LEKSION 47
Nakasaganaka Kadin nga Agpabautisar?
Adun ti naammuam maipapan ken Jehova gapu iti panagadalmo iti Biblia. Mabalin nga adda dagiti binalbaliwam tapno mayaplikarmo dagiti nasursurom. Ngem mabalin nga adda dagiti rason no apay a mariknam a saanka pay a nakasagana a mangidedikar iti bagim ken Jehova ken agpabautisar. Mailawlawag iti daytoy a leksion ti dadduma a mabalin a manglapped kenka nga agpabautisar ken no kasanom a sanguen dagita.
1. Kasano kaadu ti masapul nga ammom sakbayka a mabautisaran?
Sakbayka a mabautisaran, masapul a maaddaanka iti “umiso a pannakaammo iti kinapudno.” (1 Timoteo 2:4) Saan a kayat a sawen dayta a masapul nga ammom ti sungbat ti amin a saludsod maipapan iti Biblia. Uray dagiti nabayagen a Saksi agtultuloyda latta nga agad-adal. (Colosas 1:9, 10) Ngem masapul a maawatam dagiti kangrunaan nga isursuro ti Biblia. Matulongandaka dagiti panglakayen iti kongregasion tapno maammuam no umanayen dagiti nasursurom.
2. Ania dagiti masapul nga aramidem sakbayka nga agpabautisar?
Sakbayka nga agpabautisar, masapul nga ‘agbabawi ken agbalbaliwka.’ (Basaen ti Aramid 3:19.) Kayatna a sawen a pagladingitam unay dagiti naaramidmo idi a kamali ken dumawatka iti pammakawan ni Jehova. Masapul a determinadoka met a saan a mangaramid kadagiti kagura ni Jehova ken determinadoka a mangparagsak kenkuana. Kasta met, masapul a makigimgimongkan ken makipaspasetkan iti panangasaba kas di bautisado nga agibumbunannag.
3. Apay a saanmo koma nga ipalubos a lapdannaka ti buteng nga agpabautisar?
Mabuteng ti dadduma a baka saanda a maaramid ti inkarida ken Jehova. Agpayso a no dadduma, agkamalitayo. Nagkamali met idi uray dagiti matalek a lallaki ken babbai a mabasa iti Biblia. Ngem saan a namnamaen ni Jehova a perpekto dagiti agdaydayaw kenkuana. (Basaen ti Salmo 103:13, 14.) Maragsakan no aramidem ti amin a kabaelam! Tulongannaka. Ipasigurado pay ketdi ni Jehova nga awan ti ‘makaisina [kadatayo] iti ayatna.’—Basaen ti Roma 8:38, 39.
AMMUEM TI AD-ADU PAY
Kitaem ti maitulong ti panangam-ammom a naimbag ken Jehova ken ti panangawatmo iti tulongna tapno mapagballigiam ti aniaman a manglaplapped kenka nga agpabautisar.
4. Am-ammuem a naimbag ni Jehova
Kasano koma kaadu ti ammom maipapan ken Jehova sakbay nga agpabautisarka? Umanay koma ti ammom maipapan ken Jehova tapno matignayka a mangayat kenkuana ken mangparagsak iti pusona. I-play ti VIDEO tapno makitam no kasano a naaramid dayta dagiti mayad-adalan iti Biblia iti intero a lubong. Kalpasanna, pagsaritaan ti sumaruno a saludsod.
-
Iti video, ania ti inaramid ti dadduma tapno makapagpabautisarda?
Basaen ti Roma 12:2, sa pagsaritaan dagitoy a saludsod:
-
Adda kadi aniaman a panagduaduam kadagiti isursuro ti Biblia, wenno agduaduaka kadi no isursuro dagiti Saksi ni Jehova ti kinapudno?
-
No wen, ania ti mabalinmo nga aramiden?
5. Mapagballigiam dagiti posible a lapped iti panagpabautisar
No idedikartayo ti bagitayo ken Jehova ken agpabautisartayo, mabalin a maipasangotayo kadagiti problema. Tapno makitam ti maysa a pagarigan, i-play ti VIDEO, sa pagsaritaan dagiti sumaruno a saludsod.
