Idi rabii ti Domingo, Septiembre 30, 2018, ti makin-abagatan a Japan ket dinalapus ti Bagyo a Trami, a Category 1 ti kapigsana ken nangyeg kadagiti napigsa nga angin ken tudo. Kimmapuy bassit dayta bayat a nagtultuloy a nagpaamianan iti ngudo ti lawas agingga a nakadanon idiay Tokyo idi Lunes, Oktubre 1. Tallo a tattao ti natay, agarup 200 ti nasugatan, ken nasurok a 1.3 a milion a balbalay ti naawanan iti koriente.

Impadamag dagiti manangaywan iti sirkito a ti isla ti Okinawa, iti makin-abagatan a Japan, ti kangrunaan a naapektaran. Sigun kadagiti damo nga impormasion maipapan iti kasasaad ti tallo a sirkito iti Okinawa ken dagiti lugar iti aglawlawna, awan kadagiti kakabsattayo ti natay ngem siam ti nasugatan. Dinadael met ti bagyo ti agarup 120 a balbalay dagiti kakabsat ken 5 a Kingdom Hall iti isla ti Okinawa. Naperdi met ti dadduma a paset ti 41 pay a Kingdom Hall idi dinalapus ti bagyo ti dadduma pay a rehion ti Japan.

Itultuloy dagiti manangaywan iti sirkito iti dayta a lugar ken dagiti miembro ti Local Design/Construction Department ti panangammoda iti aktual a kasasaad tapno makita ti kakaro dagiti nadadael ken mayurnos ti pannakaipaay ti espiritual ken material a tulong para kadagiti naapektaran.

Itultuloytayo nga ikararagan dagiti kapammatiantayo a naapektaran iti daytoy a bagyo ken iti dadduma pay a natural a didigra a nabiit pay a napasamak idiay Japan. Agtalektayo a kanayon a liwliwaen ken pabilgen ida ti nailangitan nga Amatayo.—2 Tesalonica 2:17.