Isaias 20:1-6
-
Pagilasinan maibusor iti Egipto ken Etiopia (1-6)
20 Idi tawen nga imbaon ni Sargon nga ari ti Asiria ti Tartan* idiay Asdod,+ ginubatna dayta ket sinakupna.+
2 Iti dayta a tiempo, nagsao ni Jehova babaen ken Isaias+ nga anak ni Amoz, ket kinunana: “Mapanka, ikkatem ti nakersang a lupot iti patongmo ken dagiti sandalias iti sakam.” Kasta ti inaramidna, ket nagpagnapagna a nakaussob ken sakasaka.
3 Kalpasanna, kinuna ni Jehova: “No kasano a nagpagnapagna a nakaussob ken sakasaka ti adipenko a ni Isaias iti tallo a tawen kas pagilasinan+ ken tanda maibusor iti Egipto+ ken Etiopia,+
4 ipanawto met ti ari ti Asiria dagiti natiliw iti Egipto+ ken iti Etiopia, ubbing ken lallakay, a nakaussob ken sakasaka ken awan abbong ti patongda. Wen, maibabainto* ti Egipto.
5 Mabuteng ken mabaindanto gapu ta nagtalekda iti Etiopia ken impannakkelda* ti Egipto.
6 Iti dayta nga aldaw, ibaganto dagiti agnanaed iti daytoy nga igid ti baybay, ‘Kitaenyo ti napasamak iti pagtaltalkantayo, a nagkamangantayo tapno tulongan ken ispalennatayo iti ari ti Asiria! Kasanotayo itan a makalibas?’”
Footnotes
^ Wenno “komander.”
^ Lit., “maiparangto ti kinalamolamo.”
^ Wenno “indaydayawda ti pintas.”
