KAPITULO 18

Kasanoak a Maaddaan iti Bukodko a Kuarta?

“Kayatko ti gumatang iti kotse.”​—Sergio.

“Kayatko ti mapan ag-shopping.”​—Laurie-Ann.

“Adda dagiti kayatko a gatangen ngem saan a kabaelan dagiti dadakkelko.”​—Mike.

NALABIT umasping kadagita ti rason no apay a kayatmo ti maaddaan iti bukodmo a kuarta. Wenno nalabit, masapul nga agtrabahoka tapno makatulongka iti pamiliam. Uray no saandaka nga obligaren dagiti dadakkelmo a tumulong kadagiti binulan a babayadan, dakkel a bang-arda no bukodmo a kuarta ti gastosem para iti kawesmo wenno iti dadduma pay a kayatmo a gatangen.

Aniaman ti kasasaad, masapulmo ti kuarta no gumatangka iti aniaman a banag a para kenka wenno para iti pamiliam. Nupay inkari ni Jesus nga ipaay ti Dios ti kasapulan dagidiay ‘mangsapul nga umuna iti Pagarian,’ kaskasdi a nasken nga agtrabaho  ti maysa a Kristiano tapno magatangna dagiti kasapulanna. (Mateo 6:33; Aramid 18:1-3; 2 Tesalonica 3:10) No kasta, kasanoka a maaddaan iti kuarta? Ken napatpateg pay, ania ti aramidem tapno ti pananggedmo ket dina apektaran ti panagserbim iti Dios?

No Kasano a Maaddaanka iti Trabaho

No talaga a kasapulam ti maysa a banag ngem saan a kabaelan a gatangen dagiti nagannak kenka, baka kasapulan a sumrekka iti trabaho tapno mayurnongam dayta. Ibagam kadagiti dadakkelmo dayta a planom. Nalabit apresiarenda ti panagdisnudom nga agtrabaho. No bilang ta umanamongda ken addaka metten iti husto nga edad tapno agtrabaho, adtoy ti uppat a singasing a tumulong kenka a sumrek iti trabaho.

Ibagam kadagiti am-ammom ti maipapan iti planom. Ibagam kadagiti kaarruba, mannursuro ken kakabagiam nga agsapsapulka iti trabaho. No mabainka a mangsaludsod no agsapsapulda iti trabahador wenno no adda ammoda nga agsapsapul iti trabahador, mabalinmo a saludsoden no ania ti trabaho nga inar-aramidda idi agtutuboda a kas kenka. No ad-adu ti makaammo nga agsapsapulka iti trabaho, ad-adu met ti maammuam a mabalinmo a sumrekan.

Padasem amin a pamay-an. Padasem ti agaplay kadagiti trabaho a naipakaammo iti pagiwarnak wenno iti Internet ken kadagiti naipaskil nga impormasion iti pagtagilakuan, iti eskuelaan, ken dadduma pay a publiko a lugar. “Kasta ti inaramidko isu a nakasapulak iti trabaho,” kuna ti agtutubo a ni Dave. “Nagkitaak iti  pakaammo iti pagiwarnak sa nagipatulodak iti résumé. Kalpasanna, awagak ida iti telepono.” No saan nga epektibo daytoy, nalabit mabalinmo a kombinsiren ti maysa nga amo a kasapulanna ti mangobra iti daytoy wenno daydiay, ket sisasaganaka a mangipaay iti kasta a serbisio.

Mangisaganaka iti adu a résumé ket iwarasmo dayta. Iti bassit a papel, isuratmo no kasanodaka a makontak ken ilistam dagiti paglaingan ken kapadasam iti trabaho. Awan kadi ti mapanunotmo nga ilista? Lagipem, sika kadi ti paraaw-awir iti adingmo no awan dagiti dadakkelmo, wenno napadasam kadin ti nagaw-awir iti annak dagiti dadduma a tattao? Pakakitaan dayta a responsableka. Tinultulongam kadin ni tatangmo nga agtarimaan iti lugan? Nalabit pakakitaan daytoy a kabaelam ti agmekaniko. Nalaingka kadi nga agmakinilia wenno agusar iti kompiuter? Wenno nangato kadi ti gradom idiay eskuelaan gapu iti kinalaingmo nga agpartuat? Dagita a paglaingan ti sapsapulen dagiti amo kadagiti aplikante. Iramanmo dagita iti aramidem a résumé sa itedmo dayta iti posible nga agbalinto nga amom. Ikkam met dagiti gagayyem ken kakabagiam iti iwarasda kadagidiay madamagda nga agsapsapul iti trabahador.

