Ti Umuna nga Ar-ari 14:1-31
14 Iti dayta a tiempo, nagsakit ni Abias nga anak ni Jeroboam.
2 Gapuna, kinuna ni Jeroboam iti asawana: “Pangngaasim ta mapanka idiay Shilo ket agpammarangka tapno saanda a mailasin a sika ti asawa ni Jeroboam. Adda sadiay ni Ahias a propeta. Isu idi ti nangibaga kaniak nga agbalinak nga ari iti daytoy nga ili.+
3 Mangitugotka iti 10 a tinapay, bibingka, ken sangabotelia a diro, ket mapanka kenkuana. Ibagananto kenka no ania ti mapasamak iti ubing.”
4 Inaramid dayta ti asawa ni Jeroboam. Napan iti balay ni Ahias idiay Shilo.+ Saan idin a makakita ni Ahias ta lakayen.
5 Ngem kinuna ni Jehova ken ni Ahias: “Um-umay ti asawa ni Jeroboam tapno agsaludsod kenka maipapan iti anakna, ta masakit. Ibagak kenka no ania ti ibagam kenkuana.* Inton sumangpet, ilimedna ti kinasiasinona.”
6 Idi nangngeg ni Ahias ti pannagna ti babai nga umas-asideg iti ruangan, kinunana: “Sumrekka, asawa ni Jeroboam. Apay nga ilimlimedmo ti kinasiasinom? Nabilinak a mangidanon kenka iti nadagsen a mensahe.
7 Ibagam ken Jeroboam, ‘Daytoy ti kinuna ni Jehova a Dios ti Israel: “Pinilika kadagiti kailiam tapno pagbalinenka a lider iti ilik nga Israel.+
8 Biningayko ti pagarian manipud iti balay ni David ket intedko kenka.+ Ngem saanka a nagbalin a kas ken David nga adipenko, a nagtungpal kadagiti bilinko ken nagtulnog kaniak iti amin a pusona, ken inaramidna ti umiso iti imatangko.+
9 Dakdakes ti inaramidmo ngem iti amin nga immun-una kenka. Nangaramidka iti sabali a dios ken kadagiti metal nga imahen* tapno pagpungtotennak,+ ket tinallikudannak.+
10 Gapu iti dayta, mangyegak iti didigra iti pamilia ni Jeroboam, ket papatayekto ti tunggal lalaki* a kaputotan ni Jeroboam, agraman dagiti awan pigsana ken nakapuy iti Israel. Ibusekto ti pamilia ni Jeroboam,+ a kas iti panangdalus ti maysa iti takki agingga a maikkat amin!
11 Kanento dagiti aso ti asinoman a kaputotan ni Jeroboam a matay iti siudad; ken kanento dagiti billit ti asinoman a kaputotanna a matay iti away, ta dayta ti kinuna ni Jehova.”’
12 “Tumakderka, ket agawidkan. Inton makadanonka iti siudad, matayto ti ubing.
13 Sangitan ken itabonto ti intero nga Israel. Isunto laeng ti maitabon iti pamilia ni Jeroboam, ta isu laeng ti nakakitaan ni Jehova a Dios ti Israel iti naimbag.
14 Mangpataudto ni Jehova iti ari a mangituray iti Israel a mangpapatay iti kaputotan ni Jeroboam+ iti dayta nga aldaw, wen, uray itan.
15 Dangranto ni Jehova ti Israel, ket kasladanto runo nga iyallo-allon ti danum, ket parutennanto ti Israel iti daytoy a nasayaat a daga nga intedna kadagidi ammada,+ ken iwarawarananto ida iti labes ti Karayan,*+ ta nagaramidda kadagiti sagrado a poste,*+ a namagpungtot ken Jehova.
16 Baybay-annanto ti Israel gapu kadagiti basol ni Jeroboam a nakaigapuan met ti panagbasol ti Israel.”+
17 Kalpasanna, pimmanawen ti asawa ni Jeroboam ket nakadanon idiay Tirza. Idi addan iti ruangan ti balay, natay ti ubing.
18 Gapuna, intabonda ket sinangitan ti intero nga Israel, maitunos iti kinuna ni Jehova babaen ken propeta Ahias nga adipenna.
19 Ti dadduma pay a pasamak iti pakasaritaan ni Jeroboam, ti pannakigubatna+ ken ti panagturayna, ket naisurat iti libro dagiti pasamak idi tiempo dagiti ari ti Israel.
20 Ti kapaut* ti panagturay ni Jeroboam ket 22 a tawen. Kalpasanna, naginana a kas kadagidi ammana.+ Ni Nadab nga anakna ti simmaruno nga ari.+
21 Kabayatanna, ni Rehoboam nga anak ni Solomon ti nagbalin nga ari idiay Juda. Agtawen ni Rehoboam iti 41 idi nagbalin nga ari, ket nagturay iti 17 a tawen idiay Jerusalem, ti siudad a pinili ni Jehova+ iti amin a tribu ti Israel a pangikabilanna iti naganna.+ Ti nanang ni Rehoboam ket ni Naama nga Ammonita.+
22 Inaramid ti Juda ti dakes iti imatang ni Jehova,+ ket ad-adda a napagpungtotda ti Dios gapu kadagiti basol nga inaramidda ngem iti inaramid dagidi ammada.+
23 Nagibangonda met kadagiti nangato a disso, sagrado nga adigi, ken sagrado a poste*+ iti tunggal nangato a turod+ ken iti sirok dagiti narukbos a kayo.+
24 Adda pay iti daga dagiti lallaki a balangkantis iti templo.+ Inaramidda ti amin a nagdakes a banag nga ar-aramiden dagiti nasion a pinapanaw ni Jehova iti sanguanan dagiti Israelita.
25 Iti maikalima a tawen ti panagturay ni Ari Rehoboam, rimmaut ni Ari Sisak+ ti Egipto iti Jerusalem.+
26 Innalana dagiti gameng iti balay ni Jehova ken dagiti gameng iti balay* ti ari.+ Innalana ti amin, agraman dagiti kalasag a balitok nga inaramid ni Solomon.+
27 Gapuna, nangaramid ni Ari Rehoboam kadagiti kalasag a gambang a pangsukat kadagita, ket intalekna dagita kadagiti panguluen dagiti guardia,* a mangbambantay iti ruangan iti balay ti ari.
28 Tunggal sumrek ti ari iti balay ni Jehova, alaen dagiti guardia dagiti kalasag, sa isublida iti pagpuestuan ti guardia.
29 Ti dadduma pay a pasamak iti pakasaritaan ni Rehoboam, ti amin nga inaramidna, ket naisurat iti libro dagiti pasamak idi tiempo dagiti ari ti Juda.+
30 Kanayon idi nga agginnubat da Rehoboam ken Jeroboam.+
31 Kalpasanna, naginana ni Rehoboam a kas kadagidi ammana ket naitabon a kas kadakuada iti Siudad ni David.+ Ni Naama nga Ammonita ti nanangna.+ Ni Abiam*+ nga anakna ti simmaruno nga ari.
Footnotes
^ Wenno “Kastoy ken kasta ti ibagam kenkuana.”
^ Wenno “sinukog nga estatua.”
^ Lit., “asinoman nga umis-isbo iti pader.” Pagsasao iti Hebreo a panglais kadagiti lallaki.
^ Kayatna a sawen, ti Eufrates.
^ Lit., “Dagiti aldaw.”
^ Wenno “palasio.”
^ Lit., “tumataray.”
^ Naawagan met iti Abias.