-
Iti video, ania idi dagiti manglaplapped ken Narangerel nga agserbi ken Jehova?
-
Kasano a nakatulong ti ayatna ken Jehova tapno mapagballigianna dagita?
Basaen ti Proverbio 29:25 ken 2 Timoteo 1:7, sa pagsaritaan daytoy a saludsod:
-
Ania ti mangpapigsa kadatayo tapno mapagballigiantayo dagiti lapped?
6. Agtalekka a tulongannaka ni Jehova
Tulongannaka ni Jehova a mangparagsak kenkuana. I-play ti VIDEO, sa pagsaritaan dagiti sumaruno a saludsod.
-
Iti video, apay a saan pay a kayat ti mayad-adalan iti Biblia ti agpabautisar?
-
Ania ti nasursurona a nakatulong kenkuana a mas agtalek ken Jehova?
Basaen ti Isaias 41:10, 13, sa pagsaritaan daytoy a saludsod:
-
Apay a siguradoka a kayam a tungpalen ti karim no agdedikarka?
7. Mas ipategmo ti ayat ni Jehova
No kanayonmo a panunoten no kasano kadakkel ti ayat ni Jehova kenka, mas agyamanka kenkuana ken ad-adda met a kayatmo ti agserbi kenkuana iti agnanayon. Basaen ti Salmo 40:5, sa pagsaritaan daytoy a saludsod:
-
Ania dagiti bendision ni Jehova a pagyamyamanam unay?
Ay-ayaten ni propeta Jeremias ni Jehova ken ipatpategna ti saona. Kasta met, ap-apresiarenna unay ti pribilehiona a mangawit iti nagan ni Jehova. Imbagana: “Ti saom ket pakaragsakak ken pagrag-oan ti pusok, ta naipanagan kaniak ti naganmo, O Jehova a Dios.” (Jeremias 15:16) Sungbatam dagitoy a saludsod:
-
Apay nga espesial a pribilehio ti agbalin a Saksi ni Jehova?
-
Kayatmo kadi ti agpabautisar kas Saksi ni Jehova?
-
Adda kadi aniaman a manglaplapped kenka?
-
Panagkunam, ania ti masapul nga aramidem tapno makapagbautisarka?
KUNA TI DADDUMA: “Mabutengak nga agpabautisar ta baka diakto matungpal ti karik.”
-
Kasta kadi ti marikriknam?
SUMARIO
Matulongannaka ni Jehova tapno mapagballigiam ti aniaman a manglaplapped kenka nga agpabautisar.
Rebiu
-
Kasano kaadu ti masapul nga ammom iti Biblia sakbayka nga agpabautisar?
-
Ania dagiti masapul a balbaliwam tapno makapagbautisarka?
-
Apay a saanmo koma nga ipalubos a lapdannaka ti buteng nga agpabautisar?
AGDISKOBREKA PAY
Ammuem no ania koma ti rason nga agpabautisarka.
“Nakasaganaka Kadin nga Agpabautisar?” (Ti Pagwanawanan, Marso 2020)
Ammuem no kasanom a mapagballigian dagiti pakarigatan a mabalin a manglapped kenka nga agpabautisar.
“Ania ti Makalapped Kaniak nga Agpabautisar?” (Ti Pagwanawanan, Marso 2019)
Kitaem no ania ti inaramid ti maysa a lalaki tapno makapagbautisar uray adda dagiti nakaro a lapped.
Idi damo, saan a kayat ni Ataa ti agpabautisar. Ngem kitaem no ania ti nakakombinsir kenkuana nga agpabautisar.
Baka Kayatmo Met ti
MASANSAN A MAISALSALUDSOD
Ania ti Panagadal iti Biblia nga Iyaw-awis Dagiti Saksi ni Jehova?
Iti libre a panagadal nga iyaw-awis dagiti Saksi ni Jehova, mabalinmo nga usaren ti aniaman a patarus ti Biblia. Mabalinmo nga awisen ti amin a kapamiliam wenno ti asinoman a gayyemmo.
