Idi Biernes, Septiembre 28, dinayyeg ti 7.5 ti kapigsana a ginggined ti isla ti Sulawesi idiay Indonesia. Gapu iti dayta, ken iti simmaruno a tsunami, nasurok a 1,300 a tattao ti natay, a ti kaaduan ket adda iti siudad ti Palu idiay Central Sulawesi.

Sigun iti report ti sanga nga opisina ti Indonesia nga adda idiay Jakarta, naammuanen ti kasasaad ti amin a 80 a Saksi nga agnanaed iti apektado a lugar. Adda sumagmamano a nadangran a kakabsat isu a masapul a maagasanda iti ospital. Interamente a nadadael ti balay ti maysa a kabsat ken nakaro met ti pannakadadael ti balay ti dadduma pay. Nadadael met ti paggigimongan ti Kongregasion ti Palu.

Ti Disaster Relief Desk iti sanga nga opisina ket makitintinnulong iti manangaywan iti sirkito ken kadagiti asideg a kongregasion tapno maipaay ti kasapulan a tulong. Gapu ta kurang ti makan, danum, ken dadduma pay a kasapulan dagiti Saksi iti apektado a lugar, inyurnos ti sangay nga ipan ti tallo a kongregasion dagitoy a suplay kadagiti kapammatianda idiay Palu. As-asikasuen dagiti panglakayen iti dayta a lugar ti espiritual, emosional, ken material a kasapulan dagiti kapammatianda. Tapno maipaayan iti liwliwa ken tulong dagiti apektado a Saksi, bisitaento ida ti maysa a miembro ti Branch Committee, ti overseer ti Local Design/Construction Department, ken ti manangaywan iti sirkito iti dayta a lugar.

Ikarkararagantayo dagiti kakabsattayo idiay Indonesia, ta ammotayo a ni Jehova ti agtultuloy a ‘kamang ken pigsada’ bayat daytoy narigat a tiempo.—Salmo 46:1.