Malakias 3:1-18
3 “Adtoy! Ibaonko ti mensaherok, ket dalusannanto* ti dalan iti sanguanak.+ Bigla nga umayto iti templona ti pudno nga Apo,+ a sapsapulenyo; ket umayto ti mensahero ti tulag, a pakaragsakanyo. Sigurado nga umayto,” kuna ni Jehova a panguluen dagiti armada.
2 “Ngem asinonto ti makaibtur iti aldaw ti iyaayna, ken asinonto ti makapagtakder inton agparang? Ta kaslanto iti apuy ti manangpasudi ken kas iti turo*+ dagiti paralaba.
3 Agtugawto a kas manangpasudi ken agdaldalus iti pirak+ ket dalusannanto ti annak ni Levi; ken dalusannanto* ida a kas iti balitok ken pirak, ket agbalindanto ken Jehova kas tattao a mangipapaay iti daton a sagut buyogen ti kinalinteg.
4 Makaay-ayonto* ken Jehova ti daton a sagut ti Juda ken Jerusalem, kas idi nagkauna nga aldaw ken nabayagen a tawtawen.+
5 “Umasidegakto kadakayo tapno ukomenkayo, ket alistoakto nga agtestigo maibusor kadagiti mangkukulam,+ mannakikamalala, agsapsapata iti ulbod,+ mangal-allilaw kadagiti matangtangdanan a trabahador,+ balo a babai, awanan ama nga ubing,*+ ken kadagiti saan a tumulong iti* ganggannaet.+ Saan a nagbuteng kaniak dagitoy,” kuna ni Jehova a panguluen dagiti armada.
6 “Ta siak ni Jehova; saanak nga agbalbaliw.*+ Ket annaknakayo ni Jacob; saankayo pay a nagpatingga.
7 Manipud idi kaaldawan dagidi ammayo, sinukir ken saanyo a tinungpal dagiti regulasionko.+ Agsublikayo kaniak, ket agsubliakto kadakayo,”+ kuna ni Jehova a panguluen dagiti armada.
Ngem kinunayo: “Kasanokami nga agsubli?”
8 “Mabalin kadi a takawan ti tao ti Dios? Ngem taktakawandak.”
Ket kinunayo: “Kasanodaka a tinakawan?”
“Kadagiti apagkapullo ken kontribusion.
9 Mailunodkayo* ta taktakawandak—wen, ar-aramiden dayta ti intero a nasion.
10 Ipanyo iti kamarin ti amin nga apagkapullo+ tapno adda taraon iti balayko.+ Pangngaasiyo ta subokendak iti daytoy a banag,” kuna ni Jehova a panguluen dagiti armada, “ket kitaenyo no saankonto a luktan dagiti pagruaran ti danum iti langit+ ken ibukbok kadakayo ti bendision agingga nga adda aminen a kasapulanyo.”+
11 “Tubngarekto daydiay mangalun-on* kadakayo, ket saannanto a dadaelen ti apit ti dagayo, ken agbunganton ti kaubasanyo,”+ kuna ni Jehova a panguluen dagiti armada.
12 “Ibaganto ti amin a nasion a naragsakkayo,+ ta agbalinkayto a daga a pakaragsakan,” kuna ni Jehova a panguluen dagiti armada.
13 “Nasakit ti panagsasaoyo kaniak,” kuna ni Jehova.
Ket kinunayo: “Kasano a nagsaokami maibusor kenka?”+
14 “Imbagayo, ‘Awan mamaay ti agserbi iti Dios.+ Kasano a nagunggonaankami iti panangaramidmi iti obligasionmi kenkuana ken iti pannagnami a sililiday iti sanguanan ni Jehova a panguluen dagiti armada?
15 Ita, ibilangmi a naragsak ti napannakkel. Kasta met a naballigi dagidiay agar-aramid iti dakes.+ Naturedda a mangsubok iti Dios, ket saanda a madusdusa.’”
16 Iti dayta a tiempo, nagsasarita dagidiay agbuteng ken Jehova, ket dimngeg ken nangipangag ni Jehova. Adda libro a pakalaglagipan a naisurat iti sanguananna+ para kadagidiay agbuteng ken Jehova ken kadagidiay mangpampanunot* iti naganna.+
17 “Kukuakto ida,”+ kuna ni Jehova a panguluen dagiti armada, “iti aldaw a mangpataudak iti espesial a sanikua.*+ Kaasiakto ida, no kasano a kaasian ti maysa a tao ti anakna nga agserserbi kenkuana.+
18 Ket makitayonto manen ti nagdumaan ti nalinteg a tao ken ti dakes a tao,+ ti agserserbi iti Dios ken ti saan nga agserserbi kenkuana.”
Footnotes
^ Wenno “isaganananto.”
^ Wenno “sabon.”
^ Wenno “pasudiennanto.”
^ Wenno “Makaparagsakto.”
^ Wenno “mangipapaidam iti kalintegan ti.”
^ Wenno “ulila.”
^ Wenno “saanak a nagbaliw.”
^ Wenno mabalin nga, “Ilunlunoddak babaen ti maysa a lunod.”
^ Nalabit tumukoy iti panangdadael dagiti insekto.
^ Wenno “mangut-utob.” Wenno mabalin a, “mangipatpateg.”
^ Wenno “maipatpateg a sanikua.”
