Patgenmi a Kakabsat:

Sipapakumbaba a binigbig ni propeta Isaias nga aniaman a balligi ken kinarang-ay a napasaran ti Pagarian ti Juda ket maigapu laeng iti pamendision ni Jehova. Kinunana iti Isaias 26:12: “O Jehova, . . . dagiti amin nga aramidmi inaramidmo a maipaay kadakami.” No utobentayo dagiti nagapuanan ti organisasion iti napalabas a tawen serbisio, kasta met laeng ti maibagatayo. Talaga nga agar-aramid ni Jehova kadagiti “nakaskasdaaw a bambanag” a saan pay a pulos napasamak! (Ex. 34:10) Panunotenyo laengen ti dadduma kadagiti bendision nga impaay ni Jehova.

Nagsayaat ti pannakausar ti website-tayo a jw.org. Maluktanen dayta iti nasurok nga 600 a lengguahe, ken mabalinen a basaen ken i-download dagiti publikasion iti nasurok a 750 a lengguahe. Kasano kaepektibo daytoy a website iti panangidanon iti kinapudno kadagiti mayat a mangammo iti dayta? Usigem: Maysa a pagassawaan ti maup-upay iti relihion gapu iti panaginsisingpet a nakitada iti dayta. Iti panangbirokda iti panangiwanwan ti Dios, nakitada ti website-tayo. Manipud idin, regular a lukluktandan ti website tapno agbasa kadagiti artikulo iti publikasiontayo ken agbuya kadagiti video. In-download-da pay ti bokleta a Panangsukimat iti Kasuratan iti Inaldaw ken basbasaenda dayta iti inaldaw a kadua ti dua a tin-edyer nga annakda. Kinapudnona, dayta ti ar-aramidenda  iti maysa nga agsapa nga adda nagtuktok a Saksi ni Jehova iti ruanganda. Naammuan dagiti Saksi a gapu iti panangluklukatda iti website, adun ti binalbaliwanda iti biagda. Inikkatdan dagiti tattoo ken dagiti aritos iti nadumaduma a paset ti bagida, imbellengdan dagiti narelihiosuan nga imahenda, saandan a selselebraran dagiti nailubongan a selebrasion, ken insardengdan ti agbuya kadagiti saan a nasayaat a pelikula. Inaramidda amin dagita sakbay pay nga adda Saksi a nakasaritada! Idi maisursurat daytoy, ti agassawa ken ti maysa nga anakda ket di bautisadon nga agibumbunannag ken planon ti agassawa ti mabautisaran iti mabiit.

Adu ti nangyebkas iti apresasionda iti sabali pay a nagsayaat a probision: ti JW Broadcasting. Mabuyan ti binulan a programa iti nasurok a 70 a lengguahe, ket ad-adunto pay a lengguahe ti pakaipatarusanna. Buybuyaen ti adu a pamilia dayta a programa bayat ti Panagdaydayaw ti Pamiliada. Kuna ti maysa a kabsat a lalaki, “Ita pay laeng a kastoy kadakkel ti organisasion, ngem ita pay laeng met a nariknami a nakaas-asidegkami iti hedkuarter!”

Dagiti kombension ti maysa kadagiti kararagsakan nga okasion para iti ili ni Jehova. Maysa kadagita ti kombension iti 2015 a tawen serbisio. Naipabuya iti dayta a kombension ti 42 a video ken ladladawan ken ti innem a nagpipintas a musical video presentation iti rugi ti tunggal sesion. Kinuna ti maysa nga eksperiensiado a kabsat a lalaki maipapan iti kombension, “Kasla awan ti mayat a pumanaw iti tugawna bayat ti programa, ta saanda a kayat nga adda pakaikapisanda.” Kinuna met ti maysa a misionero, “Gapu kadagiti video, ad-addan a napaypayso kaniak ti kinapudno ken ti Pagarian.”

 Idi napan a tawen, binendisionannatayo met ni Jehova kadagiti baro a kanta ti Pagarian. Insurat ti maysa nga agassawa: “Kasla ar-arakupennakami ni Apo Jehova no dengdenggenmi dagiti baro a kanta. Linawaganda dagiti nalidem a panawen ti biagmi.” Impalagip kadatayo ti kombension ti naayat a panagtrabaho ti Watchtower orchestra ken ti Watchtower chorus para kadatayo. Inaramidda amin dagita tapno ad-adda a maidaydayaw ni Jehova!

Makiramraman kadi ti kongregasionyo iti panangasaba iti publiko babaen ti panangusar iti cart? Talaga a maysa a bendision daytoy a pamay-an ti panangasaba! Maidandanonen ti kinapudno iti umuna a gundaway kadagiti aggigian iti guardiado a komunidad wenno kadagiti nangato nga apartment building. Adu met ti matultulongan iti naespirituan, a pakairamanan dagiti di aktibo a Saksi. Idi Enero 2015, adda lalaki nga immasideg iti cart idiay South Korea. Imbagana nga iti laeng nabiit, pampanunotenna dagiti naespirituan a bambanag. Nairugi a mayadalan iti Biblia ti lalaki. Iti simmaruno a bulan, nakigimong iti umuna a gundaway. Iti Marso, insardengnan ti agsigarilio. Sa iti Abril, bimmisita iti sangay ti South Korea, ken agtultuloy ti napartak a panagrang-ayna iti naespirituan. Maysa laeng daytoy kadagiti nakaad-adu a naisurat a kapadasan a naawatmi ditoy sangalubongan a hedkuarter.

Ikarkararagmi a babaen iti broshur a nairuar iti kombension, matignay koma ti adu a di aktibo ket agsublida iti naayat a panangaywan ni Jehova sakbay a maladaw ti amin! Paregtaendakayo a tuladenyo ni Jehova ket siaayat nga awatenyo dagiti agsubli.—Ezeq. 34:16.

 Talaga a binendisionan ni Jehova ti ilina iti napalabas a tawen serbisio. Ania pay dagiti bendision nga ipaayna? Makitatayto. Kabayatanna, kayatmi a maammuanyo a dakami a miembro ti Bagi a Manarawidwid ay-ayatendakayo unay ken kanayon nga ikarkararagandakayo.

Awatenyo ti nabara a kablaawmi,

Dagiti kakabsatyo,

Bagi a Manarawidwid Dagiti Saksi ni Jehova