Iti alas singko ti parbangon, nariing ni Brother Femi Durodola ken ti asawana a ni Yana gapu iti tawag ti maysa a panglakayen. Kuna ni Yana: “Imbaga ti panglakayen: ‘Dikay agdanag, basta agsaganakayo. Um-umayen dagiti soldado ti Russia ditoy Kyiv!’ Permi ti nerbiosko iti dayta nga oras.”

Nagrubbuat dagitoy kabbaro nga agassawa. Taga-Nigeria ni Femi ngem taga-Ukraine ni Yana. Nagkapeda iti maudi a gundaway iti balayda ken binasada ti teksto iti dayta nga aldaw. Kuna ti teksto: “Napigsakayo no agtalinaedkayo a kalmado ken no agtalekkayo.” (Isaias 30:15) Sipapasnek a nagkararag ni Femi ken Jehova. Kalpasanna, innalada dagiti go bag-da ken imbatida ti amin sa nagkamangda idiay Netherlands.

Kasta ti napadasan ti kaaduan a kakabsattayo a nagdesision a pumanaw idiay Ukraine kalpasan ti iraraut ti Russia idi Pebrero 24, 2022. Adda agarup 130,000 a Saksi ni Jehova idiay Ukraine. Iti agdama, nasuroken a 36,000 a Saksi ti nagdesision a mangpanaw iti balbalayda ken nasurok a 16,000 kadakuada ti nagkamang iti sabali a pagilian. Adu ti nangpanaw iti balbalayda, trabaho, ken kongregasionda. Bayat ti gubat, dagiti taga-Ukraine a lallaki nga agtawen iti 18 agingga iti 60 ket saan a mapalubosan a pumanaw iti pagilian. Ngem dagiti lallaki a saan a taga-Ukraine ket mapalubosan a pumanaw.

Dagiti laeng kasapulanda ti maitugotda. Nakarigrigat ti panagbiaheda iti tren ken bus tapno makapanda iti nataltalged a lugar. No dadduma, dida ammo no sadino ti papananda. Ngem gapu iti natibker a pammatida ken Jehova, pinanawanda ti lugarda a dinadael ti gubat, ken dida ammo no makasublida pay.

“Imbatimi ti amin. Manmano la ti naitugotmi,” imbaga ni Yana. “Ipalagip kadatayo daytoy a situasion a ti kapatgan ket ti relasiontayo ken Jehova.”

Manipud iti balay ni Sister Lilia Antoniuk idiay Kyiv, mangngeg ti napigsa nga uni dagiti sirena a mangipakdaar nga adda um-umay a bomba ken mangngegna met dagiti agbettak a bomba. Agkaiwara iti dalan dagiti napuoran a lugan ken paspaset ti nadadael a building ken rangtay.

Nagdesision a pumanaw iti pagilian ni Lilia ken ti balasangna a ni Oleksandra nga agtawen iti 17. Sumagmamano nga aldaw a nagbiaheda iti napnapno a tren nga agpa-Poland. Nagbassit ti balonda a makan ken masapul nga agtakderda iti sumagmamano nga oras. Nabang-aran ti agina idi nakasangpetdan idiay Przemyśl, Poland.

“Idi nakitami dagiti kakabsat a nakaiggem kadagiti ‘JW.ORG’ sign, ammomin a natalgedkami,” imbaga ni Lilia. Naipan ti agina iti maysa a Kingdom Hall tapno saanda a malammin, makapanganda, ken makainanada sakbay a maitulodda iti pribado a pagtaengan a pagyananda.

“Nariknami ti panangaywan ni Jehova ket timmibker ti pammatimi,” imbaga ni Lilia, nga adda itan idiay Germany. “Agyamanak unay ken Jehova iti ayatna ken kadagiti kakabsat a nakasagana a tumulong kadagiti narigat a tiempo.”

Inyestoria ni Sister Anastasiia Kovalyova ti panangatakar dagiti soldado iti siudad ti Zaporizhzhia manipud tangatang. Nakitana ti panaggilap dagiti naibala a missile ken nangngegna dagiti panagbettak manipud iti apartment-na. Na-trauma dagiti ubbing a kaanakan ni Anastasiia nga agtawen iti pito ken tallo gapu iti agsasaruno a panagbettak dagiti bomba isu a nagdesisionda a pumanaw kas pamilia. “Gapu ta manmano laeng ti maitugotmi, kurang ti bado ken dadduma a kasapulanmi,” imbaga ni Anastasiia. “Ngem inasikasodakami dagiti kakabsat. Intedda ti amin a kasapulanmi ken adda pay sobrana.” Nagbiahe da Anastasiia, ti ipagna a ni Anya, ken dagiti ubbing idiay Poland sa napanda idiay Germany.

Aglemmeng da Sister Anastasiia Shchukina ken ni nanangna a ni Sister Olha Lysenko iti nalamiis a basement ti bassit a balayda kada mangngegda ti pakdaar ti sirena nga adda eroplano nga umay mangbomba. Agserserbi kas payunir ti dua a sister iti bassit nga ili ti Brailiv, Vinnytsia Oblast. Narigatanda a nagdesision no pumanawda wenno saan. Ngem nagdesisionda met laeng a pumanaw idi kimmaron ti kasasaad. Intugotda laeng dagiti kasapulanda. Nagbiaheda iti tren iti dua nga aldaw nga awan turturogda. Marigatan nga agbiahe ni Olha nga agtawen iti 58 gapu ta adda sakitna. Alas dos ti parbangon idi nakasangpetdan idiay Rzeszów, Poland. Adda dagiti kakabsat sadiay a simmabat kadakuada. “Uray no parbangonen, ur-urayendakami dagiti kakabsat,” imbaga ni Anastasiia. “Kasta unay ti panagyamanmi ken Jehova ken kadagiti kakabsat.”

Iti siudad ti Sumy, da Brother Andrzej Chyba a taga-Poland ken ti asawana a ni Elizabeth a taga-Britain, naglemmengda iti basement ti balay ti maysa a kabsat a kadua ti lima pay a kakabsat. Mangmangngegda dagiti fighter jet, kasta met dagiti panagpipinnaltog ken panagbomba. Timmured dagiti kakabsat idi binuyada ti Bible drama nga O Jehova, . . . Kenka Inkabilko ti Panagtalekko. Mabuya dita ti inaramid ni Ari Ezekias idi rinaut dagiti Asiriano ti Jerusalem.

“Nangi-send kadakami dagiti kakabsat iti makapabileg a mensahe manipud iti Biblia, kas iti panangparegtada kadakami a mangbasa iti Salmo 27,” imbaga ni Andrzej, nga adda idiay Poland itan a kadua ni baketna.

Sigurado a bendisionan ni Jehova dagiti kakabsattayo a ‘nangtallikud iti amin a banag’ bayat a mangnamnamada iti masanguanan nga awanen ti gubat.—Filipos 3:8.