NI Daniel, maysa nga agtutubo a naisangsangayan ti kinatarnawna ket naidestiero idiay Babilonia sakbay a nadadael ti Jerusalem. Ngem adda wayawaya a naipaay kenkuana agraman iti dadduma a kautibo a Judio manipud iti naparmek a pagarian ti Juda. Bayat ti naunday a kaadda ni Daniel iti Babilonia, kasta unay ti panangbendision ti Dios kenkuana, a nalasatanna pay ti ipapatay iti rukib dagiti leon ken nakaawat kadagiti sirmata tapno makitana ti adayo a masanguanan. Dagiti kapatgan a padto ni Daniel ket naisentro iti Mesias ken iti turayna.

Naammuan ni Daniel no kaano a dumteng ti Mesias. Naibaga ken Daniel no kaano a manamnama ti ili ti Dios a dumteng ti “Mesias a Panguluen”—69 a lawas dagiti tawen kalpasan ti bilin a maisubli ken mabangon manen dagiti pader ti Jerusalem. Ti gagangay a lawas ket pito nga aldaw; ti maysa a lawas dagiti tawen ket pito a tawen. Naipaulog dayta a bilin mabayag pay kalpasan ti panawen ni Daniel, a dayta ket idi 455 K.K.P. Dayta ti pangrugian ti 69 a “lawas” wenno 483 a tawen, nga agpatingga iti tawen 29 K.P. Iti sumaganad a paset daytoy a publikasion, maammuantayo ti napasamak iti dayta a tawen. Nasirmata pay ni Daniel a “magessatto” wenno mapapatayto ti Mesias, tapno maabbongan ti basol.—Daniel 9:24-26.

Ti Mesias agbalinto nga Ari idiay langit. Iti naidumduma a pannakasirmatana iti langit, nakita ni Daniel ti Mesias, a natukoy a “kasla anak ti tao,” nga immadani iti mismo a trono ni Jehova. Inted ni Jehova kenkuana ti “panagturay ken dayaw ken pagarian.” Agpaut dayta a Pagarian iti agnanayon. Naammuan ni Daniel ti maysa pay a makapainteres a detalye maipapan iti Mesianiko a Pagarian—addanto kakadua ti Ari nga agturay, maysa a grupo a natukoy kas “sasanto Daydiay Katan-okan.”—Daniel 7:13, 14, 27.

Ti Pagarian dadaelennanto dagiti gobierno daytoy a lubong. Ti Dios inikkanna ni Daniel iti abilidad a mangipaawat iti tagtagainep a nangriribuk ken Nabucodonosor nga ari ti Babilonia. Nakita ti ari ti maysa a dakkel nga imahen a balitok ti ulona, pirak ti barukong ken dagiti takiagna, gambang ti tian ken dagiti luppona, landok dagiti gurongna, ken naglaok a landok ken pila dagiti sakana. Maysa a bato a natikap iti bantay ti nangtiro kadagiti narasi a saka ken nangrumek iti ladawan. Inlawlawag ni Daniel a dagiti paset ti imahen iladawanda dagiti agsasaruno a kabilgan a turay iti lubong, a mangrugi iti Babilonia kas ti ulo a balitok. Nasirmata ni Daniel nga iti tiempo dagiti maudi a turay daytoy nadangkes a lubong, agtignayto ti Pagarian ti Dios. Rumekenna amin dagiti gobierno iti lubong. Kalpasanna agturayto ti Pagarian iti agnanayon.—Daniel, kapitulo 2.

Nupay lakay unayen idi ni Daniel, nakitana pay ti pannakatnag ti Babilonia. Pinarmek ni Ari Ciro ti siudad kas impadto dagiti propeta. Di nagbayag kalpasanna, nawayawayaan met laeng dagiti kautibo a Judio—eksakto kalpasan ti naipadto a 70 a tawen a pannakalangalang ti pagilianda. Babaen ti panangiwanwan dagiti matalek a gobernador, padi, ken mammadto, dagiti Judio naibangonda manen ti Jerusalem agraman ti templo ni Jehova. Ngem ania ti mapasamak kalpasan ti nadakamat a 483 a tawen?

—Naibasar iti libro a Daniel.