Salmo 69:1-36
Iti direktor; naisurot iti tono “Dagiti Lirio.” Salmo ni David.
69 Isalakannak, O Dios, ta dagiti danum pangpangtaanda ti biagko.+
2 Nailumlomak iti nauneg a kapitakan ket awan ti natangken a daga a pagbatayak.+
Limnedak iti adalem a danum,Ket inyanudnak ti naapres a waig.+
3 Nabannogakon iti kapupukkawko;+Nasakiten ti karabukobko.
Naapgesen dagiti matak a mangur-uray iti Diosko.+
4 Dagiti manggurgura kaniak nga awan gapgapuna+Ket ad-adu ngem kadagiti buok ti ulok.
Immadu dagiti mayat a mangpatay kaniak,Ken dagiti manangallilaw a kabusorko.*
Pinilitdak a mangisubli kadagiti saanko a tinakaw.
5 O Dios, ammom ti kinamaagko,Ket saan a mailemmeng kenka ti basolko.
6 Saan koma a siak ti gapuna a maibabain dagidiay mangin-inanama kenka,O Kangatuan* nga Apo, Jehova a panguluen dagiti armada.
Saan koma a siak ti gapuna a malalais dagidiay mangsapsapul kenka,O Dios ti Israel.
7 Maum-umsiak gapu kenka,+Malmalmesak iti bain.+
8 Nagbalinak nga estranghero kadagiti kakabsatko,Ken ganggannaet kadagiti annak ni nanangko.+
9 Ti panangipategko iti balaymo ket kasla apuy a sumsumged iti pusok,+Ket siak ti nagtupakan ti pananguyaw dagidiay manguy-uyaw kenka.+
10 Idi nagpakumbaba ken nagayunarak,*Naum-umsiak.
11 Idi nagbadoak iti nakersang a lupot,Inuy-uyawdak.*
12 Siak ti pagsasaritaan dagidiay agtugtugaw iti ruangan ti siudad,Ken siak ti ikankanta dagiti mammartek.
13 Ngem dumanon koma kenka dagiti kararagko,O Jehova, iti inkeddengmo a tiempo.+
Gapu iti dakkel a napudno nga ayatmo, O Dios,Sungbatannak babaen ti sigurado a panangisalakanmo kaniak.+
14 Aonennak iti kapitakan;Dimo ipalubos a mailumlomak.
Arayatennak kadagiti manggurgura kaniakKen alawennak iti adalem a danum.+
15 Dimo ipalubos nga iyanudnak ti napegges a layus,+Dimo itulok a malmesak iti kaadalman,Dimo ipalubos a diak makaaon iti nakatnagak a bubon.*+
16 Sungbatannak, O Jehova, ta naimbag ti napudno nga ayatmo kaniak.+
Gapu iti dakkel nga asim, taliawennak,+
17 Dimo tallikudan daytoy adipenmo.+
Sungbatannak a dagus ta napalalo ti rigatko.+
18 Asitgannak ket ispalennak;Subbotennak kadagiti kabusorko.
19 Ammom ti pannakaum-umsik ken pannakauy-uyaw ken pannakaibabainko.+
Makitkitam ti amin a kabusorko.
20 Gapu iti panangumsi, nasugatan ti pusok, ket saanen a maagasan.*
Nangnamnamaak nga adda makipagrikna ngem awan man la ti immay kaniak,+Nagur-urayak kadagiti mangliwliwa ngem awan man la ti immasideg kaniak.+
21 Ngem sabidong* ketdin ti intedda a kanek,+Ken idi mawawak, suka ketdin ti impainumda kaniak.+
22 Pagbalinem koma ti lamisaanda a pakasiluanda,Ken pagbalinem koma a palab-og kadakuada ti kinarang-ay ti biagda.+
23 Pagsipngetem koma dagiti matada tapno dida makakita,Ken kanayon a pagpigergerem ti sakada.
24 Ibukbokmo kadakuada ti kasta unay a pungtotmo,Layusem ida iti ungetmo.+
25 Mabaybay-an koma ti kampoda;*Awan koman ti agnaed kadagiti toldada.+
26 Ta kinamatda daydiay kinabilmo,Ken sangkaestoriada ti ut-ot dagidiay sinugatmo.
27 Nayonam pay iti basol ti basolda,Ket saanmo koma ida nga iraman kadagiti ibilangmo a nalinteg.
28 Ikkatem koma ti naganda iti libro dagiti sibibiag,*+Ket awanda koma iti nakaisuratan ti nagan dagiti nalinteg.+
29 Ngem marigrigatanak ken agpapaut-otak.+
O Dios, ti koma bilegmo a mangisalakan ti mangsalaknib kaniak.
30 Agkantaakto iti panangidaydayaw iti nagan ti Dios,Ket itan-okkonto a napakuyogan iti panagyaman.
31 Ad-adda a pakaragsakan daytoy ni Jehova ngem iti maidaton a baka,Ad-adda a pakaragsakanna ngem kadagiti baka nga addaan iti sara ken nagpisi dagiti kukoda.+
32 Makitanto dayta dagiti naemma ket agragsakdanto.
Dakayo a mangsapsapul iti Dios, patibkerenyo manen dagiti pusoyo.
33 Ta ipangpangag ni Jehova dagiti napanglaw,+Ken saanna nga umsien dagiti naipanaw* a tattaona.+
34 Ti Dios ket idaydayaw koma ti langit ken ti daga,+Ti baybay ken amin a linaonna.
35 Ta isalakanto ti Dios ti Sion+Ket bangonennanto manen dagiti siudad ti Juda,Ket agnaedto sadiay dagiti tattaona ken kukuadan dayta.*
36 Tawidento dayta ti annak dagiti adipenna,+Ken agnaedto iti dayta ti amin a mangipatpateg iti naganna.+
Footnotes
^ Wenno “mangbusbusor kaniak nga awan gapgapuna.”
^ Wenno “Soberano.”
^ Wenno mabalin nga, “Idi nagsangit ken nagayunarak.”
^ Lit., “Nagbalinak kadakuada a maysa a proverbio.”
^ Wenno “abut.”
^ Wenno “ket napaayakon.”
^ Wenno “makasabidong a mula.”
^ Wenno “napaderan a kampoda.”
^ Wenno “libro ti biag.”
^ Wenno “kautibo.”
^ Kayatna a sawen, ti daga.
