna, ọngọlẹ kahị ya ẹla rụ lalẹ ene họ ụkụrwọ bala ọngọ kpẹhị rịrị isekut ẹ-ẹrụ ọnyịịla ọ-kpa pyẹ, ma ị tọ ọngọngọhẹ ẹ-ẹpwa ka. Ọ yẹkẹẹ: “Ọ lịnyị odu lẹ, ḿ ka jẹ́-ẹ deeri nya ahyẹẹnụ ọwẹ kaka. Aanam anyang imimiiye mwụ rụ wẹ kpanjẹ du ká iwe nyaa wẹẹ dam yẹẹyẹẹ. Ọngọ kpẹhị rịrị isekut jum ọhụ bala ọ-dam ụbwọ nyọka jẹ́ nyori nanana nyọlẹ kaam bala alugbiyegu, tụ́ aligu nyam á juwa ẹ-ẹga okpokpo lawụlẹ lẹelẹẹ ka, ahị ka jẹ́-ẹ la iwe nyọka hụ lawụlẹ gboyi myị́ oyi odehe onyeewe.” Iru nyahị kaa jẹ́ apyobwuna nya ụkụrwọ ọlẹ ká angị kpẹhị rịrị isekut kaa họ ịnyịnyị.—Ụkụr. 20:37–21:1.

15. (a) Jaabwọ ká ụpwụ nya 3 ịJọn 5-8 ya, ányị ahị tị́ ka bwu mẹjẹ angị kpẹhị rịrị isekut nyori ẹla nyaa myịhị lẹhị? (Yẹ ifoto ịnyịnyị.) (b) Ịyẹ tị́ du kahị ka mẹjẹ ịhụ nya angị kpịlahị ọọjịra-jịra nyori ẹla nyaa myịhị lẹhị? Ányị ahị tị́ ka bwu họ ịnyị? (Yẹ akpa ọlẹ kọ ri “ Kpịtịya nya Ịhụ Nyaa.”)

¹⁵ Ọlẹrụ ịJọn ju ịGayọsị ọhụ nyọka kpahị ju aanaa ịlẹ kị wẹ ka ju ala ọjịra-jịra ụga bala ọ-ka  “da angịlịnyị ụbwọ ẹ-ẹpwụ nya ẹdịyẹ nyaa ịnyịnyịịnyị, jaabwọ kọ ka kpụ Ohe Oluhye ịpyọ.” (Wa 3 ịJọn 5-8.) Ụgbẹyị ọhẹ ọlẹ kahị ka jẹ́-ẹ họ ịnyị ri ọ-ka wụrụ angị kpẹhị rịrị isekut ẹpwa. Ụgbẹyị ọkịla ri ọ-ka kpehe nya ẹrụ ọnyịịla balaa ụka kị juhi ụga. Leslie ọlẹ kahị ya ẹla rụ lalẹ ene, kaa mẹjẹ nyori ẹla nyaa myọọ lẹhị ụ-ụgbẹyị ọkịla myị́myị́. Ọ yẹkẹẹ: “M̀ kaa raabwọ ha iJihova kọ ka họ ịbaba nyaa haa. Am bala ọrụm kaa da ileta dụ kịlaa nyọka ya jaa jaabwọ ká ụga ojuju nyaa dahị ụbwọ kaka ba.” Kpịtịya nyori, angịnyị ehe lala ahị angị kpẹhị rịrị isekut à ri lẹ. Ụka ọhẹ ị kaa jụ ẹdụrụ, chị uko u-uhye nya akama nyịlaa, bala ọ-la ọkịlẹtụ ọ-kpụ enyi myị́. Ẹla ọnyịịla ọlẹ á ka ya lee ang āhị ochiche ọlẹ á ka ya ha ọngọ kpẹhị isekut ka ri ọwẹwẹ nya abwọ ọrịrị nyamwụ kpangga myị́!—Etu 12:25.

AHỊ BABA NYA ANGỊ KPỊLAHỊ

16. Jaabwọ ká ụpwụ nya Etu 3:27 mẹjẹ, ịtọ ẹla iyina aanahị alẹng à tị́ ka tọ ịlaa myị́?

¹⁶ Odehe wuu, ahị baba nya aanahị alẹng ịlẹ kị ka họ ụkụrwọ “lala ang āhị.” Kori ká ri ọọnahị ọlẹng ọlẹ ká hu enyi Ohe lẹ, à ka myị-ị da ụbwọ ụ-ụgbẹyị ọlịịwẹ “ụka kọ chịkpẹẹ hang”? (Wa Etu 3:27.) À ka myị-ị họ ụkụrwọ jahị da ọ-ka nwa ka ri ọngọ myị ẹrụ? Kori ká tị ri ọngọ myị ẹrụ ene lẹ, ọ ka háng ká ka da aanang ụbwọ lala ọngọgbahị nya ọjịra-jịra? d À ka nwụ iwe-ahụrụ nyang họ myị́ chajị ká ka jẹ́-ẹ ya ụbwọ ju ụpwụ ẹ-ẹpwụ nya Ube-ụpwụ nya Angị Kpa Ẹrụ Ọnyịịla Pyẹ? Ube-ụpwụ ọwẹ ka dang ụbwọ chajị ká iJisọsị ka jẹ́-ẹ kpang họ ụkụrwọ gụ́ ọọwa. Kori kọ lang lala o-ri ahụ nyị́ ka họọ myị́ ka, raabwọ ha iJihova. Bịlọọ kọ dang ụbwọ la olegu ịgọgọ nyamwụ chajị ká ka jẹ́-ẹ jụ ụkụrwọ ọnyị myị́ ọnyị ọlẹ kị ya hang họ.—Luk. 11:13; Ụkụr. 20:28.

17. Ụkụrwọ nya angị kpịlahị ịlẹ ká iJisọsị chụ tị́ mẹ ẹlịyẹ jẹ́ẹhị u-uhye nya ịKịrayịsị iJisọsị, Adịrahụ nyahị?

¹⁷ Ụkụrwọ nya aanahị alẹng ịlẹ ká iJisọsị chụ “lala ang āhị” ri ang-ẹjẹẹ nyori iJisọsị à wẹẹ kpahị ụgbẹyị la ahyẹẹnụ ihyẹẹkpẹ ịlẹ lẹ. (Mat. 28:20) Ọ myịng lẹhị nyọlẹ kahị la Adịrahụ ọ-la ọháha ọlẹ kọ kaa hu ha, bala ọ-jẹ́ ịbaba nyahị du kọ ya aanahị alẹng ịlẹ kị ka dahị ụbwọ hahị? Ó-ri ịnyị aalẹ, mwahị nya iwe ọlẹ ká ka mẹjẹ nyori ụkụrwọ nya angịwẹ myịng lẹhị. A tị deeri la ọ-ka ji iJihova obe ẹnẹnẹhẹ ka, chajị ọwa à kaa ya “ang o-hu ha ọnyịịla ọnyị myị́ ọnyị wuu bala ang ọgahị ọkpẹẹkpẹẹ” hahị lẹ.—Jem. 1:17.