Mangpanunotka iti bukodmo a pamastrekan. Panunotem dagiti kaarrubam. Adda kadi agsapsapul iti produkto wenno serbisio nga awan sabali a mangipapaay? Kas pagarigan, baka pagay-ayatmo ti animal. Mabalin nga ibagam iti kaarrubam a sika laengen ti tangdananna a mangdigus wenno mangpukis iti tarakenna. No ngay nalaingka nga agtokar iti maysa nga instrumento ti musika? Baka mabalinmo ti agisuro. Wenno, mabalinmo met a padasen dagiti trabaho a saan a kayat ti kaaduan, kas koma iti panagdalus iti tawa. Saan a mabain dagiti Kristiano a mangaramid kadagiti nanumo a trabaho. (Efeso 4:28) Siempre, tapno maaddaanka iti bukodmo a pamastrekan, nasken nga addaanka iti determinasion, disiplina iti bagi, ken kinatulok.

 Adda laeng banag a laglagipem: Dika agdardarasudos a mangirugi iti negosio no dimo pay natingiting ti amin a banag a nairaman iti dayta. (Lucas 14:28-30) Umuna, makitungtongka kadagiti dadakkelmo. Makisaritaka met kadagiti dadduma a nakapadas iti kasta met laeng a trabaho. Adda kadi buis a masapul a bayadam? Kasapulan kadi a mangalaka iti lisensia? Para kadagiti detalye, agkonsultaka kadagiti lokal nga agtuturay.​—Roma 13:1.

Agbalinka a Balanse

Iladawam iti panunotmo nga ikagkagumaam ti aglugan iti bisikleta bayat a karkarataymo ti bagmo, bola, ken sumagmamano a bag ti groseria. No ad-adu ti awitmo, narigrigatmo a balansien ti bagim iti bisikleta! Kasta met laeng ti mapasamak no adu unay ti awatem a trabaho. No busbosem amin a tiempom, pigsam, ken kinaganaygaymo iti trabahom kalpasan ti klasem, mabalin nga agsagaba ti salun-atmo ken bumaba ti gradom. Napatpateg pay, no adu unay ti oras a panagtrabahom, mabalin a marigatankanton a makigimong, mangyadal, ken mangasaba. Inamin ti maysa nga agtutubo nga agnagan Michèle: “Nalanganak dagiti gimong gapu ta nabannogak unay idiay eskuelaan ken iti trabahok.”

 Dimo ipalubos a mapukawmo ti kinabalansem gapu iti panagsapulmo iti kuarta! Kinuna ni Jesus a ti pudno a kinaragsak ket masagrap dagidiay “sipapanunot iti naespirituan a kasapulanda.” (Mateo 5:3) Kinunana pay: “Uray no addaan kinaruay ti maysa a tao ti biagna saan nga agtaud iti bambanag nga ik-ikutanna.” (Lucas 12:15) Impapuso dayta ti maysa a Kristiano nga agtutubo a ni Maureen. Kinunana: “Diak kayat ti maigalut kadagiti materialistiko a kalat. Ngamin, ammok a maisakripisio ti relasionko iti Dios no aramidek dayta.”

