AMMO ni Jehova nga agsagaba ken matayto Daydiay dungdunguenna. Dayta ti iparipirip ti padto a nailanad iti Genesis 3:15. Maipakaammo ngata ti Dios kadagiti tattao a nakapatpateg kenkuana dayta a sakripisio ti Anakna? Inyilustrar dayta ti Biblia babaen iti panangisalaysayna ti maipapan iti agama. Kiniddaw ti Dios ken Abraham nga idatonna ti dungdunguenna nga anak a ni Isaac.

Naisangsangayan ti pammati ni Abraham. Laglagipenyo nga inkari ti Dios kenkuana nga agtaud ken Isaac ti naipadto a Manangisalakan wenno Bin-i. Gapu ta agtalek ni Abraham a ti Dios pagungarenna ni Isaac no kasapulan, situtulnog idi a mangidaton iti mismo nga anakna. Ngem sakbay la unay a mapasamak dayta, maysa nga anghel nga imbaon ti Dios ti nanglapped ken Abraham. Gapu iti kinatulok ni Abraham a mangidaton iti kapatgan kenkuana, inulit ti Dios ti karina iti daytoy a matalek a patriarka.

Kalpasanna, naaddaan ni Isaac iti dua nga annak, da Esau ken Jacob. Saan a kas ken Esau, tinagipateg ni Jacob dagiti sagrado a bambanag, isu a ginunggonaan ti Dios. Ti Dios binaliwanna ti nagan ni Jacob iti Israel, ket dagiti 12 nga annakna nagbalinda a pangulo dagiti tribu ti Israel. Ngem kasano a nagbalin a dakkel a nasion dayta a pamilia?

Nangrugi dagiti pasamak idi a ti kaaduan kadagita nga annak nagimonda iti inaudi a kabsatda a lalaki a ni Jose. Inlakoda kas adipen, ket naipan idiay Egipto. Ngem binendisionan ti Dios ti matalek ken natured nga agtutubo. Iti laksid dagiti nakaro a rigat a napasaran ni Jose, idi agangay, dakkel nga autoridad ti impaay kenkuana ti agturay iti Egipto a ni Faraon. Naintiempuan dayta gapu ta idi dimteng ti nakaro a bisin, imbaon ni Jacob ti dadduma nga annakna a mapan idiay Egipto tapno gumatangda iti taraon, ket ni Jose ti administrador idi ti amin a taraon! Kalpasan ti napnuan emosion a panagkikitada, pinakawan ni Jose dagiti kakabsatna ken kiniddawna nga umakar iti Egipto ti intero a pamilia. Naikkanda iti kasayaatan a daga, a sadiay mabalinda ti umadu ken rumang-ay. Nabigbig ni Jose a ti Dios ti nangimaniobra iti bambanag tapno matungpal dagiti karina.

Nagnaed ti lakayen a ni Jacob idiay Egipto bayat ti nabatbati a tawtawen ti biagna, a kadua ti dumakdakkel a pamiliana. Sakbay unay ti ipupusayna, impadtona a ti naikari a Bin-i, wenno Manangisalakan, agbalinto a nabileg nga Agturay nga agtaud iti kapuonan ti anakna a ni Juda. Kalpasan ti adu a tawen, sakbay ti mismo nga ipupusayna, impadto ni Jose nga iruarto ti Dios ti pamilia ni Jacob manipud iti Egipto.

—Naibasar iti Genesis kapitulo 20 agingga iti 50; Hebreo 11:17-22.