Ania ti Napasamaken iti Respeto iti Pamilia?
NO APAY A NAPATEG TI RESPETO ITI PAMILIA
No respetuentayo dagiti kapamiliatayo, adda talna iti uneg ti pamilia ken natalged ti rikna ti ama, ina, ken dagiti annakda.
-
Kuna ti libro a The Seven Principles for Making Marriage Work a no agrinrinnespeto dagiti agassawa, ipakpakitada nga ipatpategda ti asawada “saan laeng nga iti dadakkel a pamay-an no di ket uray kadagiti babassit a pamay-an iti kada aldaw.”
-
Ipakita ti research a dagiti ubbing a nakasursuro nga agbalin a narespeto ket dakdakkel ti kompiansada iti bagida, nasaysayaat ti relasionda kadagiti nagannakda, ken basbassit ti problemada iti emosional ken mental.
TI MABALINMO NGA ARAMIDEN
Mangiplanokayo iti aramidenyo kas pamilia. Umuna, siguraduenyo nga agassawa a maawatanyo no ania ti kaipapanan ti “respeto.” Maikadua, isuratyo dagiti espesipiko a kababalin a kayatyo nga ipakita ken saan nga ipakita dagiti kapamiliayo. Maikatlo, pagsasaritaanyo dagita kas maysa a pamilia tapno ammoyo amin dagiti aramidenyo tapno maipakitayo ti respeto.
Agbalinka nga ulidan. Dildillawem kadi dagiti kapamiliam gapu kadagiti kamalida? Uy-uyawem kadi ida gapu kadagiti opinionda? Wenno saanmo kadi ida a pampansinen wenno bigla lattan nga agsaoka no makisarsaritada kenka?
Tip: Ibilangmo nga obligasionmo iti asawam ken annakmo ti panangrespetom kadakuada, imbes nga ipakitam laeng dayta no adda naaramiddan a maikari iti respetom.
Narespetoka koma uray no adda diyo pagkinnaawatan iti kapamiliam. No agsasaoka, liklikam nga ibaga dagiti kas iti “kanayonka la a kasta” wenno “dimo man la pulos.” No ibagam dagita, masaktam ken mapabainam ti kapamiliam ken kumaro laeng ti diyo pagkinnaawatan.
TI AR-ARAMIDENMI
Iparparegtami a Saksi ni Jehova nga agririnnespeto dagiti agkakapamilia. Masansan a dayta ti linaon dagiti artikulo, libro, broshur, ken video a libre nga iwarwarasmi.
PARA ITI AGASSAWA: Makatulong ti artikulo nga addaan serye a Tulong Para iti Pamilia iti asawa a lalaki ken asawa a babai tapno maammuanda no kasanoda a . . .
-
dumngeg a naimbag
-
pagpatinggaen ti di panagin-innuni
-
maisardeng ti panagriri
(Birokem ti “Tulong Para iti Pamilia” iti jw.org/ilo)
PARA ITI NAGANNAK: Makatulong ti artikulo nga addaan serye a Tulong Para iti Pamilia tapno maisuro dagiti nagannak dagiti annakda . . .
-
nga agbalin a natulnog
-
a tumulong kadagiti trabaho iti balay
-
a mangibaga iti “pangngaasim” ken “pagyamanan”
(Birokem ti “Panangpadakkel iti Ubbing” ken “Panangpadakkel Kadagiti Tin-edyer” iti jw.org/ilo)
Kitaem met ti apendise a “Saludsod nga Iyimtuod Dagiti Nagannak” iti libro a Dagiti Saludsod nga Iyimtuod ti Agtutubo—Dagiti Sungbat nga Epektibo, Tomo 1. (Birokem ti “Saludsod nga Iyimtuod Dagiti Nagannak” iti jw.org/ilo)
PARA ITI ANNAK: Iti seksion a Tin-edyer ken Agtutubo iti jw.org, adda dagiti artikulo, video, ken worksheet a makatulong kadagiti annak tapno . . .
-
makatunosanda dagiti nagannak ken kakabsatda
-
narespeto a makisaritada kadagiti nagannakda maipapan kadagiti pagannurotanda
-
maalada ti panagtalek dagiti nagannakda
(Birokem ti “Tin-edyer ken Agtutubo” iti jw.org/ilo)
Awan ti bayadam no usarem ti website a jw.org. Saanmo a kasapulan ti agbayad, ag-subscribe, wenno makimiembro, ken awan ti maala a personal nga impormasionmo.
