Maysa nga Apocalipsis ken Juan 1:1-20
1 Daytoy ket apocalipsis* ni Jesu-Kristo, nga inted kenkuana ti Dios,+ tapno ipakitana kadagiti adipenna.+ Ket imbaon ni Jesu-Kristo ti anghelna iti adipenna a ni Juan+ tapno ipakitana kenkuana, babaen kadagiti mangirepresentar a ladawan, dagiti masapul a mapasamak iti mabiit.
2 Isu ti nangsaksi iti sao ti Dios ken iti panangsaksi ni Jesu-Kristo, wen, iti amin a banag a nakitana.
3 Naragsak daydiay mangbasa a sipipigsa ken dagidiay dumngeg iti sasao daytoy a padto ken mangtungpal kadagiti naisurat iti dayta,+ ta asidegen ti naikeddeng a tiempo.
4 Daytoy ti surat ni Juan iti pito a kongregasion+ nga adda iti probinsia ti Asia:
Adda koma kadakayo ti nagpaiduma a kinaimbag ken talna nga aggapu iti “Daydiay adda ita ken adda idi ken um-umay,”+ ken manipud iti pito nga espiritu+ nga adda iti sango ti tronona,
5 ken manipud ken Jesu-Kristo, “ti Matalek a Saksi,”+ “ti inauna kadagiti natay,”+ ken “ti Agturay kadagiti ari iti daga.”+
Kenkuana a mangay-ayat kadatayo+ ken nangwayawaya kadatayo manipud kadagiti basoltayo babaen ti mismo a darana+—
6 ket pinagbalinnatayo a pagarian,+ papadi+ iti Dios ken Amana—wen, agnanayon koma a maadda kenkuana ti dayag ken ti pannakabalin. Amen.
7 Kitaenyo! Isu ket um-umay a kadua dagiti ulep,+ ket makitanto ti tunggal mata, ken dagidiay nangduyok kenkuana; ket gapu kenkuana, amin a tribu ti daga banugbogendanto ti barukongda gapu iti ladingitda.+ Wen, Amen.
8 “Siak ti Alfa ken ti Omega,”*+ kuna ni Jehova* a Dios, “Daydiay adda ita ken adda idi ken um-umay, ti Mannakabalin-amin.”+
9 Siak ti kabsatyo a ni Juan, a kaduayo iti rigat+ ken iti pagarian+ ken iti panagibtur+ kas pasurot ni Jesus.+ Addaak idi iti isla a maawagan iti Patmos gapu iti panangipakaammok maipapan iti Dios ken panangsaksik maipapan ken Jesus.
10 Impannak ti nasantuan nga espiritu iti aldaw ti Apo, ket nangngegko iti likudak ti maysa a napigsa a timek a kas iti uni ti trumpeta,
11 ket ibagbagana: “Isuratmo iti lukot dagiti makitam ken ipatulodmo dayta iti pito a kongregasion: idiay Efeso,+ Smirna,+ Pergamo,+ Tiatira,+ Sardis,+ Filadelfia,+ ken Laodicea.”+
12 Timmaliawak tapno makitak no asino ti makisasao kaniak, ket nakitak ti pito a balitok a kandelero.+
13 Iti tengnga dagiti kandelero, adda maysa a kalanglanga ti anak ti tao,+ a nagayad ti badona a dumanon iti sakana. Adda balitok a barikes a naipalikmut iti barukongna.
14 Puraw a kas iti lupot a delana ken niebe ti ulo ken buokna, ken kas iti gumilgil-ayab nga apuy dagiti matana.+
15 Kas iti gambang a maur-uram iti urno dagiti sakana+ ken kas iti uni ti adu a danum ti timekna.
16 Adda pito a bituen iti kannawan nga imana,+ ken adda rumrummuar iti ngiwatna a natadem, atiddog, ken dua ti tademna nga espada.+ Ti rupana* ket makasisirap a kas iti init iti tengnga ti aldaw.+
17 Idi nakitak, natumbaak a kasla natay iti sakaananna.
Ket imparabawna ti kannawan nga imana kaniak sana imbaga: “Dika agbuteng. Siak ti Umuna+ ken ti Maudi,+
18 ken daydiay sibibiag.+ Natayak idi,+ ngem kitaem! sibibiagakon iti agnanayon nga awan inggana,+ ket adda kaniak dagiti tulbek ni patay ken ti Tanem.*+
19 Isuratmo ngarud dagiti bambanag a nakitam, ken dagiti bambanag nga addan, ken dagiti bambanag a maaramidto kalpasan dagitoy.
20 Ti pito a bituen a nakitam iti kannawan nga imak ken ti pito a balitok a kandelero ket sagrado a palimed, ken daytoy ti kaipapananda: Ti pito a bituen irepresentarda dagiti anghel iti pito a kongregasion, ken ti pito a kandelero irepresentarda ti pito a kongregasion.+
Footnotes
^ Wenno “palgaak; paltiing.”
^ Wenno “ti A ken ti Z.” Ti Alpha ti umuna ket ti Omega ti maudi a letra iti Griego nga alpabeto.
^ Wenno “langana.”
