Proverbio 26:1-28
26 Saan a maikari ti dayaw iti maysa a maag,+Kas iti niebe iti kalgaw ken tudo iti tiempo ti panagani.
2 No kasano nga adda makagapu a pumanaw ti billit ken agtayab ti sallapingaw,Saan met a dumteng ti lunod nga awan gapgapuna.*
3 Ti saplit ket para iti kabalio, ti rienda ket para iti asno,+Ken ti baut ket para iti bukot dagiti maag a tao.+
4 Dimo sungbatan ti maag maitunos iti kinamaagna,Tapno saanka nga agbalin a kas kenkuana.*
5 Sungbatam ti maag maitunos iti kinamaagna,Tapno saanna nga ipapan a masirib.+
6 Ti mangitaltalek iti bambanag iti maagKet kas iti tao a mangpilpilay iti sakana ken mangdangdangran iti bagina.*
7 Ti proverbio iti ngiwat dagiti maag+Ket kas iti agsagkisagking* a saka ti pilay.
8 Ti panangpadayaw iti maag+Ket kas iti panangigalut iti bato iti pallatibong.
9 Ti proverbio iti ngiwat dagiti maagKet kas iti siitan a mula nga adda iti ima ti mammartek.
10 Ti mangtangdan iti maag wenno kadagiti lumablabasKet kas iti pumapana a mangpana iti uray asino lattan.*
11 Ti maag a mangulit-ulit iti kinamaagnaKet kas iti aso a mangkaan iti bukodna a sarua.+
12 Nakakitaka kadin iti tao a mangipagarup a masirib?+Ad-adu ti namnama ti maag ngem isuna.
13 Kuna ti sadut: “Adda urbon a leon iti dalan,Adda leon iti plasa!”+
14 Agpuspusipos ti ridaw iti bisagrana,Ket agballiballikid ti sadut iti iddana.+
15 Ikabil ti nasadut ti imana iti dakkel a malukong,Ngem kasadutna nga isubo dayta.+
16 Ipagarup ti sadut a nasirsiribNgem iti pito a tao a mangted iti nainsiriban a sungbat.
17 Ti lumablabas a makapungtot* iti riri ti sabali+Ket kas iti maysa a manggammat iti lapayag ti aso.
18 Kas iti agmauyong a mangitira kadagiti umap-apuy nga armas ken makapapatay a pana,
19 Ti kayarigan ti tao a mangallilaw iti kaarrubana sa ibagana, “Agang-angawak laeng!”+
20 Maiddep ti apuy no awan ti sungrod,Ken agsardeng ti riri no awan ti manangpadakes.+
21 Ti mannakiapa a tao pakaruenna ti riri,+Kas iti uging ken pagsungrod a mangrubrob iti apuy.
22 Ti sasao ti manangpadakes ket kasla naimas a makan;*Maalimon dagita a diretso iti tian.+
23 Ti naayat a sasao manipud* iti dakes a puso+Ket kas iti pirak a pangpasileng iti ribak ti damili.
24 Ti manggurgura iti sabsabali agpammarang babaen ti bibigna,Ngem mangal-allilaw iti un-unegna.
25 Dika agtalek kenkuana uray no nasayaat ti panagsasaona,Ta adda pito a makarimon iti pusona.*
26 Uray ilemmengna ti gurana babaen ti panangallilaw,Maibutaktakto kadagiti tattao ti kinadakesna.
27 Ti mangkali iti abut matnagto iti dayta,Ket ti mangitulid iti bato—agsublinto dayta kenkuana.+
28 Ti ulbod a dila kagurana dagiti sinaktanna,Ket ti mangpaspasablog a ngiwat mangpataud iti pannakadadael.+
Footnotes
^ Wenno mabalin a, “Saan met a lumabas ti lunod a di pakaikarian.”
^ Wenno “Tapno saankayo nga agpada.”
^ Lit., “umin-inum iti kinaranggas.”
^ Wenno “agpallapallayog.”
^ Wenno “a mangsugat iti asinoman.”
^ Wenno mabalin a, “makibiang.”
^ Wenno “kasla bambanag a siaagum a maalimon.”
^ Lit., “nasged a bibig nga addaan.”
^ Wenno “Ta naan-anay a makarimon ti pusona.”
