Proverbio 6:1-35
6 Anakko, no nanggarantiaka* para iti kaarrubam,+No nakialamanoka* iti maysa nga estranghero,+
2 No nasiluanka iti inkarimKen natiliwka iti imbagam,+
3 Kastoy ti aramidem, anakko, tapno mawayawayaanka,Ta natnagka iti ima ti kaarrubam:
Agpakumbabaka ket dagus nga agpakaasika kenkuana.+
4 Dimo ipalubos a makaturogka,Wenno agkidem dagiti matam.
5 Lumapsutka a kas gasela iti ima ti mangnganup,Kas billit iti ima ti agtiltiliw iti billit.
6 Mapanka ken kuton, sika a sadut;+Paliiwem dagiti aramidna ket agbalinka a masirib.
7 Nupay awanan iti komander, opisial, wenno agturay,
8 Isaganana ti taraonna iti kalgaw,+Ken agurnong iti taraonna bayat ti panagani.
9 Kasano kabayag a nakaiddaka, sika a sadut?
Kaanoka a bumangon iti pannaturogmo?
10 Bassit pay a turog, bassit pay a ridep,Bassit pay a dalikepkep tapno aginana,+
11 Ket umayen ti kinapanglawmo kas iti mannanakaw,Ken ti panagkasapulam kas iti armado a lalaki.+
12 Agsursursor ti dakes ken awan serserbina a tao a dakes ti ibagbagana;+
13 Ikiremkiremna ti matana,+ ipadpaddekna ti sakana, ken isenseniasna dagiti ramayna.
14 Gapu iti nasikap a pusona,Kanayon nga agplano iti dakes+ ken agiwaras iti riri.+
15 Iti kasta, biglanto a madidigra;Apagbiitto a madadael ket saanen nga umimbag.+
16 Adda innem a banag a kagura ni Jehova;Wen, pito a banag ti karimonna:
17 Natangsit a mata,+ ulbod a dila,+ ken ima nga agibukbok iti dara ti inosente a tao,+
18 Puso nga agplano iti dakes,+ ken saka nga agdardaras nga agaramid iti dakes,
19 Ulbod a testigo a kanayon nga agulbod,+Ken asinoman a mangpataud iti riri dagiti agkakabsat.+
20 Anakko, tungpalem ti bilin ni tatangmo,Ken dimo sukiren ti instruksion* ni nanangmo.+
21 Kanayon nga ibedbedmo dagita iti pusom;Igalutmo dagita iti tengngedmo.
22 Idalannakanto no magnaka;Bantayannakanto no agiddaka;Ken kasaritanakanto* no agriingka.
23 Ta ti bilin ket lampara,+Ken ti linteg ket lawag,+Ken ti pannubngar ken disiplina ket dalan ti biag.+
24 Saluadandakanto iti dakes a babai,+Iti manggargari a dila ti immoral* a babai.+
25 Saan koma a tarigagayan ta pusom ti pintasna+Wenno dimo ipalubos a maallukoyka iti makaay-ayo a matana,
26 Ta gapu iti balangkantis, maymaysa ti tinapay ti maysa a lalaki,+Ngem ti mannakikamalala a babai, siluanna ti napateg a biag.*
27 Mabalin kadi a mangikabil ti maysa a tao iti apuy iti barukongna ngem saan a mapuoran dagiti badona?+
28 Wenno mabalin kadi a magna iti beggang ti maysa a tao ngem saan a masinit ti dapanna?
29 Kasta met ti mapasamak iti asinoman a makidenna iti asawa ti kaarrubana;Madusa ti asinoman a mangsagid iti dayta a babai.+
30 Saan a laisen dagiti tattao ti mannanakawNo agtakaw tapno mapennek ti bisinna.*
31 Ngem no maduktalan, agbayadto iti mamimpito;Itednanto amin a napateg a banag iti balayna.+
32 Saan a masirib* ti asinoman a makikamalala iti maysa a babai;Daydiay mangaramid iti dayta daddadaelenna ti bagina.*+
33 Sugat ken pannakaibabain laeng ti maganabna,+Ket saanto a mapunas ti pannakaibabainna.+
34 Ta agpungtot ti asawa a lalaki gapu iti imon;Saanto a mangngaasi no agibales.+
35 Saanto nga umawat iti danios;*Saanto a maay-ayo, uray no kasano kadakkel ti sagutmo.
Footnotes
^ Kayatna a sawen, namatalgedka.
^ Lit., “nangtedka iti kolateral.”
^ Wenno “linteg.”
^ Wenno “bilinennakanto.”
^ Wenno “kararua.”
^ Wenno “mabsog ti kararuana.”
^ Lit., “Awanan iti puso.”
^ Wenno “kararuana.”
^ Wenno “subbot.”
