Isaias 8:1-22
8 Kinuna kaniak ni Jehova: “Mangalaka iti dakkel a tabla+ ket isuratmo iti dayta ti ‘Maher-salal-has-baz’* babaen ti ordinario a pagsurat.*
2 Patalgedak dayta iti surat* babaen dagiti matalek a saksi, ni Urias+ a padi ken ni Zacarias nga anak ni Jeberekias.”
3 Kalpasanna, nakidennaak* iti propeta a babai,* ket nagsikog ken nangipasngay iti lalaki idi agangay.+ Kinuna kaniak ni Jehova: “Panaganam iti Maher-salal-has-baz,
4 ta sakbay pay nga ammo ti ubing nga ipukkaw ti ‘Tatangko!’ ken ‘Nanangko!’ maipanawton dagiti sanikua ti Damasco ken ti innala ti Samaria tapno maipan dagita iti sanguanan ti ari ti Asiria.”+
5 Imbaga manen kaniak ni Jehova:
6 “Gapu ta linaksid daytoy nga ili ti nainayad ti panagayusna a danum ti Siloa*+Ken nagragsakda gapu ken Rezin ken iti anak ni Remalias,+
7 Iyegto ngarud ni Jehova maibusor kadakuadaTi napegges ken adu a danum ti Karayan,*Ti ari ti Asiria+ ken ti amin a dayagna.
Punnuennanto ti amin a lansadnaKen paglippiasenna ti amin nga igidna
8 Ken agayus agingga iti Juda.
Manglayus ken lumasatto, a dumanon iti tengnged;+Iyukradnanto dagiti payakna ket saknapanna ti intero a dagam,O Immanuel!”*+
9 Mangdangrankayo, dakayo nga ili, ngem maburakburakkayto.
Dumngegkayo, dakayo amin a naggapu iti adayo a paspaset ti daga!
Agsaganakayo a makigubat,* ngem maburakburakkayto!+
Agsaganakayo a makigubat, ngem maburakburakkayto!
10 Agplanokayo, ngem saanto nga agballigi!
Ibagayo ti kayatyo, ngem saanto a matungpal,Ta adda kadakami ti Dios!*+
11 Adda kaniak ti napigsa nga ima ni Jehova, ket daytoy ti kinunana tapno pakdaarannak a saan a sumurot iti daytoy nga ili:
12 “Dikay makiraman no agkukumplot daytoy nga ili!
Diyo kabuteng ti kabutengda;Diyo kaamak dayta.
13 Ni Jehova a panguluen dagiti armada—isu ti bigbigenyo a nasantuan,+Isu ti rumbeng a pagbutnganyo,Ken Isu ti rumbeng a kaamakyo.”+
14 Agbalinto a kas santuario,Ngem agbalinto met a kas bato a pakaidungparanKen kas dakkel a bato a pakaitibkolan+Ti dua a sangakabbalayan ti Israel,Kas palab-og ken siloKadagiti agnanaed iti Jerusalem.
15 Adunto kadakuada ti maitibkol ken matuang ken mablo;Masiluan ken matiliwdanto.
16 Lukotenyo ti naisurat a kompirmasion;*Ikkanyo iti selio ti linteg* iti tengnga dagiti adalak!
17 Agtultuloyakto a mangnamnama* ken Jehova,+ a nangitallikud iti rupana iti sangakabbalayan ni Jacob,+ ket mangnamnamaakto kenkuana.
18 Adtoy! Siak ken dagiti annak nga inted kaniak ni Jehova+ ket kasla pagilasinan+ ken milagro iti Israel manipud ken Jehova a panguluen dagiti armada, nga agtataeng idiay Bantay Sion.
19 No ibagada kadakayo: “Agkonsultakayo kadagiti espiritista wenno mammadles nga agar-arasaas ken agtantanamitim,” saan aya a rumbeng nga agkonsulta ti maysa nga ili iti Diosda? Rumbeng aya nga agkonsultada kadagiti natay para kadagiti sibibiag?+
20 Saan, no di ket rumbeng nga agkonsultada iti linteg ken iti naisurat a kompirmasion!*
No saanda nga agsao maitunos iti daytoy a sao, awanto kadakuada ti lawag.*+
21 Lumasatto ti tunggal maysa iti daga a marigrigatan ken mabisbisin;+ ket gapu ta mabisin ken agpupungtot, tumangadto ken ilunodna ti arina ken ti Diosna.
22 Kalpasanna, kumita iti daga ngem ti laeng makitana ket riribuk ken kinasipnget, kinalidem ken narigat a tiempo, kinakuyem ken kaawan ti raniag.
Footnotes
^ Lit., “babaen ti pagsurat ti tao.”
^ Mabalin a kaipapananna, “Agdardaras iti Samsam, Agdardaras nga Umay iti Samsam.”
^ Wenno “Saksiak dayta; Paneknekak dayta.”
^ Lit., “immasidegak.”
^ Kayatna a sawen, ti asawa ni Isaias.
^ Ti Siloa ket pagayusan ti danum.
^ Kayatna a sawen, ti Eufrates.
^ Wenno “Agbarikeskayo.”
^ Wenno “pammaneknek.”
^ Wenno “instruksion.”
^ Wenno “Agurayakto a sigagagar.”
^ Wenno “pammaneknek.”
^ Lit., “bannawag.”
