Napan ni Jesus idiay Jerusalem para iti Piesta ti Dedikasion (wenno, Hanukkah). Daytoy a piesta ti selebrasion para iti pannakaidedikar manen ti templo. Nasurok a sangagasut a tawen sakbayna, nangibangon ti ari ti Siria a ni Antiochus IV Epiphanes iti maysa nga altar iti rabaw ti dakkel nga altar iti templo ti Dios. Idi agangay, nabawi manen dagiti annak ti maysa a padi a Judio ti Jerusalem ket indedikarda manen ti templo ken Jehova. Manipud idin, tinawen a maselebraran dayta iti Kislev 25, ti bulan a katupag ti maudi a paset ti Nobiembre ken nasapa a paset ti Disiembre.

Panawen ti lam-ek idi. Bayat a magmagna ni Jesus idiay templo iti kolonada ni Solomon, pinalawlawan dagiti Judio ket kinunada: “Kaanonto nga ibagam kadakami ti pudpudno maipapan kenka? No sika ti Kristo, ibagamon.” (Juan 10:​22-24) Ania ti isungbat ni Jesus? Insungbatna: “Imbagakon, ngem saankayo a namati.” Saan a direkta nga imbaga ni Jesus nga isu ti Kristo, kas iti imbagana iti Samaritana iti bubon. (Juan 4:​25, 26) Nupay kasta, impabigbigna ti kinasiasinona idi kinunana: “Addaakon sakbay pay a nayanak ni Abraham.”​—Juan 8:58.

Kayat ni Jesus a dagiti tattao a mismo ti makabigbig nga isu ti Kristo babaen ti panangidiligda iti ar-aramidna kadagiti naipadto nga aramiden ti Kristo. Dayta ti makagapu no apay nga imbagana idi kadagiti adalanna a saanda nga ibagbaga iti asinoman nga isu ti Mesias. Ngem prangka nga ibaganan kadagiti nauyong a Judio: “Dagiti inaramidko iti nagan ni Amak ti mangsaksi iti maipapan kaniak. Ngem saankayo a mamati.”​—Juan 10:​25, 26.

Apay a saanda a patien a ni Jesus ti Kristo? Kinunana: “Saankayo a mamati, ta saan a dakayo ti karnerok. Imdengan dagiti karnerok ti timekko, ket am-ammok ida, ken surotendak. Ikkak ida iti biag nga agnanayon, ket saandanto a madadael, ken awanto ti mangagaw kadakuada kaniak. Napatpateg ti inted kaniak ti Amak ngem iti amin a banag, ket awan ti makaagaw kadakuada iti Ama. Siak ken ti Ama maymaysakami.” (Juan 10:​26-30) Adda ni Jesus ditoy daga ken adda met ni Amana idiay langit, isu a saanna a kayat a sawen a literal a maymaysada ken ni Amana. Imbes ketdi, maymaysa ti panggepda, ta agkaykaysada.

Nakapungtot dagiti Judio iti imbaga ni Jesus isu a nagpidutda manen kadagiti bato tapno papatayenda. Saan a nagbuteng ni Jesus iti daytoy. “Nagadu ti impakitak kadakayo a nasayaat nga aramid nga imbilin ti Ama,” kinunana. “Ania kadagita ti panguboranyo kaniak?” Insungbatda: “Saan a dagiti nasayaat nga aramid ti makagapu nga uborendaka no di ket agsasaoka maibusor iti Dios; ta ibagbagam a kaslaka iti Dios.” (Juan 10:​31-33) Saan nga ibagbaga ni Jesus nga isu ket maysa a dios, isu nga apay nga akusaranda?

Ibagbaga ni Jesus nga adda pannakabalinna a patien dagiti Judio a ti laeng Dios ti addaan iti kasta a pannakabalin. Kas pagarigan, maipapan iti “karnero” kinunana: “Ikkak ida iti biag nga agnanayon,” banag a saan a maaramid ti tao. (Juan 10:28) Saan nga inkankano dagiti Judio ti imbaga ni Jesus a talaga a naggapu iti Amana ti autoridadna.

Idi sinungbatan ni Jesus ti pammabasolda, dinamagna: “Saan aya a naisurat iti Lintegyo [iti Salmo 82:6], ‘Kinunak: “Dakayo ket dios”’? No inawaganna a ‘dios’ dagiti kinondenar ti saona . . . apay ngarud nga ibagayo kaniak, a pinagbalin ti Ama kas nasantuan ken imbaonna ditoy lubong, ‘Agsasaoka maibusor iti Dios,’ gapu ta kinunak, ‘Siak ti Anak ti Dios’?”​—Juan 10:​34-36.

Wen, awagan ti Kasuratan uray pay dagiti nakillo nga ukom kas “dios.” Gapuna, kasano koma nga ibaga dagiti Judio nga agbasbasol ni Jesus idi kinunana, “Siak ti Anak ti Dios”? Imbagana ti banag a mangkombinsir koma kadakuada: “No saanko nga aramiden ti ipapaaramid ni Amak, saandak a patien. Ngem no aramidek dagita, uray no saandak  a patien, patienyo koma dagiti aramidko, tapno maammuanyo ken agtultuloy a maammuanyo a ti Ama ket naikaykaysa kaniak ken naikaykaysaak iti Ama.”​—Juan 10:​37, 38.

Narurod dagiti Judio gapu iti dayta isu a kayatda a tiliwen ni Jesus, ngem nakalibas manen. Pimmanaw idiay Jerusalem ket bimmallasiw iti Karayan Jordan, iti lugar a nangbabautisaran idi ni Juan, dandani uppat a tawenen ti napalabas. Mabalin nga asideg laeng dayta iti makin-abagatan a paset ti Baybay ti Galilea.

Napan ken Jesus dagiti tattao ket kinunada: “Awan ti milagro nga inaramid ni Juan, ngem pudno amin nga imbagana maipapan iti daytoy a tao.” (Juan 10:41) Gapuna, adu a Judio ti namati ken Jesus.