Maikadua Kadagiti Taga-Corinto 6:1-18
6 Kas katrabahuan ti Dios,+ paregtaendakayo met nga awatenyo ti nagpaiduma a kinaimbag ti Dios ken diyo pagbalinen nga awan serserbi ti panggepna.+
2 Ta kinunana: “Dinengngegka iti makaay-ayo a tiempo, ken tinulonganka iti aldaw ti pannakaisalakan.”+ Itan ti nangnangruna a makaay-ayo a tiempo. Aldaw itan ti pannakaisalakan.
3 Saanmi a kayat ti mangted iti aniaman a pakaitibkolan, tapno awan ti dakes a maibagada iti ministeriomi;+
4 no di ket iti tunggal pamay-an, irekomendami ti bagimi kas ministro ti Dios:+ inibturanmi ti nadumaduma a pakasuotan, pakarigatan, narigat a tiempo, ken problema.+
5 Nakabkabilkami, naibalud,+ dinangran ti adu a tattao, nagtrabahokami iti nadagsen, adda dagiti rabii a saankami a naturog, ken awan ti kanenmi.+
6 Nagbiagkami a nadalus ken maitunos iti pannakaammo, nagan-anuskami,+ nagbalinkami a naimbag,+ nagpaidalankami iti nasantuan nga espiritu, saan a pammarang ti ayatmi.+
7 Ibagbagami ti pudno, agpampannuraykami iti pannakabalin ti Dios,+ ig-iggaman ti kannawan* ken kannigid nga imami* dagiti armas ti kinalinteg.+
8 Naipadayag ken naibabainkami, nababalaw ken naidaydayawkami. Naibilangkami kas manangallilaw uray pudno ti ibagbagami,
9 kas tattao a di am-ammo ngem am-ammonakami ti Dios, kas dandanin matay* ngem sibibiag,+ kas nadusa* ngem saan a napapatay,+
10 kas naladingit ngem kanayon a naragsak, kas napanglaw ngem mangpabpabaknang iti adu, kas awanan ngem addaan iti amin a banag.+
11 Nagsaokami* kadakayo, taga-Corinto, ken linuktanmi a naimbag ti pusomi.
12 Saanmi a linimitaran ti panagayatmi kadakayo,*+ ngem linimitaranyo ti nadungngo a panagayatyo kadakami.
13 Makisaritaak kadakayo kas annakko—pangngaasiyo ta aramidenyo met dayta kadakami—luktanyo a naimbag dagiti pusoyo.*+
14 Dikay makisangol* kadagiti di manamati ta saankayo nga agpada.+ Ta ania ti pakikaduaan ti kinalinteg iti kinakillo?+ Wenno ania ti pagpadaan ti lawag ken sipnget?+
15 Maysa pay, ania ti pagtunosan ti Kristo ken ni Belial?*+ Wenno ania ti pagpadaan* ti manamati* ken ti di manamati?+
16 Ken ania ti pakainaigan ti templo ti Dios kadagiti idolo?+ Ta datayo ket templo ti sibibiag a Dios;+ kas kinuna ti Dios: “Agnaed+ ken magnaakto iti tengngada, ket siakto ti Diosda ken isudanto ti ilik.”+
17 “‘Gapuna, rummuarkayo iti tengngada, ket suminakayo ken isardengyo a sagiden ti narugit a banag,’+ kuna ni Jehova”;* “‘ket awatenkayto.’”+
18 “‘Agbalinakto nga amayo,+ ket agbalinkayto nga annakko,’+ kuna ni Jehova* a Mannakabalin-amin.”
Footnotes
^ Nalabit pangdepensa.
^ Nalabit pangdarup.
^ Wenno “kas maikari a mapapatay.”
^ Wenno “nadisiplina.”
^ Wenno “Sipaprangka a nagsaokami.”
^ Wenno “Nalawa ti lugaryo iti pusomi.”
^ Wenno “agpalawakayo met.”
^ Wenno “makitipon.”
^ Wenno “matalek a tao.”
^ Wenno “pagkaduaan.”
^ Nagtaud iti Hebreo a sao a kaipapananna, “Awan Kaes-eskanna.” Tumukoy ken Satanas.
