Kụ irya nya adịda ọlẹ kọ juwa ya ẹla bala ọnyị nyamwụ ọlẹ ko gu ẹka irwiye wẹẹ. Ọ byoo yẹkẹẹ, “Lụka ọtataata kẹkpẹ, Ohe họ odehe bala ang myị́ ang ịlẹpwụ nyamwụ, ọ myịmyị họ ẹnụ, ọya, bala ịdịchụ.” Ọọwa lẹ, ọnyị ọwẹ à kụ irya jwoo chịng lẹ, ọ tọọ wo ẹẹ, “Ịpapa, owo à tị́ họ Ohe?”

Adamwụ wẹ byoo yẹkẹẹ: “Ọ-ọngọngọhẹ à họ Ohe ka. O ji bwu edede-edede.” Ẹlẹwẹ ka nwà ọnyị ọlẹng ọwẹ nya ụka ọwẹ lẹ. Ma, jaabwọ kọ wẹẹ ri ọngọgbahị, ịtọ ẹla ọwẹ kịnyaa la ọ-ka yẹrịrọọ ọ-ọkịlẹtụ. Ọ lọọ ujwo nyọka jẹ́ jaabwọ ká ọngọngọhẹ ka bwu la ọmwụ ọdada ka. Uhye-ọgba bala odehe dọmwụ la ọmwụ ọdada. Lẹ o kụ irya, ‘Ale Ohe à tị́ bwu?’

Ányị ịBayịbụụ à tị́ wẹ ịtọ ẹla ọwẹ? Jaabwọ ká adịda ọla ẹla ọ-chụ pwokwita ọwẹ wẹ ịnyị. IMosisi da yẹkẹẹ: “Ọngọlahị ẹẹ, . . . ene-ene ká-à họ ịgbọdọ lee ọ-họ ká odehe ji, à ri Ohe Oluhye, á la ọmwụ ọdada ka, á la ọbaba ka ịnyịnyị.” (Eje Ọnyịịla 90:1, 2) Ịnyịnyị, ọlọmwụ Ayịsaya yẹkẹẹ: “Ánụ jẹ ka-á? Ánụ wo jẹ ka-á? Amkpaa-à ri Ohe Oluhye o-gbe oyi myị oyi lẹ. Ọwa-à họ odehe ọlẹ wuu lẹ.” (Ayịsaya 40:28) Ịnyịnyị, ụpwụ nya iJudu ya nyori Ohe nyị ri ọngọ hịhị “pyịyọọ pwụ ụka myị́ ụka.”—IJudu 25.

Ụpwụ ịgọgọ ịwẹ mẹjẹ́ẹhị nyori Ohe ri “Adịrahụ o-gbe oyi myị́ oyi” jaabwọ ká ịPọlụ chabwọ nyamwụ. (1 iTimoti 1:17) Ọọwa mẹjẹ nyori Ohe ji pyịyọọ. Kori kahị kụ irya kẹkpẹ abwọ myị́ abwọ, áhị ka jẹ́-ẹ jẹ́ ọmwụ ọdada nyamwụ kaka. Ọ tị ka juwa gbe oyi myị́ oyi ịnyịnyị. (Ọwụrụụ-wụrụ 1:8) Lẹ, ọwa o-ji gboyi myị́ oyi ri ụpa ọkpọnchị nya abwụma nyamwụ.

Ịyẹ tị́ du kọ kaa lahị ujwo nyọka wo etu nya ẹlẹwẹ? Ọhịhị nyahị la kpii. Chajị nya ọọwa lẹ, abwọlẹ kahị kaa yẹ ụka datị hi abwọlẹ ká iJihova kaa yọọ. Chajị nyọlẹ ká Ohe juwa bwu edede-edede bala ọ-ka juwa gboyi myị́ oyi, ẹka ụnọ lala ahyẹẹnụ ookpokpo ẹ-ẹhị nyamwụ. (2 iPita 3:8) Ọ-chụ pwokwita: Ụga ọlẹ kọ kaa hịhị lala ahyẹẹnụ 50 kem, ka wo etu nya ẹlẹlẹ ká wẹẹ ya ẹnẹnẹhẹ kori ká byoo nyori angịnyị ehe nyị kaa hịhị lala ẹka 70 lee 80 myị́? O ka lujwo! Tị kpịtịya nyori ịBayịbụụ ya ahị nyị lala ụga ẹ-ẹhị nya Ọngọ Họhị Họ. Ányị ka jẹ́-ẹ chụ irya ọkụkụ nyahị ka me ịnyamwụ ẹnẹnẹhẹ ka. (Ayịsaya 40:22, NW; 55:8, 9) Lẹ ọ́ la ẹbyẹbyị nyọlẹ ká angịnyị ehe wo etu nya ang myị́ ang wuu u-uhye nya iJihova ka lẹ ka.

Nanana nyori ọ kaa lahị ujwo nyọka myị nyori Ohe ji pyịyọọ, ahị yẹ ịnyịnyị nyori ẹlẹwẹ ju egbeju. Kori ọ́ ri ọngọkịla kọ họ Ohe aalẹ, ọngọọwa ịBayịbụụ à ka wụrụ nya Ọngọ họ ang wuu lẹ. Ma, jaabwọ ká ịBayịbụụ da wụlẹ, iJihova à “họ ang myị́ ang wuu” lẹ. (Ọwụrụụ-wụrụ 4:11) Ahị myịmyị jẹ́ nyori ụka Ohe ji ká uhye-ọgba bala odehe ji ka. (Ọmwụ ọdada 1:1, 2) Lẹ ale ị tị́ bwu wẹ ka ji? Ọngọlẹ kọ haa chịla kọ ka ji ene kị ka ji. Ọ myịmyị hịhị ene nya ang ịhịhị ị-jẹ́ ẹla ịkịla, lala Ọnyẹwẹ nyamwụ bala alegu-ẹrụ. (IJobu 38:4, 7; Ala iKolosi 1:15) Lẹ ọ la gbagbịla nyori o ji ụbwọọmwụ ụka nya ọgbanyẹ. Kori ọ́ họ́ọ, ọ́ ka họ ịngịngịhye ọkịla ka; ịngịngịhyẹ-ẹ́ ji ọlẹ kahị ka jẹ́-ẹ ya nyori ọwa à họ Ohe lẹ ka.

Ọhịhị nyahị bala ọlẹ ká uhye-ọgba bala odehe ji, ri ang ẹjẹẹ nyori Ohe o-gboyi myị́ oyi ji ịnyịlẹhị. Ọngọlẹ kọ họ uhye-ọgba bala odehe, Ọngọlẹ kọ ya ehile ịlẹ kị wẹẹ kpaa họ ụkụrwọ yeji, á ka la ọmwụ ọdada lee ocheju ka ịnyịlẹhị. Ọwa kem à ka jẹ́-ẹ ya ọhịhị ha ang ịkịla wuu lẹ.—IJobu 33:4.