Agpayso nga iti sumagmamano a pagilian, kasapulan nga agtrabaho dagiti agtutubo tapno tumulong kadagiti pamiliada. Ngem no saan a kasta ti kasasaadmo, mabalin a mapukaw ti kinabalansem no adu unay nga oras ti busbosem nga agtrabaho. Sigun iti kaaduan nga eksperto, aglablabes ken awan pagsayaatanna ti panagtrabaho iti nasurok a 20 nga oras iti kada lawas kalpasan ti klase. Isingasing ti dadduma nga eksperto a saan koma a lumbes iti walo agingga iti sangapulo nga oras ti panagtrabaho iti kada lawas. Kuna ti masirib nga ari a ni Solomon: “Nasaysayaat ti sangarakem nga inana ngem iti dua a rakem a napinget a panagtrabaho ken panangkamkamat iti angin.”​—Eclesiastes 4:6.

Laglagipem a “ti makaallilaw a pannakabalin ti kinabaknang” mabalin a leppesenna ti interesmo kadagiti naespirituan  a banag. (Marcos 4:19) Isu a no pangpanggepem ti agtrabaho kalpasan ti klasem tapno maaddaanka iti kuarta, urnosem a nalaing ti eskediulmo tapno maipangpangrunam ti panagserbim iti Dios. Ikararagmo dayta ken Jehova a Dios. Tulongannaka tapno madaeram ti narigat a kasasaadmo ken tapno makapagtalinaedka a balanse iti naespirituan.

ADU PAY TI MABASAM MAIPAPAN ITI DAYTOY A TOPIKO ITI TOMO 1, KAPITULO 21

ITI SUMAGANAD A KAPITULO

Sika kadi ti mangkonkontrol iti kuartam, wenno ti kuartam ti mangkonkontrol kenka? Ammuem no kasanom a makontrol dayta.

KANGRUNAAN A TEKSTO

“Nupay kasano ti panagtarigagay ti nasadut iti maysa a banag, pulos a dinanto magun-od. Ti nagaget a tao maalana amin a kayatna.”​—Proverbio 13:4, Ti Baro a Naimbag a Damag Biblia.

BALAKAD

Agipatulodka iti résumé kadagiti kompania uray no saanda pay nga impakaammo nga agsapsapulda iti empleado.

AMMOM KADI . . . ?

Iti dadduma a lugar, agingga iti 85 a porsiento kadagiti mastrekan a trabaho ti saan a naipakaammo.

DAGITI ARAMIDEK!

Tapno dakdakkel ti posibilidadna a makasapulak iti trabaho, masapul nga ․․․․․

Masapul nga agingga iti nga oras laeng ti panagtrabahok iti kada lawas. ․․․․․

Ti kayatko a saludsoden kadagiti dadakkelko maipapan iti daytoy a banag ket ․․․․․

ANIA TI MAKUNAM?

● Apay a masapul a manggedka?

● Ania dagiti karit a pakaipasanguam no agsapulka iti trabaho?

● Kasanom a mataginayon ti balanse a panangmatmat iti kuarta?

[Blurb iti panid 153]

“No saka la agbalin a naragsak no addaanka kadagiti sanikua, dikanto pulos maragsakan. Kanayonto latta nga adda baro a banag a tartarigagayam. Nasken a sursuruem ti mapnek iti aniaman nga adda kenka.”​—Jonathan

[Kahon iti panid 155]

Usarem ti Kuarta Ngem Dimo Ayaten Dayta

Ti natadem a kutsilio ket napateg nga alikamen ti maysa a kosinero. Ngem mabalin a makadangran ti kasta a kutsilio no saan a naruam wenno saan a naannad ti mangusar iti dayta. Ti kuarta ket mayarig iti natadem a kutsilio. Makatulong dayta kenka no ammom nga usaren. Ngem no saan, irubonaka! Kas pagarigan, namallaag ni apostol Pablo maibusor iti panagayat iti kuarta. Gapu ta kayatda ti agpabaknang, dadduma ti nangisakripisio iti panaggagayyem, relasion iti pamilia, ken uray pay ti relasionda iti Dios. Kas resultana, “sinalputda ti intero a bagbagida iti adu nga ut-ot.” (1 Timoteo 6:9, 10) Ania ti maadaltayo iti dayta? Sursuruem nga iggaman ti kuartam. Usarem dayta ngem dimo ayaten!

[Ladawan iti panid 153]

No adu unay ti awatem a responsabilidad, mabalin a marigatanka nga agbalin a balanse