Nagduduma ti pamay-an ni Jesus a nangparegta kadagiti tattao a mangtingiting iti takderda iti imatang ti Dios. Adda manen napasamak kalpasan ti pannakisaritana kadagiti tattao iti ruar ti balay ti Fariseo.

Imbaga ti dadduma ti maysa a nagkas-ang a pasamak. Ibagbagada ti maipapan kadagiti taga-Galilea nga inlaok ti Romano a gobernador a ni Poncio Pilato ti darada kadagiti daton. (Lucas 13:1) Ania ti kayatda a sawen?

Mabalin a dagitoy dagiti taga-Galilea a napapatay idi nagprotesta ti rinibu a Judio gapu iti panangusar ni Pilato iti kuarta a naggapu iti paggamengan ti templo tapno mangibangon iti pagayusan ti danum nga agturong iti Jerusalem. Mabalin a nagun-odan ni Pilato ti kuarta babaen ti tulong dagiti panguluen ti templo. Patien dagiti manges-estoria iti daytoy a didigra a mabalin a napasamak dayta kadagiti taga-Galilea gapu ta nakaro ti basolda. Saan nga immanamong ni Jesus.

Insaludsodna: “Panagkunayo, nakarkaro ngata ti basol dagidiay a taga-Galilea ngem ti amin a dadduma pay a taga-Galilea gapu iti kasta a napasamak kadakuada?” Saan ti sungbat ni Jesus. Ngem inusarna dayta a pasamak a mangpakdaar kadagiti Judio: “Ngem no saankayo nga agbabawi, mataykayto amin a kas kadakuada.” (Lucas 13:​2, 3) Kalpasanna, tinukoy ni Jesus ti nabiit pay a pasamak a mabalin a mainaig iti pannakaaramid ti pagayusan ti danum. Dinamagna:

“Dagidiay 18 a natay ta natupakanda iti torre ti Siloam, ad-adu ngata ti basolda ngem ti amin a sabsabali pay nga agnanaed iti Jerusalem?” (Lucas 13:4) Patien dagiti tattao a mabalin a natay dagidiay a tattao gapu iti personal a dakes nga inaramidda. Saan manen nga immanamong ni Jesus. Ammona a “ti tiempo ken ti di mapakpakadaan a pasamak” ket mapasamak ken mabalin a daytoy ti makagapu iti daytoy a trahedia. (Eclesiastes 9:11) Ngem masapul koma nga adda masursuro dagiti tattao iti pasamak. “No saankayo nga agbabawi, mataykayto amin a kas kadakuada,” kinuna ni Jesus. (Lucas 13:5) Ngem apay nga ipagpaganetgetna daytoy a leksion?

Adda pakainaigan dayta iti kasasaad ti ministeriona, ket kastoy ti panangiladawanna iti dayta: “Adda higos a naimula iti kaubasan ti maysa a tao. Napanna kinita no adda bunganan ngem awan ti nasarakanna. Isu a kinunana iti paraaywan iti kaubasan, ‘Tallo a tawenen nga agkarasubliak ngem awan ti makitak a bunga daytoy a higos. Pukanemon! Sayang la ti daga a nakaimulaanna.’ Insungbat ti paraaywan, ‘Apo, bay-am pay laeng iti makatawen ta kaliak ti aglawlawna sakonto abunuan. No agbunganto, nasayaat. Ngem no saan, ipapukanmonton.’”​—Lucas 13:​6-9.

Iti nasurok a tallo a tawen, inkagumaan ni Jesus a patanoren ti pammati dagiti Judio. Ngem manmano laeng ti nagbalin nga adalan a mabalin a maibilang a bunga ti nagbannoganna. Iti maikapat a tawen ti ministeriona, ad-adda pay ti panangikagumaanna. Arigna kalien ken abunuanna ti aglawlaw ti arig higos a kayo dagiti Judio babaen ti panangasaba ken panangisurona idiay Judea ken Perea. Ania ti resultana? Bassit laeng dagiti Judio a nangipangag. Kas maysa a nasion,  saanda a nagbabawi isu a maikarida a madadael.

Naibutaktak manen dayta a kinakurang ti pammati ti kaaduan di nagbayag kalpasan ti Sabbath. Mangisursuro idi ni Jesus idiay sinagoga. Nakitana ti maysa a babai a 18 a tawenen a nakaro ti kubbona gapu iti panangparigat ti maysa a demonio. Gapu iti asi, imbaga ni Jesus kenkuana: “Umimbagkan.” (Lucas 13:12) Imparabaw ni Jesus ti imana ket dagus a nakatakder iti nalinteg ken indaydayawna ti Dios.

Nakapungtot ti opisial iti sinagoga. Kinunana: “Innem nga aldaw ti panagtrabahotayo isu a kadagita laeng nga aldaw ti panagpaagasyo, saan nga iti aldaw ti Sabbath.” (Lucas 13:14) Saan nga iliblibak ti opisial nga adda pannakabalin ni Jesus a mangagas. Imbes ketdi, konkondenarenna dagiti mapan agpaagas iti aldaw ti Sabbath! Nalawag ti sungbat ni Jesus: “Aginsisingpet! Saan kadi a no aldaw ti Sabbath warwaranyo ti baka wenno ti asnoyo iti nakaigalutanda sa mapanyo painumen? Daytoy a babai, nga anak ni Abraham, ket 18 a tawenen a parparigaten ni Satanas. Saan kadi nga iti aldaw ti Sabbath maiparbeng laeng a mawayawayaan iti panagrigrigatna?”​—Lucas 13:​15, 16.

Nabainan dagiti bumusbusor, ngem naragsakan ti bunggoy iti nadayag a bambanag a makitkitada nga ar-aramiden ni Jesus. Kalpasanna, inulit ni Jesus iti Judea ti dua a naimpadtuan nga ilustrasionna maipapan iti Pagarian, nga insalaysayna idi adda iti bangka iti Baybay ti Galilea.​—Mateo 13:​31-33; Lucas 13:​18-21.