Nagdinamag kadagiti Judio nga agnanaed iti amianan a laud nga igid ti Baybay ti Galilea ti panagsubli ni Jesus manipud Decapolis. Mabalin nga adu ti nakadamag a pinagtalnana ti angin ken ti baybay iti nabiit pay a bagyo, ken mabalin a naammuanda a pinaimbagna ti lalaki a naluganan iti demonio. Gapuna, “adu a tattao” ti naguummong iti igid ti baybay, a mabalin nga iti Capernaum, tapno pasangbayenda ni Jesus. (Marcos 5:21) Idi bumaba ni Jesus iti bangka, magagaran dagiti tattao a makakita kenkuana.

Maysa kadagiti magagaran a makakita ken Jesus ket ni Jairo, maysa kadagiti opisial iti sinagoga a mabalin nga idiay Capernaum. Nagparintumeng iti sakaanan ni Jesus ket maulit-ulit a nagpakaasi: “Nakaron ti sakit ti balasitangko. Pangngaasim ta umayka ken iparabawmo dagiti imam kenkuana tapno umimbag ket agbiag pay.” (Marcos 5:23) Ania ti aramiden ni Jesus, ta agpakpakaasi ni Jairo nga agasanna ti kakaisuna a balasitangna nga agtawen laeng iti 12 ken ipatpategna unay?—Lucas 8:42.

Idi agturongen ni Jesus iti balay ni Jairo, naipasango manen ni Jesus iti nakalkaldaang a situasion. Adu a tattao a kimmuyog ken Jesus ti magagaran, a pampanunotenda no makakitada manen iti milagro nga aramidenna. Nupay kasta, maysa a babai sadiay ti mangpampanunot iti nakaro a sakitna.

Agpadpadara daytoy a Judio a babai iti 12 a tawenen. Adun ti nagpaagasanna, nagastona payen ti amin a kuartana, ngem saan nga immimbag. Kinapudnona, “kimmaro pay” ketdi ti sakitna.—Marcos 5:26.

Mabalin a maawatam ti an-annayenna, ta malaksid a mangpakapuy kenkuana, nakababain pay dayta. Ti maysa nga agsagsagaba iti kasta, gagangay a saanna nga ibagbaga dayta iti dadduma. Maysa pay, sigun iti Linteg a naited ken Moises, agbalin a narugit ti maysa a babai nga agpadpadara. Asinoman a mangsagid kenkuana wenno kadagiti badona, masapul a labaanna dagiti badona ken agdigus ken maibilang a narugit agingga iti rabii.—Levitico 15:25-27.

Daytoy a babai “nadamagna dagiti inar-aramid ni Jesus,” ket binirokna. Gapu ta maibilang a narugit, saan a nagpadlaw a nakilinnetlet kadagiti tattao. Kinunana iti bagina: “Uray masagidko laeng koma ti makinruar a badona, umimbagakon.” Idi sinagidna ti gayadan ti makinruar a bado ni Jesus, dagus a nariknana a nagsardengen nga agpadara! “Immimbagen ti nakaro a sakitna.”—Marcos 5:27-29.

Kalpasanna, kinuna ni Jesus: “Asino ti nangsagid kaniak?” Panagkunam, ania ti narikna ti babai idi nangngegna dayta? Kinuna ni Pedro ken Jesus: “Agdidinnuron ti adu a tattao iti likudam, isu a masagsagiddaka.” Apay ngarud a dinamag ni Jesus, “Asino ti nangsagid kaniak?” Kinuna ni Jesus: “Adda nangsagid kaniak, ta nariknak nga adda pannakabalin a rimmuar kaniak.” (Lucas 8:45, 46) Wen, adda rimmuar a pannakabalin ken Jesus gapu ta napaimbag ti babai.

Gapu ta saan a mailimed ti babai ti inaramidna, mabutbuteng ken agpigpigerger a nagparintumeng iti sango ni Jesus. Iti sanguanan ti amin, impudnona ti maipapan iti sakitna ken imbagana a kaim-imbagna laeng. Liniwliwa ni Jesus: “Anakko, pinaimbagnaka ti pammatim. Dika agdanag, nasalun-atkan ken awanen ti nakaro a sakitmo.”—Marcos 5:34.

Nalawag a nadungngo ken naasi Daydiay pinili ti Dios a mangituray iti daga a saan laeng a maseknan kadagiti tattao no di ket kabaelanna a tulongan ida!