Idi simmalogen da Jesus, Pedro, Santiago, ken Juan manipud iti bantay, adu a tattao ti nakitada. Adda dakes a napasamak. Linawlaw dagiti eskriba dagiti adalan, ket makisupsupiatda kadakuada. Nasdaaw dagiti tattao idi makitada ni Jesus, ket nagtatarayda a simmabat kenkuana. Dinamagna: “Ania ti pakisupsupiatanyo?”​—Marcos 9:16.

Maysa a lalaki ti nagparintumeng iti sango ni Jesus ken kinunana: “Mannursuro, inkuyogko ti anakko a lalaki ta linuganan ti demonio a mangpapaumel kenkuana. No sumro ti demonio, itumbana ti anakko, isu nga aglabutab ti ngiwatna, agngaretnget dagiti ngipenna sa agkapsut. Impakaasik kadagiti adalam a paruarenda ti demonio ngem dida kabaelan.”​—Marcos 9:​17, 18.

Nalawag a babbabalawen dagiti eskriba dagiti adalan gapu ta saanda a mapaimbag ti ubing, nalabit uy-uyawenda ti panangikagumaanda. Gapuna, imbes a sungbatan ni Jesus ti marirriribukan nga ama, kinunana kadagiti tattao: “Anian a kinaawan pammati ken kinadakes daytoy a henerasion! Kasano pay kabayag a masapul a makikaduaak kadakayo? Kasano pay kabayag nga an-anusankayo?” Agaplikar dagita a prangka a sasao kadagiti eskriba a mangrirriribuk kadagiti adalanna idi saanda a kadua ni Jesus. Kinita ni Jesus ti agladladingit nga ama, ket kinunana: ‘Iyegmo kaniak ti ubing.’—Mateo 17:17.

Bayat nga umas-asideg ti ubing ken Jesus, ti limmugan a demonio intumbana ti ubing iti daga ket pinagkuyegyegna. Nagtulidtulid iti daga nga aglablabutab ti ngiwatna. “Kasano kabayagen a mapaspasamak daytoy kenkuana?” dinamag ni Jesus iti ama. Insungbatna: “Manipud pay idi ubing, ken masansan nga itumbana iti apuy ken uray iti danum tapno patayenna ti anakko.” Impakaasi ti ama: “No kabaelam a paimbagen, kaasiannakami  koma ken tulongannakami.”​—Marcos 9:​21, 22.

Kasta unay ti panagpakaasi ti ama ta uray dagiti adalan ni Jesus saanda a napaimbag ti anakna. Gapu iti kiddaw ti ama, impasigurado ni Jesus: “Apay a kunam a ‘No kabaelam,’? No adda pammati ti maysa, amin a banag ket mabalin.” Dagus nga impukkaw ti ama: “Adda pammatik! Ngem papigsaem koma ti pammatik!”​—Marcos 9:​23, 24.

Nadlaw ni Jesus nga agtataray dagiti tattao a mapan kenkuana. Bayat a kumitkitada, inungtan ni Jesus ti demonio: “Sika a demonio a mangpapaumel ken mangpatpatuleng, rummuarka kenkuana ket dimon subsublian!” Idi rimmuar ti demonio, pinagikkisna ti ubing ken namin-adu a pinagkuyegyegna. Idi kuan, saanen a nagkuti ti ubing. Idi nakita daytoy dagiti tattao, kinunada: “Natayen!” (Marcos 9:​25, 26) Ngem idi iniggaman ni Jesus ti ima ti ubing, bimmangon ket “dagus nga immimbag.” (Mateo 17:18) Nasdaaw dagiti tattao iti inaramid ni Jesus.

Ngem sakbayna, idi imbaon ni Jesus dagiti adalan tapno mangasabada, kabaelanda ti mangparuar kadagiti demonio. Gapuna, idi is-isuda laengen iti maysa a balay, dinamagda kenkuana: “Apay a saanmi a naparuar?” Inlawlawag ni Jesus a kurang ngamin ti pammatida. Kinunana: “Kararag laeng ti makaparuar iti dayta a kita ti demonio.” (Marcos 9:​28, 29) Kasapulan ti nabileg a pammati ken panagpatulong iti Dios babaen ti kararag tapno maparuar ti nabileg a demonio.

Inngudo ni Jesus: “Ibagak kadakayo, no adda pammatiyo a kas kabassit ti bukel ti mustasa, mabalinyo nga ibaga iti daytoy a bantay, ‘Umaliska, mapanka sadiay,’ ket umalis dayta. Awanto ti saanyo a kabaelan nga aramiden.” (Mateo 17:20) Talaga a nakabilbileg ti maaramidan ti pammati!

Dagiti pakarigatan a manglapped iti panagrang-ay iti panagserbi ken Jehova ket mabalin a kasla bantay a narigat nga ikkaten ken pagballigian. Ngem no pabilgentayo ti pammatitayo, mapagballigiantayo dagiti kasla bantay a lapped ken pakarigatan.